حالىقارالىق «التىن كوپىر» اۋدارماشىلار بايقاۋى جاريالاندى

استانا. قازاقپارات - قازاقستان رەسپۋبليكاسىنىڭ مادەنيەت جانە سپورت مينيسترلىگى رەسەيدەگى قازاقستان رەسپۋبليكاسىنىڭ ەلشىلىگى، قازاقستان جازۋشىلار وداعى جانە «قازاقستان ك ۆ ن وداعى» رەسپۋبليكالىق جاستار قوعامدىق بىرلەستىگىمەن بىرگە «التىن كوپىر» حالىقارالىق اۋدارماشىلار بايقاۋىن جاريالايدى، دەپ حابارلانعان مينيسترلىك سايتىندا.

بايقاۋ قازاقستان رەسپۋبليكاسى مەن رەسەي فەدەراتسياسى حالىقتارى اراسىنداعى حالىقارالىق بەيبىتشىلىك پەن كەلىسىمدى، ءوزارا تۇسىنىستىك، ادەبي جانە مادەني قارىم-قاتىناستاردى نىعايتۋعا، ءتىل مادەنيەتىن دامىتۋعا جانە تاراتۋعا، قازاق ادەبيەتىنىڭ دامۋىن قولداۋعا جانە ناسيحاتتاۋعا جاردەمدەسۋ ماقساتتارىن كوزدەيدى.

بايقاۋ پوەزيا جانە پروزا جانرلارىنداعى شىعارمالاردى قازاق تىلىنەن ورىس تىلىنە، ورىس تىلىنەن قازاق تىلىنە اۋدارۋ نوميناتسيالارىن قامتيدى.

بايقاۋدىڭ ءاربىر اتالىمى بويىنشا جەڭىمپازدار ديپلوممەن جانە 1- ورىن ءۇشىن - 200000 تەڭگە، 2- ورىن ءۇشىن - 150000 تەڭگە، 3- ورىن ءۇشىن - 120000 تەڭگە كولەمىندەگى قارجىلاي سىيلىقتارمەن ماراپاتتالاتىن بولادى.

وزدەرىنىڭ ەرەكشە قابىلەتتەرىن كورسەتە بىلگەن كونكۋرس قاتىسۋشىلارىنا 100000 تەڭگە كولەمىندەگى ىنتالاندىرۋ سىيلىعى بەرىلەدى.

بايقاۋعا 18 جاستان اسقان قازاقستان رەسپۋبليكاسى مەن رەسەي فەدەراتسياسىنىڭ اۋدارماشىلىق سالاسىنداعى ماماندارى قاتىسا الادى.