الماتى وبلىسىندا ەرەكشە مۇراجاي تانىمال بولۋدا

تالدىقورعان. قازاقپارات - الماتى وبلىسىنىڭ قاراساي اۋدانى رايىمبەك اۋىلىندا ەلىمىزدە تەڭدەسى جوق «اناعا قۇرمەت» مۋزەيى جۇمىس ىستەيدى.

اشىلعانىنا ءبىر جىلدان ەندى عانا اسقان مۋزەي وڭىردەگى تانىمال نىسانداردىڭ بىرىنە اينالدى، دەپ حابارلايدى الماتى وبلىسى اكىمنىڭ باسپا ءسوز قىزمەتىنەن.

قوس قاباتتى عيماراتتىڭ جالپى اۋماعى 750 شارشى مەتردى الىپ جاتىر. مۋزەيدى قۇرۋ تۋرالى باستامانى وسى نىساننىڭ ديرەكتورى باقىت شپەكبايەۆا كوتەرگەن بولاتىن. سول سەبەپتى دە كوپتەگەن ەكسپوناتتاردى ول ءوز قولىمەن جيناقتاعان.

بۇگىنگى كۇنى مۋزەيدە 500 دەن استام ءتۇرلى زاتتار، اتاپ ايتقاندا، ەلىمىزگە تانىمال ايەلدەرگە قاتىستى ءتۇرلى ماتەريالدار، قۇجاتتار، فوتوسۋرەتتەر، كارتينالار، تۇرمىستىق بۇيىمدار بار. وسىلاردىڭ كوپشىلىگى - وبلىس تۇرعىندارىنىڭ ءوز نيەتىمەن مۋزەيگە اكەلىپ تاپسىرعان زاتتارى.

مۋزەي جانىنان قويىلعان «اناعا تاعزىم» ەسكەرتكىشى، اسىرەسە، جاس وتاۋ يەلەرىنىڭ نەكە قيار ساتىندە ارنايى كەلەر كيەلى ورنىنا اينالعان.

مۋزەي قىزمەتكەرلەرىنىڭ ايتۋىنشا، ولار اپا- اجەلەرىمىزدىڭ ءومىر سالتى مەن تاريحى تۋرالى ايتىپ قانا قويماي، وتباسى قۇندىلىقتارىنا دەگەن قۇرمەت سەزىمىن قالىپتاستىرۋعا ىقپال جاساۋدى ماقسات ەتىپ وتىر.