قىتايدا كولىك نارىعى توقىراي باستادى
جارتى جىلدىق قورىتىندىسى نەمىس اۆتوكونتسەرنىمەن قوسا امەريكالىق General Motors الپاۋىتىنىڭ دا ءۇمىتىن اقتاعان جوق. قىتاي ەكونوميكاسىنىڭ دامۋ قارقىنى باسەڭدەپ، بۇل ءۇردىس شەتەلدىك كولىك جاساۋشىلاردىڭ قالتاسىن قاعا باستادى.
Volkswagen تابىسىنىڭ 71 پايىزىن، ال General Motors بىلتىرعى كىرىسىنىڭ 40 پايىزىن وسى قىتاي نارىعىنان تابادى. ەندى مۇنداي كول-كوسىر پايدا كوزدەن بۇل-بۇل ۇشاتىن ءتۇرى بار.
نيك پارسونس، اۆستراليانىڭ ۇلتتىق بانكىنىڭ وكىلى:
- قىتايداعى جاعداي سونشالىقتى ناشار دەۋگە كەلمەيدى. باياۋ بولسا دا، ەل ەكونوميكاسىندا قارقىن بار. راس، قور نارىعىندا باعانىڭ تومەندەيتىنىنە ەش كۇمان جوق. سوندىقتان تۇتىنۋشىلار ساتىپ الۋ جوسپارىن كەيىنگە شەگەرەتىنى زاڭدى. قىتاي - الەمدەگى ەڭ ءىرى اۆتونارىق. سوندىقتان مۇنداعى بولماشى وزگەرىستىڭ سالدارى زور بولۋى مۇمكىن. جەرگىلىكتى ۇكىمەت ماسەلەنى شەشۋدىڭ وڭتايلى جولدارىن ىزدەۋدە. بەيجىڭدە ءسان قۋىپ، قىمبات كولىك الۋدىڭ زامانى ءوتىپ بارادى. جۇرت شەتەلدىك ماركالارعا قىزىقپاي، جەرگىلىكتى ارزان تەمىر تۇلپارلاردى الا باستادى.
ال بۇل BMW، Mercedes, Daimler سياقتى كولىك وندىرۋشىلەرگە سوققى بولىپ تيۋدە. Audi كومپانياسىنىڭ بيىلعى ساتىلىمى دا كۇتكەن مەجەدەن كورىنبەيىن دەپ تۇر. قىتايدىڭ كولىك جاساۋشىلار قاۋىمداستىعى وسى جىلعى ساتۋ كولەمى جوسپارلى 7 پايىزعا ەمەس، تەك 3 پايىزعا عانا وسەتىنىن مالىمدەدى.
اۆتورى: ەرنات قاشقىنوۆ
www.24.kz
