پاۆلودارلىق كاسىپكەر كيىز باسۋدا بىرەگەي تەحنولوگيانى قولدانادى - فوتو
شارۋانىڭ كيىز باسۋمەن اينالىسىپ كەلە جاتقانىنا 10 جىلدان استام ۋاقىت ءوتىپتى. رۋسلان مۇستافينوۆتىڭ ايتۋىنشا، بۇگىنگى كۇنى سەحتا جاسالاتىن پيماعا بىرەگەي تەحنولوگيا قولدانىلادى. ويتكەنى ول ەكولوگيالىق تۇرعىدان تازا اياق كيىم ءوندىرۋ تەحنولوگياسى ەلىمىزدىڭ ەشبىر وڭىرىندە قولدانىلمايدى.
«ءبىزدىڭ اياق كيىم «سۋعا باتپايدى، وتقا جانبايدى» دەپ اۋىز تولتىرىپ ايتا الامىن. سەبەبى ءبىز قويدىڭ كۇزەم ءجۇنىن پايدالانامىز. ءتوزىمدى ماتەريالدىڭ ارقاسىندا پيما سۋىقتى جىبەرمەي، ءتىپتى، ورتتەن دە قورعايدى»، - دەيدى شەبەر.
بۇگىندە رۋسلان مۇستافينوۆ كاسىپورنىنىڭ ماتەريالدىق-تەحنيكالىق بازاسىن بارىنشا كەڭەيتكەن. وسىدان ءبىرشاما ۋاقىت بۇرىن كاسىپكەر رەسەيدىڭ التاي ولكەسىنەن قۇنى 1,5 ميلليون تەڭگە تۇراتىن كيىز باسۋ قۇرال-جابدىقتارىن ساتىپ الىپتى. سونىمەن قاتار، رەسەدەن 7 ميلليون تەڭگەنىڭ ستانوگىن اكەلىپ، جۇمىسىن جانداندىرا تۇسكەن.
كيىز باسۋدىڭ قىر-سىرىن مەڭگەرگەن اۋىل ازاماتى اتا-بابادان مۇرا بولعان كاسىپتىڭ قۇپيالارىمەن ءبولىستى.
«قويدىڭ ءجۇنى «جاباعى»، «كۇزەم ءجۇنى»، «قوزى ءجۇنى»، «ءولى ءجۇن» جانە «شەت-پۇشپاق» دەگەن تۇرلەگە بولىنەدى. قويدىڭ جاباعى جۇنىنەن شاپاندار، جەڭىل بايپاق تىگىلەدى. جاباعى ءجۇندى كيىمنىڭ، كورپەنىڭ اراسىنا سالادى جانە توقىما جاساۋدا قولدانىلادى. ال كۇزەم جۇنىنەن، قوزى جۇنىنەن كيىز باسىلادى، ودان تەكەمەت تە جاسالادى. كيىز ەتىك، پيما سياقتى اياق كيىمدەر جاسالادى. قوي ءجۇنىن الدىمەن كىرىنەن مۇقيات تازارتامىز، كەيىن باسامىز. بۇل ىسپەن 20 عا جۋىق مامان اينالىسادى»، - دەيدى ر. مۇستافينوۆ.
قازىرگى تاڭدا شارۋانىڭ تاۋارى ورتالىق جانە شىعىس قازاقستان، سونداي-اق استانا قالالارىنىڭ تۇرعىندارى تاراپىنان جوعارى سۇرانىسقا يە. بۇگىننىڭ وزىندە كەنجەكولدىك كاسىپكەرگە اتالمىش وڭىرلەردەن 1000 پيماعا تاپسىرىس تۇسكەن. مۇندا، سونداي-اق، بالىقشىلار، اڭشىلار كيەتىن رەزينالى اياق كيىمدەردىڭ ىشىنە كيىز بايپاق تىگىلەدى.
رۋسلان مۇستافينوۆ ەكولوگيالىق تازا اياق كيىمگە قاجەت شيكىزاتتى، ياعني ءجۇندى ەرتىس، باياناۋىل جانە اقتوعاي اۋداندارىنان جينايدى. جىلىنا 100-110 توننا ءجۇن پايداعا جاراتىلادى.
«ءدال قازىر بايدالا اۋىلىندا شاعىن كيىز باسۋ سەحى بوي كوتەرۋدە. جاڭا عيمارات ۇستىمىزدەگى جىلدىڭ قىركۇيەك ايىندا پايدالانۋعا بەرىلەدى. ەلباسى نۇرسۇلتان نازاربايەۆ وزىمىزدە جاسالعان تاماق، كيىم-كەشەكتەردى كەڭىنەن پايدالانۋ قاجەتتىگىن ءجيى ايتادى. وتە ورىندى. ەلىمىزدە پيما باساتىن، ءجۇن ءيىرىپ، باسقا دا ونىمدەر وندىرەتىن ءىرى كاسىپورىن، زاۋىتتار بار. ولار شيكىزاتتى شەت ەلدەردەن تاسىماي، ءبىز سەكىلدى كاسىپكەرلەردەن السا، پايداسى زور بولارى ءسوزسىز. وتاندىق برەند دەگەن وسىدان شىعادى. ويتكەنى ءبىز شيكىزاتتىڭ تابيعي قالپىن ساقتاپ، ەكولوگيالىق تازا ءونىمدى قولدانۋدى ناسيحاتتايمىز، - دەيدى ر. مۇسافينوۆ.
اقمارال ەسىمحانوۆا،
فوتو: اۆتور
