تۇيەقۇس وسىرگەن كاسىپكەر ەندى قوداستى قولعا الماق

شىمكەنت. قازاقپارات - تروپيكالىق ايماقتا وسەتىن تۇيەقۇستار تاۋ بوكتەرىندە ورنالاسقان تۇلكىباس اۋدانىندا وسىرىلە باستادى.

افريكا قۇرلىعىنان ءوربيتىن تۇيەقۇستى اۋدانعا «نۇرلىحان» شارۋاشىلىعى الىپ كەلدى، دەپ حابارلايدى و ق و اكىمىنىڭ باسپا ءسوز قىزمەتى.

كاسىپكەر ءونىمى جاقسى سۇرانىسقا يە تۇيەقۇستىڭ بەس جۇبىن الماتى قالاسىنداعى شارۋاشىلىقتان ساتىپ العان. قالدىقسىز ءونىم شىعاراتىن بۇل تۇيەقۇستاردىڭ بويى 2-3 مەتر كەلەدى. ال، اتالىعىنىڭ ەتى 100-150 كەلىگە دەيىن جەتسە، ونىڭ تەرىسىنىڭ بەرىكتىگى ءپىل مەن قولتىراۋىننىڭ تەرىلەرىنە پارا-پار كەلەدى. ونى اياق كيىمدەردى قاپتاۋعا، باسقا دا ساندىك بۇيىمداردى جاساۋعا پايدالانادى. سونداي-اق، ساعاتىنا 60-70 شاقىرىمدى جۇگىرىپ وتەتىن تۇيەقۇس قۇس اتاۋلىنىڭ ىشىندەگى ەڭ جىلدامى. ەتى ەم رەتىندە پايدالى، اسىرەسە، قان قىسىمى جانە قانت ديابەتىمەن اۋىراتىندار ءۇشىن مىڭ دا ءبىر ەم. سوندىقتان، تۇيەقۇسقا قىزىعۋشىلىق ۋاقىت وتكەن سايىن ارتۋدا دەگەن كاسىپكەر الداعى ۋاقىتتا تۇيەقۇستار اكەلىپ شارۋاشىلىقتى كەڭەيتۋدى جوسپارلاپ وتىر.

سونداي-اق، «نۇرلىحان» شارۋاشىلىعى الما باۋى مەن بالىق شارۋاشىلىعىن دامىتسا، الداعى كۇنى سيىر تۇقىمداس قوداس جانۋارىن باعۋدى كوزدەپ وتىر.