سارى اعاشتا زاماناۋي كۋرورتتىق قالاشىق سالىنادى

شىمكەنت. قازاقپارات - وڭتۇستىك قازاقستان وبلىسىنىڭ اكىمى ا. مىرزاحمەتوۆ سارى اعاش كۋرورتتىق ايماعىندا جەرگىلىكتى كاسىپكەرلەرمەن كەزدەستى، دەپ حابارلايدى ءوڭىر باسشىسىنىڭ باسپا ءسوز قىزمەتى.

بۇگىندە سارى اعاش دەمالىس ايماعىن حالىقارالىق دەڭگەيگە جەتكىزۋ ماقساتىندا جاڭا جوبا ازىرلەنۋدە. تىڭ جوبا اياسىندا وزىندىك ساۋلەتتىك كەلبەتى قالىپتاساتىن 600 گەگتار اۋماقتا تىنىعۋشىلار ءۇشىن دەمالىپ-ساۋىعۋعا ىڭعايلى جالپى 1500 ورىندىق زاماناۋي ستاندارتقا ساي كۋروتتىق قالاشىق بوي تۇزەيدى.

بۇل ءۇشىن كاسىپكەرلەر جەكە-دارا وقشاۋلانباي جۇدىرىقتاي جۇمىلىپ، بىرلەسە جۇمىس جاساۋى كەرەك. كوگالداندىرۋ مەن باسسەيندەر قۇرىلىسىن باستاۋعا وبلىس قازىناسىنان قارجى ءبولىنىپ، كاسىپكەرلەرگە قولداۋ كورسەتىلەدى. سونداي-اق، اۋماقتا ينفراقۇرىلىم تارتىلىپ، ارنايى سۋ جۇيەلەرى سالىنباق. الداعى ۋاقىتتا شىمكەنتتەگى جاڭا اۋەجاي مەن تەمىرجول، اۆتوۆوكزال كۋرورتتىق ايماقتى دامىتۋعا تىڭ سەرپىن بەرىپ، سارى اعاشقا جۇردەك پويىزدار مەن ارنايى اۆتوبۋستار قاتىنايدى.

جيىن بارىسىندا ىسكەر ازاماتتارعا وسى جوبا كەڭىنەن تانىستىرىلىپ، ولار اتالعان جوسپارعا ەرەكشە قىزىعۋشىلىق تانىتتى. وسىنداعى كەيبىر كاسىپكەرلەردىڭ مينەرالدى سۋلاردى باسسەيندەرگە قولداناتىنىن جەتكىزگەن ءوڭىر باسشىسى مۇنىڭ دۇرىس ەمەستىگىنە ايرىقشا توقتالدى. ءوز كەزەگىندە كاسىپكەرلەر كارىز جۇيەلەرىن سالۋعا كومەك سۇرادى. ال ولار ايتقان بۇيىمتاي مەن وزگە دە تىڭ باستامالار جوبادا جان-جاقتى قاراستىرىلعان. ەندى سارى اعاشتاعى شيپالى سۋ ءار ساناتوريگە جەكە-جەكە تاسىمالدانباي ورتالىقتاندىرىلعان جۇيە ارقىلى تاراتىلماق. سونىمەن قاتار، ەمدىك-ساۋىقتىرۋ ورىندارى مەن كۋرورت اۋماعىندا بالالارعا ارنالعان اتتراكتسيوندار سالۋ، ساۋدا قاتارلارىن شىعىس ستيلىندە قايتا قۇرۋ دا قاراستىرىلعان. وسى جانە وزگە دە جايتتارعا كەڭىنەن توقتالعان ا. مىرزاحمەتوۆ كاسىپكەرلەرگە تەك وبلىس ەمەس رەسپۋبليكامىز ءۇشىن ماڭىزدى جوبانى بىرلەسىپ جۇزەگە اسىرۋعا شاقىردى.

ال بۇل باستاماعا كاسىپكەرلەر ءبىراۋىزدان كەلىسىمىن بەردى. ارنايى جۇمىس توبى قۇرىلىپ، وعان وبلىس اكىمىنىڭ ورىنباسارى س. تۇياقبايەۆ جەتەكشىلىك ەتەتىن بولدى. دەمالۋشىلار ءۇشىن قولعا الىناتىن جوبانىڭ العاشقى كەزەڭى بيىل باستالماق. وسىلايشا بيلىك تاراپىنان قولعا الىنعان تىڭ تىرلىكتىڭ ارقاسىندا سارى اعاشتىڭ برەندكە اينالعان شيپالى سۋى وڭتۇستىككە تۋريستەردى كوپتەپ تارتۋعا زور مۇمكىندىك اشپاق.