اقىن-جازۋشىلارعا ارنالعان «التىن توبىلعى» بايقاۋى باستالدى

استانا. قازاقپارات - قازاقستان رەسپۋبليكاسى تۇڭعىش پرەزيدەنتى - ەلباسىنىڭ قورى قۇرعان «التىن توبىلعى» ادەبيەت جۇلدەسىن بەرۋ ءتارتىبى بەلگىلەندى. بۇل تۋرالى «ادەبيەت پورتالى» حابارلادى.

حاباردا جۇلدەنىڭ ماقساتىنىڭ قازىرگى زامانعى قازاق ادەبيەتىن دامىتۋ جانە ناسيحاتتاۋعا كومەك كورسەتۋ بولىپ وتىرعانى جازىلعان. جۇلدەنىڭ ۇيىمداستىرۋشىسى جانە قۇرىلتايشىسى قازاقستان رەسپۋبليكاسى تۇڭعىش پرەزيدەنتى - ەلباسىنىڭ قورى. جۇلدە كونكۋرستىق نەگىزدە كەلەسى نوميناتسيالار بويىنشا بەرىلەدى:

«جىلدىڭ ۇزدىك پروزاسى»، «جىلدىڭ ۇزدىك پوەزياسى»، «جىلدىڭ ۇزدىك دراماتۋرگياسى»، «جىلدىڭ ۇزدىك بالالار ادەبيەتى»، «قازاقستان رەسپۋبليكاسىنىڭ تۇڭعىش پرەزيدەنتى - ەلباسى ن. ءا. نازاربايەۆتىڭ «ماڭگىلىك ەل» يدەياسىنا ارنالعان ۇزدىك شىعارما». سونىمەن قاتار، جەڭىمپازدارعا «التىن توبىلعى» ادەبيەت جۇلدەسىنىڭ لاۋرەاتى اتاعى جانە 1 ميلليون تەڭگە مولشەرىندە اقشالاي سىيلىق بەرىلەدى. ال «ماڭگىلىك ەل» اتالىمى بويىنشا جەڭىمپازعا 1,5 ميلليون تەڭگە مولشەرىندە ارنايى جۇلدە تاعايىندالادى.

كونكۋرستىق جۇمىستاردى ۇسىنۋ مەرزىمى 2015-جىلعى 1- شىلدەدەن باستاپ 1- قاراشاعا دەيىن.

بايقاۋ قورىتىندىسى 2015-جىلعى جەلتوقساننىڭ ءبىرىنشى ون كۇندىگىندە جۇزەگە اسىرىلادى.

ايتا كەتەيىك، قولجازبالاردى جانە جەڭىمپازداردى (لاۋرەاتتاردى) باعالاۋدى جۇلدەنىڭ قۇرىلتايشىسى قازاقستاننىڭ بەلگىلى جازۋشىلارى مەن اقىندارىنان، سونداي-اق كەمىندە 7 مۇشەدەن تۇراتىن جۇلدە قۇرىلتايشىسىنىڭ جانە ارىپتەستەرىنىڭ، باسپا قىزمەتىنىڭ وكىلدەرىنەن قۇراتىن كونكۋرستىڭ قازىلار القاسى جۇزەگە اسىرادى. «وبەكتيۆتىلىكتى ساقتاۋ ماقساتىندا بارلىق جۇمىستار انونيمدىك پرينتسيپتەردى ساقتاي وتىرىپ باعالانادى. جۇمىستاردى باعالاعان كەزدە قازىلار القاسى كەلەسى كريتەرييلەردى باسشىلىققا الادى: تاقىرىپتىڭ وزەكتىلىگى جانە سونىلىعى، بايانداۋ مانەرلىگى/ بەينەلەۋ ونەرى»، - دەلىنگەن ەرەجەدە.