الماتىدا تۇڭعىش رەت قالالىق زووباققا ارنالعان فوتوكورمە اشىلدى - فوتو
كورمەنىڭ اۆتورى، بەلگىلى قازاقستاندىق فوتوگراف ميحايل سوروكوۋموۆتىڭ ايتۋىنشا، بۇل كورمەدە ول جانۋارلاردىڭ ءار ءتۇرلى مىنەزدەرىن كورسەتۋگە تىرىسقان.
«جانۋارلاردىڭ دا مىنەزى بولادى. ولار دا جاقسى كورۋ، جەك كورۋ، مەيىرىمدى بولۋ قابىلەتتەرىنە يە. مەن وسى سۋرەتتەرىم ارقىلى جانۋارلار الەمىنىڭ قىر-سىرىن، ءمانىن اشا تۇسكىم كەلدى»، - دەدى م. سوروكوۋموۆ.
سونىمەن قاتار فوتوگراف تابيعاتتىڭ نازىك ەكەندىگىن ايتا كەلە، ونى ايالاۋ كەرەكتىگىن ايتتى.
«زۋبر (جابايى وگىز)، پرجيەۆالسكي جىلقىسى سەكىلدى جانۋارلار وسى زووباقتاردىڭ ارقاسىندا ساقتالىپ قالعان. ءبىراق وكىنىشكە قاراي، قازىردىڭ وزىندە جابايى جانۋارلاردىڭ قۇرىپ بارا جاتقاندىعىن مويىنداۋىمىز كەرەك. وسى عاسىردىڭ سوڭعى 15-جىلى ىشىندە گالاپاگوس ارالدارىندا ءومىر سۇرگەن ابينگدوندىق ءپىل تاسباقاسى، پيرەنەي تاۋلارىندا ءومىر سۇرگەن بۋكاردو تاۋ تەكەسى، تەڭبىلدى جاسىل كەپتەر جانە قىتايلىق وزەن دەلفينى جەر بەتىنەن جويىلىپ كەتتى. سوندىقتان تابيعاتتى ايالاپ، جابايى جانۋارلاردى ساقتاي ءبىلۋىمىز كەرەك»، - دەدى كورمە اۆتورى.
