ايەلدى ينتەرنەت ارقىلى تانىسقان جىگىتى ۇرىپ، توناپ كەتتى
پورتالدىڭ مالىمەتىنشە، الەۋمەتتىك جەلى ارقىلى تانىسقان ەكەۋ ءبىر-بىرىنە قوڭىراۋ شالىپ، سويلەسە باستاعان. الايدا ايەل ريددەردە، ال ەر ادام وسكەمەندە تۇرىپتى.
ءبىرقاتار ۋاقىت وتكەندە ايەل ەر ادامدى ريددەرگە شاقىرىپ، 33 جاستاعى تانىسى قوناق بولۋعا كەلىسكەن. كەزدەسۋگە بىرنەشە ساعات كەشىگىپ، ماس كۇيىندە بارعان ول ايەلگە دورەكى سويلەپ، جاعىمسىز قىلىق تانىتقان.
«ايەل ونىمەن بىرگە سىرا ىشكەن، ال وسكەمەندىك تانىسى ءبىر تيىنسىز كەلىپتى. ول ايەلگە قوناقۇيدەن نومەر الىپ بەرىپ، وزىمەن بىرگە سوندا بارۋىن مەڭزەگەن. سونىمەن قاتار، وسكەمەنگە دەيىن تاكسي جالداپ، اقىسىن تولەۋدى تالاپ ەتىپتى. الايدا ونىڭ تالاپتارىنان باس تارتقان ايەلدىڭ بەتىنەن ۇرعان ول سومكەسىن الا قاشقان»، - دەلىنگەن جاريالانىمدا.
ايەلدىڭ سومكەسىندە بانك كارتوچكالارى، اقشا مەن ساقينا بولعان. پوليتسياعا شاعىم تۇسىرگەن ايەلدىڭ سوزىنە قاراعاندا، ءساتسىز كەزدەسۋدىڭ سالدارىنان وعان 90 مىڭ تەڭگە شىعىن كەلىپتى. ەر ادام وسكەمەندە ۇستالىپ، ءىس سوتقا دەيىن جەتتى.
سوتتا توناۋ ارەكەتىن جوققا شىعارعان ول ايەلدىڭ بار شىعىندى ءوزى وتەيمىن دەپ ءسوز بەرىپ، ۋادەسىندە تۇرماعانىن ايتقان. سونىمەن قاتار، ايەلدىڭ سۋرەتتەگىدەي ادەمى بولماعانىنا قاپالانىپ، بەتىنەن ۇرعانىن ايتتى.
الايدا تەرگەۋ بارىسىندا ەر ادامنىڭ بۇعان دەيىن ءۇش رەت توناۋ بويىنشا، ءبىر رەت كولىك ايداپ اكەتۋ بويىنشا ءىستى بولعانى انىقتالدى. وسىعان بايلانىستى سوت ونى التى جىلعا سوتتادى.
