الماتىدا جوندەلگەن جول الماتىدان استانا قالاسىنا دەيىنگى ارا- قاشىقتىقتان اسىپ تۇسەدى - ا. ەسىموۆ

الماتى. قازاقپارات - الماتىدا جوندەلگەن جانە جاڭادان سالىنعان اۆتوكولىك جولدارىنىڭ جالپى ۇزىندىعى الماتىدان استاناعا دەيىنگى ارا- قاشىقتىقتان اسىپ تۇسەدى.

بۇل تۋرالى بۇگىن الماتىدا قۇرىلىسشى كۇنىن مەرەكەلەۋ اياسىندا قالا اكىمى احمەتجان ەسىموۆ مالىمدەدى.

«الماتىدا جالپى ۇزىندىعى 140 شاقىرىم بولاتىن جاڭا جولدار سالىنىپ، 1265 شاقىرىمدىق جول قايتا جوندەۋدەن وتكىزىلدى. بۇل الماتىدان استانا قالاسىنا دەيىنگى ارا- قاشىقتىقتان اسىپ تۇسەدى»، - دەدى ءوز سوزىندە ا. ەسىموۆ.

ول سونىمەن قاتار، بۇل باعىتتا جۇمىستار ودان ءارى جالعاسىن تاباتىندىعىن جەتكىزدى.

احمەتجان ەسىموۆتىڭ ايتۋىنشا قالادا 28 كولىك ايرىعى جۇمىس ىستەيدى. ولاردىڭ كوبىسى سوڭعى جەتى جىلدىڭ ىشىندە سالىنعان. ءاربىر جول ايرىعى زياندى قالدىقتاردىڭ اۋەگە شىعارىلۋىن 11 پايىزعا تومەندەتەدى.

«قالادا جالپى ۇزىندىعى 32 شاقىرىم بولاتىن ماگيسترالدىق كوشەلەر سالىندى. قازىرگى تاڭدا تولە ءبي كوشەسىن قايىربەكوۆ كوشەسى تۇسىنان شىعىس اينالما جولىنا دەيىن ۇزارتۋ جۇمىستارى جۇرگىزىلىپ جاتىر. سونىمەن قاتار، 100 دەن استام جەر ءۇستى جانە جەر استى وتكەلدەرى سالىندى. بۇل ارينە جاياۋ جۇرگىنشىلەردىڭ قاتىسۋىمەن بولاتىن جول-كولىك اپاتتارىن ازايتۋعا سەپتىگىن تيگىزەدى»، - دەدى ا. ەسىموۆ.

اۆتور: جاپپاربەرگەن ايبوتا