قازاق تاريحى ءۇشىن ەڭ قۇندى دۇنيە - م. ح. دۋلاتيدىڭ «تاريحي ءراشيديى»: ءا. اسقاروۆ

استانا. قازاقپارات - قازاق تاريحى ءۇشىن ەڭ قۇندى دۇنيە - مۇحاممەد حايدار دۋلاتيدىڭ ەڭبەگى.

ويتكەنى، وسىدان 550 جىل بۇرىن قازاق حاندىعىنىڭ قۇرىلعاندىعى تۋرالى دەرەك ازىرشە تەك «تاريحي راشيدي» قولجازباسىندا عانا كەزدەسەدى. بۇگىن ورتالىق كوممۋنيكاتسيالار قىزمەتىندە وتكەن بريفينگ بارىسىندا ق ر ۇلتتىق كىتاپحاناسىنىڭ ديرەكتورى الىبەك اسقاروۆ وسىنداي پىكىر ءبىلدىردى.

ەسكە سالا كەتەيىك، بريفينگ «ەلدىڭ تاريحى مەن مادەنيەتى - بولاشاعى تۇتاس ۇلت» تاقىرىبىندا وتكەن بولاتىن.

كىتاپحانا ديرەكتورىنىڭ ايتۋىنشا، ق ر مادەنيەت جانە سپورت مينيسترلىگى مۇحاممەد حايدار دۋلاتيدىڭ «تاريحي راشيدي» اتتى قولجازباسىن پارسى تىلىنەن قازاقشاعا اۋدارىپ، كىتاپ ەتىپ جارىققا شىعارعان.

«بۇل كىتاپ قازاقتىڭ مادەني ومىرىندەگى ايتۋلى جاڭالىقتىڭ ءبىرى. بۇعان دەيىن دۋلاتي قولجازباسى ورىس تىلىنەن قازاقشاعا اۋدارىلعان بولاتىن. الايدا اۋدارمادا كوپتەگەن تۇسىنبەستىكتەر، كونە اتاۋلار مەن اتتاردىڭ قاتە جازىلۋى، كەيدە ادەيى بۇراتارتۋشىلىق تولىپ جۇرگەندىگى بەلگىلى بولدى. وسى رەتتە قازاق عالىمدارى تاراپىنان ۇلكەن تالقىلاۋ ورىن الدى. قازىر «قازاق حاندىعىنا 550 جىل» دەپ جاتىرمىز. ءبىراق ءبىز وسى دەرەكتى قايدان الدىق؟ ول دەرەكتى مۇحاممەد حايداردىڭ وسى قولجازباسىنان الدىق. باسقا ەشقانداي جازبالاردا قازاق حاندىعىنىڭ قۇرىلعاندىعى جايىندا دەرەك كەزدەستىرىلگەن جوق. بۇل كىتاپتىڭ قازاق ءۇشىن ماڭىزى دا وسىندا جاتىر»، - دەدى الىبەك اسقاروۆ.