ورال ماڭىندا ۇشقىشسىز ۇشاتىن اپپارات كوككە كوتەرىلدى - فوتو
«مير ماسەل» ج ش س ديرەكتورى اباي رىسقاليەۆتىڭ ايتۋىنشا، ماسكەۋ وبلىسى ەگوريەۆسك قالاسىنداعى «قولدانبالى ەلەكتروديناميكا عىلىمي ورتالىعى» ا ا ق- دا تاجىريبە رەتىندە قۇراستىرىلعان اپپاراتتاردىڭ تەحنيكالىق مۇمكىندىگىن ماماندار اشىق دالادا العاش رەت سىناپ كوردى.
اتالمىش اپپاراتتى مەملەكەتتىك شەكارانى قورعاۋ، قۇقىق ءتارتىبىن قامتاماسىز ەتۋ، لاڭكەستىككە قارسى شارالار جانە توتەنشە جاعدايلار مەن ولاردىڭ زارداپتارىن جويۋ، سونىمەن قاتار قورشاعان ورتاعا مونيتورينگ جۇرگىزۋ، اەروسۋرەتكە ءتۇسىرۋ، قۇبىرلار مەن ەگىستەردى، ورماندار مەن مالدى قاراۋ كەزىندە قولدانۋعا بولادى.
سالماعى 20-25 كەلى بولاتىن، پۋلتپەن باسقارىلاتىن اپپاراتتارعا بەينە نەمەسە فوتوكامەرا، تەپلوۆيزور جانە باسقا قاجەتتى تەحنيكا ورناتىلادى. ولار مىڭ شاقىرىمعا دەيىن ۇشا الادى. بۇل اپپاراتتاردى ورالداعى «ومەگا» زاۋىتىنىڭ بازاسىندا سەريالى تۇردە شىعارۋ كوزدەلۋدە.
ەسكە سالا كەتەيىك، وتكەن جىلدىڭ جەلتوقسانىندا «مير ماسەل» ج ش س مەن «ومەگا» پريبور جاساۋ زاۋىتى اراسىندا كاسىپورىن بازاسىندا اپپاراتتى قۇراستىرۋ باعىتىندا ىنتىماقتاستىق جونىندە مەموراندۋمعا قول قويىلىپ، سەرۆيستىك ورتالىق ۇيىمداستىرىلعان بولاتىن. كومپوزيتسيالىق ماتەريالدار مەن ەلەكترونيكا رەسەيدەن اكەلىنسە، قازاقستاندىقتار ونى قۇراستىرىپ، جينايدى. جوبا بويىنشا باستاپقىدا جەرگىلىكتى ۇلەس 20-30 پايىز توڭىرەگىندە بولماق، ۋاقىت وتە بۇل كورسەتكىش ەسەلەنەدى.
ماماندار دايارلاۋعا دا ەگوريەۆسك ازاماتتىق اۆياتسيا كوللەدجىمەن كەلىسىم جاسالعان. اپپاراتتىڭ، اسىرەسە، اۋىل شارۋاشىلىعى سالاسى، شەكارا قىزمەتىندە جانە توتەنشە جاعدايلاردىڭ الدىن الۋدا تيىمدىلىگى جوعارى. ءتىپتى ادام اياعى جەتە المايتىن جەرلەرگە دە اۋەدە قالىقتاپ بارا الادى.
ۇشقىشسىز اپپاراتتاردى سەريالى تۇردە ءوندىرۋ ءىسى رەسەي، ا ق ش جانە يزرايلدە جولعا قويىلعان. ءبارى ويداعىداي بولسا، قازاقستان مۇنداي اپپارات شىعاراتىن ءتورتىنشى ەل اتانباق.
