اۋعانستان پرەزيدەنتى ن. نازاربايەۆقا «گازي امانۋللا حان» وردەنىن تاپسىردى
كەزدەسۋ بارىسىندا نۇرسۇلتان نازاربايەۆ پەن موحامماد گاني ەكىجاقتى ىنتىماقتاستىقتىڭ ساياسي، ساۋدا- ەكونوميكالىق جانە مادەني- گۋمانيتارلىق، وزگە دە سالالارداعى قازىرگى احۋالى مەن كەلەشەگىن تالقىلادى.
سونداي- اق تاراپتار ەكى ەلدىڭ وڭىرلىك جانە حالىقارالىق ۇيىمدار اياسىنداعى ءوزارا ءىس- قيمىلىنىڭ ماسەلەلەرىن قاراستىردى. بۇدان بولەك، حالىقارالىق كۇن تارتىبىندەگى مەيلىنشە وزەكتى جايتتار اڭگىمەگە ارقاۋ بولدى.
قازاقستان پرەزيدەنتى سوڭعى جىلدارى اۋعانستان كۇردەلى جولدان وتكەنىنە توقتالدى.
«كورشىلەس ءارى باۋىرلاس ەل رەتىندە سىزدەر ءۇشىن ءبىز شىن كوڭىلمەن ۋايىمدايمىز. ءبىزدىڭ ەلدەرىمىز ءبىر وڭىردە ورنالاسقان جانە تاريحي تۇرعىدان حالىقتارىمىز ارالاس- قۇرالاس بولىپ، ساۋدا جاساسقان، ساياسي بايلانىستار ورناتقان. وكىنىشكە قاراي سونىڭ بارلىعى توقتاپ قالدى، الايدا اۋعانستاندا قازىر قايتادان تىنىشتىق ورناي باستاعانى قۋانتادى»، - دەدى نۇرسۇلتان نازاربايەۆ.
قازاقستان پرەزيدەنتى اۋعانستاننىڭ دامۋىنداعى وڭ وزگەرىستەرگە نازار اۋداردى.
«بارلىق حالىقارالىق سامميتتەردە مەن اۋعانستاندى قولداپ سويلەدىم. ءسىزدىڭ سايلانۋىڭىزبەن بىرگە ۇلتتىق بىرلىك ۇكىمەتىن قۇرۋ اياقتالدى. سونداي- اق ناتو اسكەرىن الىپ كەتۋ ءىسى دە ءتامامدالدى، ءسىز وپپوزيتسيامەن ارادا كەلىسسوزدەردى باستادىڭىز. ءبىز بۇل قادامداردى قۇپتايمىز جانە ءسىزدى قولداۋعا ءازىرمىز»، - دەدى مەملەكەت باسشىسى.
نۇرسۇلتان نازاربايەۆ قازاقستاننىڭ اۋعانستانعا مۇمكىندىگىنشە، اسىرەسە گۋمانيتارلىق كومەك جىبەرۋ، مەكتەپتەر، اۋرۋحانالار جانە جولدار سالۋ ارقىلى جاردەمدەسكەنىن ەسكە سالدى.
مەن ەڭ باستىسى جاس مامانداردى تاربيەلەۋ دەپ سانايمىن. ءبىز اۋعانستاننىڭ جاس ازاماتتارىن دايارلاۋعا، ولارعا ماماندىق بەرۋگە مىندەتتەمە الدىق. ستۋدەنتتەردىڭ العاشقى توبى ورالىپ تا ۇلگەردى، ءسىزدىڭ ەلىڭىزدە جۇمىس جاساپ جاتىر. ءبىز كابۋلدان ەلشىلىك اشتىق جانە ەكونوميكا مەن ساياساتتا مۇمكىندىگىنشە ىنتىماقتاستىعىمىزدى ارتتىرۋعا ءازىرمىز، - دەدى قازاقستان پرەزيدەنتى.
م. گاني ءوز كەزەگىندە ەلىمىزدىڭ اۋعان ستۋدەنتتەرىن وقىتۋعا كورسەتىپ وتىرعان كومەگى، سونداي- اق اۋعانستانداعى تابيعي اپاتتار كەزىندە جاسالعان ەلەۋلى قولداۋ ءۇشىن العىس ايتتى.
بۇدان بولەك، م. گاني كەزدەسۋ بارىسىندا قازاقستان پرەزيدەنتىنە «گازي امانۋللا حان» وردەنىن تاپسىردى.
