استانادا ەلباسى ن. نازاربايەۆتىڭ ءومىرى مەن قىزمەتىنە ارنالعان كىتاپتىڭ تۇساۋى كەسىلدى - فوتو

استانا. قازاقپارات - بۇگىن استاناداعى «نازاربايەۆ ورتالىعىندا» ەلباسى ن. نازاربايەۆتىڭ ءومىرى مەن قىزمەتىنە ارنالعان «نۋرسۋلتان نازاربايەۆ: چەلوۆەك ۋ ۆلاستي» اتتى كىتاپتىڭ تۇساۋى كەسىلدى.

قالىڭ وقىرمانعا جول تارتقان تۋىندى ءبىلىم جانە عىلىم مينيسترلىگىنە قاراستى مەملەكەت تاريحى ينستيتۋتى مەن «ق ر تۇڭعىش پرەزيدەنتى - ۇلت كوشباسشىسى كىتاپحاناسى» مەملەكەتتىك مەكەمەسىنىڭ قولداۋىمەن جارىققا شىقتى، ال ونىڭ اۆتورلارى: پروفەسسورلار بۇركىتباي اياعان مەن ءاليما اۋاناسوۆا.

جارىققا شىعىپ وتىرعان تاريحي- ءومىرباياندىق كىتاپ وقىرمانعا بۇعان دەيىنگى كۇندەرى ءجىتى تانىس بولىپ ۇلگەرگەن «ن. ا. نازاربايەۆ - وسنوۆاتەل نەزاۆيسيموگو گوسۋدارستۆا»، «مير و نازاربايەۆە»، «كەمەڭگەر»، «نەزاۆيسيمىي كازاحستان ي ليدەر ناتسيي» سەكىلدى كوپتەگەن ەڭبەكتەردىڭ جالعاسى بولىپ تابىلادى.

بۇل رەتتە كىتاپ اۆتورلارى ەلدىڭ ساياسي شىڭىنا شىعىپ، ونى حالىقارالىق ساحنادا تانىمال ەتە بىلگەن دارىندى تۇلعانىڭ ءومىر جولىن كورسەتۋدى كوزدەگەن. سوندىقتان دا ولار تۋىندىنى «نۋرسۋلتان نازاربايەۆ: چەلوۆەك ۋ ۆلاستي» دەپ اتاپ وتىر. كىتاپتىڭ اتاۋى مازمۇنىندا ساياسي ساحناعا ءوزىنىڭ تاباندىلىعىنىڭ، ەڭبەكقورلىعىنىڭ، العا قويعان ماسەلەلەردىڭ تۇپكى ماعىناسىنا جەتە، ءارى ولاردى بەلگىلەنگەن مەرزىم ىشىندە شەشە ءبىلۋ قابىلەتىنىڭ، قوعامدى باستاۋ قاسيەتىنىڭ ارقاسىندا كوتەرىلگەن تۇلعا تۋرالى ايتىلاتىنىن بىلدىرەدى.

پروفەسسور بۇركىت اياعاننىڭ ايتۋىنشا، كىتاپتا العاش رەت قازاقستاننىڭ بولاشاق پرەزيدەنتىنىڭ قالىپتاسۋ جولىن، ونىڭ الەم قاۋىمداستىعى وڭ باعالاعان ساياسي كارەراسى مەن زاڭدى سالتاناتىن زەرتتەپ باقىلاۋعا مۇمكىندىك بەرەتىن ەڭبەك جولىنىڭ كەزەڭدەرى باياندالادى. بۇل رەتتە اۆتورلار كىتاپ كەيىپكەرىنىڭ ءومىربايانىن زەرتتەۋ ارقىلى قازاقستاننىڭ 75 جىلدىق تاريحي دامۋ زاڭدىلىعىن دا زەردەلەيدى، قوعام دامۋىنداعى كەڭەستىك جۇيەنىڭ داعدارىسىن، تاۋەلسىز مەملەكەتتىڭ قالىپتاسۋ كەزەڭىندەگى رەفورمالاردىڭ قارىشتاپ دامۋىن كورسەتۋگە تىرىسادى.

تۇتاستاي العاندا اۆتورلاردىڭ كوزدەگەن ماقساتى قازاقستاننىڭ اتىن الەمگە پاش ەتكەن، قازاقستاننىڭ دۇنيەجۇزى ەلدەرى قاتارىنان ورىن تاۋىپ، قۇرمەتتى مەملەكەتكە اينالۋىنا، ءارى قازىرگى قىم-قيعاش گەوساياسي جاعدايلاردا وڭ ءرول اتقارۋىنا سەبەپتەسكەن رەفورماتورلىق رۋحىن اشىپ كورسەتۋ بولدى.

شاراعا پارلامەنت دەپۋتاتتارى، ديپلوماتيالىق كورپۋستىڭ وكىلدەرى، مەملەكەت جانە قوعام قايراتكەرلەرى، عالىمدار قاتىستى.