ورالدا اسكەري قىزمەتكەرلەر اراسىندا «مەملەكەتتىك ءتىل - مەنىڭ ءتىلىم» اتتى بايقاۋ مارەگە جەتتى - فوتو

ورال. قازاقپارات - ەلباسىمىز ن. ءا. نازاربايەۆ «نۇرلى جول - بولاشاققا بارار جول» اتتى جولداۋىندا، باسقا دا سويلەگەن سوزدەرىندە «ماڭگىلىك ەلگە» اينالۋ جولىندا مەملەكەتتىك ءتىلدىڭ بارلىق قازاقستاندىقتاردى بىرىكتىرۋشى رەتىندەگى ءمان- ماڭىزىن اتاپ كورسەتكەن بولاتىن.

مەملەكەتتىك ءتىلدى ق ر ۇلتتىق ۇلانى قاتارىندا قىزمەت ەتەتىن وزگە ۇلت وكىلدەرى دە قۇرمەت تۇتادى. وسىنىڭ ايقىن كورىنىسىندەي، ق ح ا جىلى اياسىندا ورالدا «باتىس» وڭىرلىك قولباسشىلىعىنا قاراستى اسكەري بولىمدەر قىزمەتكەرلەرى اراسىندا «مەملەكەتتىك ءتىل - مەنىڭ ءتىلىم» بايقاۋىنىڭ ەكىنشى كەزەڭى مارەگە جەتتى.

«باتىس» وڭىرلىك قولباسشىلىعىنىڭ باسپا ءسوز قىزمەتىنەن تۇسكەن مالىمەتكە قاراعاندا، اتالمىش سايىسقا اقتاۋ، اتىراۋ، اقتوبە، جاڭاوزەن جانە ورال قالالارىنان ءبىرىنشى كەزەڭدە جەڭىمپاز اتانعان التى ۇمىتكەر قاتىسىپ، باق سىنادى.

ق ر ۇلتتىق ۇلانى باس قولباسشىلىعى ءتىل ساياساتى جانە اقپارات ءبولىمىنىڭ اعا وفيتسەرى، پودپولكوۆنيك چاپاي ساكەنوۆتىڭ ايتۋىنشا، شارا ماقساتى - مەملەكەتتىك ءتىل ماماندارىنىڭ كاسىبي دەڭگەيىن كوتەرۋ، ءتىلدىڭ اسكەري بولىمدەردە قولدانىلۋ اياسىن كەڭەيتۋ، وزگە ۇلت وكىلدەرى اراسىندا ناسيحاتتاۋ.

ۇمىتكەرلەر بايقاۋ بارىسىندا وزدەرىن تانىستىرىپ، قازاق تىلىندە تۋىندىلار وقىدى، تاريحي تۇلعالاردىڭ ايتقاندارىن ەسكە ءتۇسىردى، ساحنالىق كورىنىستەر قويدى. قىسقاسى، ءتىلدى قانشالىقتى مەڭگەرگەندىكتەرىن كورسەتتى.

 اتىراۋ قالاسىنداعى 5546-اسكەري بولىمىنەن كەلگەن سەرجانت ۆاديم گراچيەۆ بايقاۋ جەڭىمپازى اتانىپ، استانادا وتەتىن قورىتىندى كەزەڭگە جولداما الدى. اقتوبە قالاسىنداعى 6655-اسكەري بولىمىنەن ەفرەيتور كونستانتين اندرەادي ەكىنشى، ورالداعى 5517-اسكەري ءبولىمنىڭ كىشى سەرجانتى نيكولاي كولەسنيكوۆ پەن اقتاۋداعى 6656-اسكەري ءبولىم ەفرەيتورى دەنيس ۆاشۋك ءۇشىنشى ورىندى يەلەندى.