قىرعىزستاندىق ەكى كەلىنشەك دەنەسىنە ەسىرتكى تاڭىپ قازاقستانعا وتپەك بولعان

الماتى. قازاقپارات - وتكەن تاۋلىك ىشىندە قازاقستاندىق شەكاراشىلار مەملەكەتتىك شەكارا ارقىلى ەسىرتكى زاتتارىن وتكىزبەك بولعان قىرعىزستاندىق ەكى ازاماتشانى ۇستادى.

بۇل تۋرالى ق ر ۇ ق ك شەكارا قىزمەتىنىڭ باسپا ءسوز قىزمەتى حابارلادى.

«وڭتۇستىك» وڭىرلىك باسقارماسىنا قاراستى «قورداي-اۆتو» باقىلاۋ- وتكىزۋ بەكەتىنىڭ شەكارا ناريادى قىرعىزستاننان كەلە جاتقان ايەلدى توقتاتقان.

ءجۇرىسى كۇدىكتى بولىپ كورىنگەن 32 جاستاعى ايەلدى تەكسەرۋ كەزىندە شەكاراشىلار ونىڭ دەنەسىنەن «سكوتچپەن» ورالعان 4 تۇيىنشەك تاپتى.

ونىڭ «گاشيش» ەكەندىگى انىقتالدى. جۇكتىڭ سالماعى 402 گرامم بولىپ شىقتى.

سول كۇنى تۇستەن كەيىن جوعارىدا اتالعان باقىلاۋ- وتكىزۋ بەكەتىنىڭ شەكارا ناريادى قىرعىزستاندىق تاعى ءبىر ازاماتشانى ۇستادى. قىزمەتتىك ءيتتىڭ كومەگىمەن تەكسەرۋ كەزىندە ونىڭ دا دەنەسىنەن سالماعى 306 گرامم 05 م گ. بولاتىن «گاشيش» تابىلدى.

اتالعان دەرەكتەر بويىنشا قۇقىققورعاۋ ورگاندارى حابارلاندىرىلدى.

اۆتور: گۇلميرا عوسمانالي