بەسىنشى سايلانعان پارلامەنتتىڭ ءتورتىنشى سەسسياسى جۇمىسىن اياقتاپ، دەپۋتاتتار كانيكۋلعا كەتتى

استانا. قازاقپارات بۇگىن ق ر پارلامەنتى پالاتالارىنىڭ بىرلەسكەن وتىرىسى ءوتتى. وندا بەسىنشى سايلانعان پارلامەنتتىڭ ءتورتىنشى سەسسياسى ءوز جۇمىسىن اياقتاپ، دەپۋتاتتار قىركۇيەك ايىنا دەيىنگى كانيكۋلعا كەتتى.

  ەسكە سالا كەتەيىك، بيىلعى سەسسيا جىلداعىعا قاراعاندا ۇزاعىراق بولىپ، دەپۋتاتتار شىلدەنىڭ 15-ىنە دەيىن جۇمىس ىستەۋ تۋرالى شەشىم قابىلداعان بولاتىن.

 بيىلعى پارلامەنتتىك ماۋسىم كۇردەلى كەزەڭدە وتكەنىن اتاپ وتۋگە بولادى. الەمدىك ەكونوميكادا ورىن العان جاعىمسىز قۇبىلىستار مەن حالىقارالىق دەڭگەيدەگى قايشىلىقتار جاڭا قاتەرلەر تۋدىرىپ، زاڭ شىعارۋشى بيلىكتەن ۋاقىتتىڭ سىن- قاتەرلەرىنە دايىن بولۋ ءۇشىن زامان تالابىنا ساي جەدەل ارەكەت ەتۋ تالاپ ەتىلدى.

 سونىمەن قاتار، ونداي سىن- قاتەرلەردىڭ تەرىس سالدارىنا سىندارلى جاۋاپ رەتىندە ەلباسى قازاقستاننىڭ وڭ دامۋىن قامتاماسىز ەتۋگە باعىتتالعان «نۇرلى جول» اتتى جاڭا ەكونوميكالىق ساياساتىن جاريالادى. مەملەكەت باسشىسىنىڭ تاپسىرمالارىن جەدەل ورىنداۋ ماقساتىندا پارلامەنت بيىلعى سەسسيادا 113 زاڭ قابىلدادى. ولاردىڭ اراسىندا مەملەكەتتىك باسقارۋ جۇيەسىن ودان ءارى جەتىلدىرۋ، جەر قويناۋىن پايدالانۋدى جەڭىلدەتۋ، دەربەس ءبىلىم بەرۋ ۇيىمدارىنىڭ قىزمەتىن رەتتەۋ، كاسىپكەرلىككە قاتىستى جاعدايدى تۇبەگەيلى جاقسارتۋ، اگروونەركاسىپ كەشەنىندەگى ونىمدىلىكتى ارتتىرۋ ماقساتىندا سالىق زاڭناماسىن جەتىلدىرۋ ماسەلەلەرى قامتىلدى.

ايتا كەتەيىك، بەسىنشى سايلانعان پارلامەنتتىڭ بەسىنشى سەسسياسى قىركۇيەك ايىنىڭ العاشقى كۇنىنە شاقىرىلاتىن بولادى.

اۆتور: قانات مامەتقازى ۇلى