قازاقستاندا سوڭعى ون جىلدا ەلۋگە تارتا كەن ورىندارى اشىلعان
بۇل تۋرالى بۇگىن ورتالىق كوممۋنيكاتسيالار قىزمەتىندە وتكەن بريفينگ بارىسىندا ەنەرگەتيكا ءبىرىنشى ۆيتسە-ءمينيسترى ۇزاقباي قارابالين ءمالىم ەتتى. بريفينگ ەلباسى ايقىنداعان «100 قادام» ۇلت جوسپارى اياسىندا جەر قويناۋىن پايدالانۋ سالاسىنداعى ىلگەرى رەفورمالار تاقىرىبىندا وتكەن بولاتىن.
«1996-2014-جىلدار ارالىعىندا ەلىمىزدەگى گەولوگيالىق بارلاۋ جۇمىستارىنا جۇمسالعان شىعىندار ءاربىر شارشى/شاقىرىمعا 3 دوللاردان كەلگەن بولاتىن. بۇل دامىعان ەلدەرگە قاراعاندا ايتارلىقتاي تومەن كورسەتكىش جانە ءبىز از زەرتتەلگەن اۋماقتاردىڭ شارشى/شاقىرىمىنا شامامەن 0,2 دوللار جۇمساپپىز. وسىلايشا، قازاقستاننىڭ اۋماعىندا گەولوگيالىق زەرتتەۋلەر، بارلاۋلار وتە از جۇرگىزىلگەن بولىپ وتىر. وسىنىڭ سالدارىنان ەلىمىزدىڭ از زەرتتەلگەن اۋماقتارىنىڭ ينۆەستيتسيالىق تارتىمدىلىعى تومەن بولىپ تابىلادى. ال سوڭعى ون جىلدا گەولوگيالىق بارلاۋدا بەلگىلى ءبىر ىلگەرىلەۋشىلىك بولعانىنا قاراماستان، ەلىمىزدە ءىرى كەن ورىندارىنىڭ اشىلماۋ فاكتىسى دە وسى ينۆەستيتسيالىق تارتىمدىلىقتىڭ تومەندىگىن اڭعارتسا كەرەك. ماسەلەن، سوڭعى ون جىلدا «ا+ب+س1» ساناتىندا 164 ميلليون توننا جانە «س2» ساناتىندا 169 ميلليون توننا قورلارى بار 50 گە تارتا كەن ورىندارى اشىلدى»، - دەيدى ۇ. قارابالين.
ونىڭ ايتۋىنشا، قازىرگى تاڭدا قازاقستاندا جاڭا اۋقىمدى كەن ورىندارىن اشۋ ءۇشىن گەولوگيالىق بارلاۋ جۇمىستارىنا ينۆەستيتسيالار تارتۋ ماسەلەسى وزەكتى بولىپ تابىلادى.
اۆتور: قانات مامەتقازى ۇلى
