شىمكەنتتە تۇنگى كلۋبتاعى كىسى ءولىمى وقيعاسى بويىنشا ءتورت ادام قولعا ءتۇستى

شىمكەنت. قازاقپارات - شىمكەنتتە تۇنگى كلۋبتاعى كىسى ءولىمى فاكتىسى بويىنشا ءتورت ادام ۇستالدى.

«ۇشەۋىنە قاتىستى ق ر ق ك 293-بابى (بۇزاقىلىق) بويىنشا قىلمىستىق ءىس قوزعالدى. ۇستالعاندار 1987 جانە 1990 -جىلى تۋىلعاندار. بۇدان باسقا، 1986 -جىلى تۋىلعان پوليتسەي قاماۋعا الىندى، ونىڭ قوناقتاردىڭ ورتاسىندا بولعانى، قىلمىستىڭ الدىن الۋ ءۇشىن ەش شارا قولدانباعانى بەلگىلى بولدى. اتىس ۇيىمداستىرعان تاعى ءبىر كۇدىكتى ىزدەستىرىلۋدە»، - دەپ حابارلادى و ق و ءى ءى د باسپا ءسوز قىزمەتىنىڭ جەتەكشىسى سالتانات قاراكوزوۆا.

ەسكە سالساق، 19 -شىلدەدە شىمكەنتتە تۇنگى كلۋب كەلۋشىلەرىنىڭ اراسىندا جانجال ورىن الادى. ولار كوشەگە شىعىپ، تالقىلاۋعا كەلىسەدى. ناتيجەسىندە ەر ادام تراۆماتيكالىق تاپانشادان وق اتىپ، وقيعا ورنىنان بوي تاسالاعان. كەۋدەسىنە وق تيگەن شىمكەنت تۇرعىنى، 1994 -جىلى تۋىلعان جاس جىگىت وقيعا ورنىندا قازا تاپتى.

وقيعا اباي ا ءى ءى ب سوت الدى تەرگەۋ ءبولىمىنىڭ ءبىرىڭعاي تىزىلىمنە تىركەلدى. ق ر ق ك 99-بابى (كىسى ءولتىرۋ) فاكتىسى بويىنشا قىلمىستىق ءىس قوزعالدى. پوليتسەيلەر بارلىق زاتتاي ايعاقتى تاركىلەدى. بۇدان باسقا، كىسى ءولىمى ورىن العان كەزدە كلۋبتا جۇزدەن استام ادام بولعان، جەدەل قىزمەتكەرلەر ولاردىڭ ءارقايسىسىنان جاۋاپ الدى.