تانىمال قىتايلىق تەلەسەريال العاش رەت قازاقستاندا قازاق تىلىندە كورسەتىلەتىن بولادى

استانا. قازاقپارات - «قازاقستان» رەسپۋبليكالىق تەلەراديو كەشەنىنىڭ حابارلاۋىنشا، قىتاي تاريحىنداعى تانىمال تەلەنوۆەللالاردىڭ ءبىرى «قىزىل سارايداعى ءتۇس» اتتى حيكايا جاڭا تەلەماۋسىمدا قازاقستاندىق ەكراننان كورسەتەلەتىن بولادى.

ادەمى دەكوراتسيالار، قىمبات جانە اسەم كيىم ۇلگىلەرى، سول كەزدەگى قالپىنا كەلتىرىلگەن تۇرمىستىق جاعداي تسين ديناستياسىنىڭ داۋىرىنە بويلاي ەنۋگە مۇمكىندىك بەرەدى.

 

ەلۋ سەريالىق تەلەحيكايا ەجەلگى قىتاي ءتىلىنىڭ ماندارين ديالەكتىسىنەن العاش رەت قازاقشاعا اۋدارىلىپ، دىبىستالىپ وتىر. « قىزىل سارايداعى ءتۇس» سەريالى 2010 -جىلى ازيا تەلەحيكايالاردىڭ كورسەتىلىمى بويىنشا ۇزدىك اتاندى. حيكايانىڭ بيۋدجەتى 19 ميلليون دوللاردى قۇرايدى.

 

«قىزىل سارايداعى ءتۇس» حيكاياسى قىتاي تىلىندەگى ءتورت ەڭ تانىمال كلاسسيكالىق روماننىڭ ءبىرى بولىپ سانالادى. ونىڭ العاشقى 80 ءبولىمى تساو سيۋەتسيننىڭ (شىن اتى تساو چجين - قىتاي جازۋشىسى) 1763 -جىلى، ءوزى ولەرىنىڭ الدىندا جارىققا شىققان «تاس تۋرالى جازبالار» شىعارماسىنان تۇرادى. وتىز شاقتى جىلدان كەيىن، 1791 -جىلى جەكە باسپاحاناسى بار گاو ە ءوزىنىڭ كومەكشىسىمەن بىرگە روماننىڭ سوڭعى 40 ءبولىمىن جازىپ شىعادى. الايدا زەرتتەۋشىلەر گاو جازعان حيكايانىڭ سوڭى تسياو سيۋەتسيننىڭ اۆتورلىق ويىمەن ءدال كەلمەيتىنى تۋرالى داۋ ايتادى.

 

حيكايانىڭ باس كەيىپكەرى تسزيا باويۋي وتباسىندا ايەلدەرى باسىم تۇسكەن اۋقاتتى وتباسىنىڭ مۇراگەرى (« قىزىل ساراي» دەپ اتالۋىنىڭ ءبىر ءمانى -  «اۋقاتتى وتباسىلاردىڭ قىزدارى ءومىر سۇرەتىن ءۇي- جاي»؛ اتاۋدىڭ باسقا ءبىر دەرەككوزى -  بەسىنشى تاراۋدا باويۋي كورەتىن ءتۇسى: بۇل تۇستە كەيىپكەرلەردىڭ باسىم بولىگىنىڭ تاعدىرى قىزىل بولمەدە بولجامدانادى).

 

حيكايادا 40-قا جۋىق باس كەيىپكەر جانە 500-گە جۋىق قوسىمشا كەيىپكەرلەر بار. ءدال وسى حيكايادا قىتاي حالقىنىڭ ايگىلى شاي ءىشۋ ءراسىمى تولىق كولەمدە جانە ءدال كورسەتىلەدى. تۋىندى كوپتەگەن ماحاببات جانە ساراي ىشىندەگى شىتىرماندارعا تولى. حيكايا تسايۋ سيۋەتسين 18 عاسىردا جازعان تۋىندى بويىنشا تۇسىرىلگەن.

« قىزىل سارايداعى ءتۇس» حيكاياسى جايىندا قىزىقتى دەرەك:

قىتايدا بۇل رومانعا بىرنەشە رەت تىيىم سالىنادى.

بۇل تۋىندىنىڭ اۆتورى كلاسسيكالىق قىتاي ءتىلىن جەتىك بىلگەنمەن، كلاسسيكالىق ەمەس، اۋىزەكى تىلدە - «پەكين» ديالەكتىسىندە جازعان. كەيىن بۇل ديالەكت قىتايدىڭ قازىرگى ادەبي ءتىلى - «پۋتۋنحۋانىڭ» نەگىزىنە اينالعان. ءسويتىپ، « قىزىل سارايداعى ءتۇس» رومانى جاڭا ءتىلدىڭ جارناماسى رەتىندە قولدانىلعان.

رومان جارىققا شىقپاي تۇرىپ، قولجازبادان كوشىرىلىپ، جۇرت اراسىندا كەڭ تارالادى. بىرەۋلەر ونى وتقا ورتەسە، بىرەۋلەر كوككە كوتەرەدى. الايدا، بۇل رومانعا سول كەزدە بەي- جاي قاراعاندار بولمادى.

 

حيكايا 3 تامىزدان باستاپ، «قازاقستان» تەلەارناسىنان ورىس تىلىندەگى جۇگىرتپە اۋدارمامەن قاتار كورسەتىلەتىن بولادى.