قازاقستان دۇنيەجۇزىلىك ساۋدا ۇيىمىنا كىرگەننەن كەيىن دە اۋىل شارۋاشىلىعى سالاسىنا كورسەتىلەتىن مەملەكەتتىك كومەك قىسقارمايدى - ج. ايتجانوۆا
بۇل تۋرالى قازاقستاندىق ب ا ق وكىلدەرىنە سۇحبات بەرگەن ق ر ەكونوميكالىق ينتەگراتسيا ىستەرى جونىندەگى ءمينيسترى جانار ايتجانوۆا ءمالىم ەتتى.
«مەملەكەت تاراپىنان اۋىل شارۋاشىلىعى سالاسىنا كورسەتىلەتىن كومەكتى قىسقارتپايمىز جانە وسى سالاعا ينۆەستيتسيا كەلۋىنە ىقپال ەتەتىن بولامىز. مۇنان بولەك، قىزمەت كورسەتۋ سالاسىن، قارجى، تەلەكوممۋنيكاتسيا سەكتورلارىن ءارى قاراي ىرىقتاندىرۋ نەمەسە بيزنەستى جۇرگىزۋگە جەڭىلدىكتەر جاسالادى. ناقتى ايتقاندا، سول سەكتورلارعا، سول سالالارعا تىكەلەي ينۆەستيتسيالاردىڭ كەلۋىنە ىقپال ەتىلەدى»، - دەدى مينيستر.
ونىڭ اتاپ وتۋىنشە، ەلىمىزدە شەتەلدىك ينۆەستورلاردىڭ تەك قانا قارجىسى ەمەس، سونىمەن بىرگە تەحنولوگيالارىنىڭ كەلۋىنە دە بارلىق مۇمكىندىك جاسالادى. ال بۇل شارالار قازاقستان نارىعىندا قازىرگى كۇنى جۇمىس ىستەپ جاتقان كومپانيالاردىڭ باسەكەلەستىككە قابىلەتتىگىن ارتتىرا تۇسەدى.
«ويتكەنى باسەكەلەستىك بولماسا، دامۋ جوق. سوندىقتان بۇل جەردە، ياعني قارجى، تەلەكوممۋنيكاتسيا سالالارىندا باسەكەلىستىك ءارى قاراي كۇشەيە تۇسەدى»، - دەدى ج. ايتجانوۆا.
ايتا كەتەيىك، كەشە دۇنيەجۇزىلىك ساۋدا ۇيىمى باس كەڭەسىنىڭ وتىرىسىنىڭ قورىتىندىسىندا ق ر پرەزيدەنتى نۇرسۇلتان نازاربايەۆ پەن د س ۇ باس ديرەكتورى روبەرتو ازيەۆەدو قازاقستاننىڭ دۇنيەجۇزىلىك ساۋدا ۇيىمىنا قوسىلۋى تۋرالى حاتتاماعا قول قويعان بولاتىن.
اۆتور: مارلان جيەمباي
