جۋرناليست زەرتتەۋى: الماتى ۆوكزالىن الاياقتار جاۋلاپ العان

استانا. قازاقپارات - بىلىعى كوپ بيلەت ساۋداسى! الماتى ۆوكزالدارىندا الىپساتارلاردىڭ ايلاسى اسىپ تۇر.

كاسساداعى كەزەكتى قولدان جاسايتىن ولار، اسىققان جولاۋشىلاردىڭ قالتاسىن قاعۋدى جاقسى مەڭگەرگەن. 2-3 كاسسانىڭ كەزەگىن ساعاتتاپ كۇتكەندەر شىداماي اقىرى سولاردىڭ كومەگىنە نەمەسە جەكە كاسسالارعا جۇگىنەدى.

ال ونداعى باعانىڭ جوعارى ەكەنى تۇسىنىكتى. تەمىرجولعا جاۋاپتى شەندىلەر بولسا، بار كاسسانىڭ نەلىكتەن ۇنەمى جابىق تۇراتىنىن وزدەرىنشە تۇسىندىرۋدە. ايتۋلارىنشا، بيلەتتى ينتەرنەت نەمەسە تەرمينالدار ارقىلى الۋعا ۇيرەتپەكشى ەكەن.

الماتى ۆوكزالدارىندا وسىلاي ەكىنىڭ ءبىرى بيلەت ساتىپ ءجۇر. اقىسىن تولەسەڭىز بولعانى ەشبىر كەزەكسىز، ءتىپتى كاسسالاردا جوق بيلەتتەردى اپەرەدى.

- كەزەكپەن الىپ بەرەم. ايتپەسە,2 ساعات كۇتەسىڭ عوي. مەن 500 تەڭگە قوسام ۇستىنە.

 - ءسىز الا المايسىز ول جەرگە بارعاندا، بيلەت جوق قوي.

راسىندا بيلەتتىڭ ءبارى وسى الىپساتارلاردىڭ قولىندا. ال باعاسىنا كەلىسپەگەندەر بەكەت ىشىندە كەزەكتە تۇر. تەك كەزەكتىڭ تاۋسىلاتىن ءتۇرى جوق. 17 بىردەي كاسسانىڭ 3-4 ۋى عانا ىستەپ تۇر. قالعانىنىڭ تەرەزەسى تارس جابىق. ەسەسىنە، جەكە قولداعى كاسسالاردىڭ ءبارى ايقارا اشىق. كەزەگى جىلجىماي جىلارمان بولعان جولاۋشىلار امال جوق ءار بيلەتكە 300 تەڭگەدەن تولەپ، سولارعا بارۋعا ءماجبۇر.

300 تەڭگە كوميسسيا!

- كەزەكسىز.

تەك اگەنتتىكتەردەن بيلەت الۋعا ەكىنىڭ ءبىرىنىڭ قالتاسى كوتەرمەسى انىق. ماسەلەن، بالا- شاعاسىمەن جولعا جينالعان ءبىر كەلىنشەك سول كوميسسيانى تولەي الماعاندىقتان، ەكى ساعات وتسە دە كەتپەي كەزەكتە وتىر.

- مەن 2-3 بيلەت الام، مىڭ جارىمعا دەيىن كەتىپ قالادى. ءبىر بيلەت بولسا بولار ەدى.

 جۇرت مۇنىڭ قولدان ىستەلگەنىنە سەنىمدى. ويتكەنى، كەزەكتە وتىرىپ ابدەن جالىققان جولاۋشىلاردىڭ كوبى جەكە قولداعى كاسسالارعا اۋا سالادى. ودان قالدى كاسسيرلەردىڭ وزدەرى دەلدالدارمەن اۋىز جالاسقان. جۇرتتان تىققان جول بيلەتتەردى ءوزارا كەلىسىپ، بىرنەشە ەسە قىمبات باعاعا ساتىپ ءجۇر.

-20 مىڭ تەڭگە. قۇجاتتارىڭىزدى الىپ بالالاردىڭ. ساعات 9 جارىمداردا كەلسەڭىز.

- ودان ارزان بولماي ما؟

 - ودان باسقا ەرتەڭگە ءجۇرىڭىزشى. ەرتەڭگە وتىرار بار ەمەس پا؟ سوعان تارازعا دەيىن 3 بيلەت شىعارىپ بەرە الاسىڭ با ەكى بالا ءبىر ۇلكەن؟

 تەك تەمىرجول باسشىلىعى ءوز قىزمەتكەرلەرىنە شاڭ جۋىتار ەمەس. الىپساتارلار مەن كەزەكتى جويۋ كۇشىن كۇرەس ءجۇرىپ جاتقانى جەتكىزدى. ال كاسسالاردىڭ كۇن ۇزاق جابىق تۇرۋىنا جولاۋشىلاردىڭ ازدىعى سەبەپ ەكەن.

 گۇلنار قونىسبايەۆا، «جولاۋشىلار تاسىمالى» ا ق ايماقتىق فيليالى ديرەكتورىنىڭ ورىنباسارى:

- تاڭەرتەڭنەن باستاپ مىسالى جولاۋشىلار ازداۋ كەلەدى. سوندىقتان گرافيك سولاي ورنالاستىرىلعان. سولاي ىستەلگەن، ويتكەنى تۇستەن كەيىن، كەشكە قاراي جولاۋشىلاردىڭ سانى كوبەيەدى، سوندىقتان ءاربىر كاسسانىڭ باستالۋ جۇمىس ىستەۋ ۋاقىتى ءارتۇرلى.

 دەسە دە، كىلتتەۋلى كاسسالاردىڭ كەش باتقاندا دا ەشبىرى سول كۇيى اشىلمادى. تەمىرجول باسشىلىعى ولاردىڭ سانىن كوبەيتكەلى وتىرعان دا جوق. جولاۋشىلاردى وسىلايشا بيلەت الۋدىڭ زاماناۋي ءادىسىن قولدانۋعا ۇيرەتپەكشى. ياعني، كاسسير مەن الىپساتاردىڭ قولىنا قاراعىڭىز كەلمەسە، عالامتور نەمەسە ارنايى تەرمينالداردى پايدالانعان ءجون.

KTK