ۇلىلارمەن سۇحبات

استانا. قازاقپارات - «ۇلىلارمەن سۇحبات» ۇلتتىق مۋزەيدە «الەمدىك مادەنيەت جانە زاماناۋي ونەر» جوباسى اياسىندا « ۇلىلارمەن سۇحبات» اتتى كورمە اشىلدى.

 وعان Parallel Worlds شىعارماشىلىق توبىنا بىرىككەن  ⅩⅩ عاسىردىڭ 70-80 -جىلدارىنداعى پەتەربورگتىق جانە ماسكەۋلىك كەسكىندەمە مەكتەبىنىڭ 19 كورنەكتى وكىلىنىڭ 90 نان استام جۇمىسى قويىلدى.

- ءبىز رەسەي سۋرەتشىلەرىمەن بىرلەسە جۇمىس ىستەۋ جوباسىن ودان ءارى جالعاستىرا بەرەمىز. ەۋرازيالىق ەكونوميكالىق وداق دەگەنىمىز تەك قانا ەكونوميكالىق بايلانىس ەمەس، ول رۋحاني تۇرعىدان دا ءبىزدىڭ قارىم- قاتىناسىمىزدى جەتىلدىرە تۇسەدى.

بىزگە جاڭا زاماناۋي ونەر مەن جاڭا يدەيالار تۇرعىسىنان تاجىريبە الماسۋدىڭ دا بەرەرى مول. بۇگىن ۇلتتىق مۋزەيگە بۇعان دەيىن اتى- جوندەرىن عانا ەستىگەن رەسەيدىڭ تالانتتى سۋرەتشىلەرىنىڭ ەڭبەكتەرى كەلىپ وتىر. ءبىز ولاردىڭ تۋىندىلارىنان جاڭاشا ىزدەنىستى، باسقاشا ءتاسىل مەن ءتۇردى كورىپ وتىرمىز.

ونەر مەن مادەنيەت ەكى ەلدىڭ اراسىنداعى ۇلى كوپىر. سول كوپىر ارقىلى ءبىز ءبىر- ءبىرىمىزدى جەتە تانىپ، ءتۇسىنىپ، بايلانىسىمىزدى نىعايتا بەرەمىز دەگەن سەنىمدەمىن، - دەدى ۇلتتىق مۋزەيدىڭ ديرەكتورى دارحان مىڭباي.

 «ۇلىلارمەن سۇحبات» كورمەسى شىعارماشىلىق رەمينيستسەنتسيانى نەگىزگە العان. ياعني سۋرەتشىلەر بۇرىنعى اۆتورلاردىڭ ايگىلى تۋىندىلارىنا سىلتەمە جاساي وتىرىپ، ولارعا زاماناۋي تەحنولوگيالار ارقىلى ينتەرپرەتاتسيا جاساعان. شىعارماشىلىق وڭدەۋ ناتيجەسىندە، جاڭا كەيىپتەگى كوركەم تۋىندىلار پايدا بولعان.

 كورمە رەسەيلىك بيزنەسمەن ءارى مەسەنات يۋري ساۋليدي جەتەكشىلىك ەتەتىن «پەتەربورگتىڭ ەرىكتى سۋرەتشىلەرى» الەۋمەتتىك- باسپا جوباسىنىڭ قولداۋىمەن ۇيىمداستىرىلدى. مۋزەيگە كەلۋشىلەر كورمەدەن ارحايكادان بۇگىنگى كۇنگە دەيىنگى ەجەلگى داۋىرلەردەگى «كوركەم ماتىندەرگە» شىعارماشىلىق وڭدەۋ نەگىزىندە جاسالعان كوركەم تۋىندىلاردى تاماشالادى.

- قازاقستان قارقىندى مادەني دامۋ ۇستىندە. سىزدەر قازىرگى زامانعى ونەر سالاسىندا دا دامىپ كەلە جاتىرسىزدار. ءبىز قازاقستاندىق ارىپتەستەرىمىزبەن وتە تىعىز ارالاسامىز. ماسكەۋ مەن سانكت- پەتەربورگتە كوپتەگەن شەتەلدىك كورمەلەر وتەدى، ءبىز قازاقستاندىق ونەر تۋىندىلارىنىڭ كورمەلەرىن اسىعا كۇتەمىز.

رەسەيدىڭ ەڭ ءىرى مۋزەيلەرى، سونىڭ ىشىندە ەرميتاج بەن ترەتياكوۆ گالەرەياسى قازاقستان سۋرەتشىلەرىنىڭ كورمەلەرىنە ءوز الاڭدارىن ۇسىنۋعا ءازىر، - دەدى باسقوسۋدا رەسەيدىڭ مادەنيەت تاريحشىسى، ونەرتانۋ دوكتورى، اقىن دميتري سيەۆەريۋحين.

 ايتا كەتەيىك، وسى تەكتەس كورمەلەر ۇلتتىق مۋزەيدە قىركۇيەك ايىندا دا ۇيىمداستىرىلادى. ال «ۇلىلارمەن سۇحبات» كورمەسى استانادان سوڭ الماتىدا وتكىزىلەدى.

«ايقىن»