بولمە سالقىنداتقىشى ءتۇرلى اۋرۋلاردى قوزدىرادى

استانا. قازاقپارات - بولمەنى جازدا سالقىنداتىپ، جەلدەتىپ، ال قىستا جىلىتاتىن بولمە سالقىنداتقىشىنىڭ ادام دەنساۋلىعىنا تيگىزەر زيانى كوپ ەكەنىن ءجيى ەستىپ جاتامىز.

 

ال، ونىڭ ناقتى قانداي اۋرۋلار تۋدىراتىنىن كوپشىلىگىمىز بىلە بەرمەيتىنىمىز راس. اسىرەسە، كونديتسيونەر جۇيەسىمەن جابدىقتالعان ۇلكەن عيماراتتاردى جەلدەتۋ جۇيەلەرىندەگى ميكرواعزالار وسى عيماراتتا كوپ ۋاقىتىن وتكىزەتىن ادامداردىڭ وكپە اۋرۋى مەن باسقا دا دەرتكە شالدىعۋىنا سەبەپ بولادى.

سالقىنداتقىش كەڭسە نەمەسە بولمە ىشىنە قۇرعاق ميكروكليمات ورناتادى. العاشىندا كونديتسيونەردىڭ قىزمەتى قوڭىر سالقىن كليمات سىيلاۋ ەمەس، ىلعالدىلىقپەن كۇرەسۋ بولعان. ۇنەمى جەلدەتكىش قوسۋلى تۇرعان بولمەدە وتىرساڭىز، مۇرنىڭىز بەن تاماعىڭىزدىڭ قۇرعاپ قالاتىنى سودان. سالقىن قۇرعاق اۋا تىنىس الۋ ورگاندارىنىڭ اۋرۋىنا نەمەسە انگينانىڭ اسقىنۋىنا اكەلىپ سوقتىرۋى مۇمكىن.

كونديتسيونەر سونداي-اق، بولمەدە كومىرقىشقىل گازىن كوبەيتەدى. قازىرگى تاڭدا سپليت-جۇيەلەر دەپ اتالاتىن ەكى بولىكتەن تۇراتىن كونديتسيونەرلەر ۇلكەن سۇرانىسقا يە. مۇنداي قوندىرعىنىڭ ءبىر بولىگى دالادا، ءبىر بولىگى بولمەدە ورنالاسادى. ولار توڭازىتقىش سەكىلدى جۇمىس ىستەيدى. ولار بولمەدەگى اۋا تەمپەراتۋراسىن لەزدە تومەندەتكەندە وتتەگى ازايىپ، كومىرقىشقىل گازى كوبەيەدى ەكەن. سالدارىنان اۋا جەتىسپەۋشىلىگى اقىل-وي قىزمەتىنە تىكەلەي اسەر ەتىپ، قان اينالۋ پروتسەسىن باسەڭدەتەدى.

كونديتسيونەردىڭ سۇزگىسىن ۋاقىتىلى اۋىستىرماساڭىز بولمە ىشىنە شاڭ-توزاڭ تاراتادى. جاڭا سۇزگى ورناتقان كۇننىڭ وزىندە ىشىندە قالىپ كەتكەن شاڭ توزاڭ اۋاعا تەز تارايدى. اللەرگياسى بار ادامنىڭ كونديتسيونەردىڭ سالقىنىنان كوزى جاساۋراپ، تاماعى قىشىپ، مۇرنى بىتەدى.

Baq.kz