د س ۇ قازاقستانعا وتاندىق وندىرۋشىلەرگە مەملەكەتتىك قولداۋدىڭ بالامالى شارالارىن دايىنداۋ ءۇشىن جەتكىلىكتى ۋاقىت بەرەدى
سولاردىڭ كەيبىرى تۋرالى جازا كەتەيىك.
ەلىمىز د س ۇ- عا كىرگەننەن كەيىن قازاقستانمەن كەلىسىلگەن وتپەلى كەزەڭ وتاندىق تاۋار وندىرۋشىلەرگە مەملەكەتتىك قولداۋدىڭ بالامالى شارالارىن دايىنداۋ ءۇشىن جەتكىلىكتى ۋاقىت بەرەدى. اتاپ ايتقاندا، قالاارالىق جانە حالىقارالىق بايلانىس قىزمەتتەرىن كورسەتەتىن كومپانيالارعا شەتەل كاپيتالىنىڭ قاتىسۋىن 49 پايىز شەكتەۋدى الىپ تاستاۋ ءۇشىن قازاقستان د س ۇ- عا كىرگەن ساتتەن باستاپ 2,5 جىلدىق وتپەلى كەزەڭ تۋرالى ۋاعدالاستىققا قول جەتكىزىلدى. بەس جىلدىق وتپەلى كەزەڭ شەتەلدىك بانكتەر مەن ساقتاندىرۋ ۇيىمدارىنىڭ تىكەلەي فيليالدارىن قۇرۋعا رۇقسات بەرۋ ءۇشىن بەرىلىپ وتىر. بۇدان باسقا، قازاقستان باس بانكتەر، ساقتاندىرۋ ۇيىمدارى اكتيۆتەرىنىڭ ەڭ تومەن مولشەرىن، سونداي-اق، ۇكىمەت بەكىتەتىن تۇرعىندار دەپوزيتتەرىنىڭ ەڭ تومەن مولشەرىن بەلگىلەدى. د س ۇ- عا كىرۋ كەزىندەگى ەڭ كۇردەلى ماسەلە اۋىل شارۋاشىلىعى ماسەلەلەرى جونىندەگى كەلىسسوزدەر بولدى. قازاقستان اۋىل شارۋاشىلىعىنا اۋىلشارۋاشىلىق ءونىمىنىڭ جالپى قۇنىنىڭ 8,5 پايىزى مولشەرىندە مەملەكەتتىك قولداۋ كورسەتۋ مۇمكىندىگىنە قول جەتكىزدى. بۇل كولەم ۇكىمەتتىڭ «اگروبيزنەس-2020» باعدارلاماسىن ىسكە اسىرۋ شەڭبەرىندە اگرارلىق سالاعا جىل سايىنعى نەگىزدە قولداۋ كورسەتۋىنە مۇمكىندىك بەرەدى.
بۇدان باسقا، اۋىل شارۋاشىلىعىنىڭ جالپى ءونىمى بولاشاقتا ۇلعايعان كەزدە اۋىل شارۋاشىلىعىنا مەملەكەتتىك دوتاتسيانى قولدانۋدىڭ رۇقسات ەتىلگەن مولشەرى دە ۇلعاياتىن بولادى. ارنايى ەكونوميكالىق ايماق (ا ە ا) جانە «ەركىن قويما» كەدەن رەجيمى شەڭبەرىندەگى جەڭىلدىكتەردىڭ د س ۇ نورمالارىنا قايشى كەلەتىنىنە قاراماستان، قازاقستان 2012-جىلعى 1- قاڭتارعا دەيىن تىركەلگەن وسى سالانىڭ رەزيدەنتتەرى ءۇشىن 2017-جىلعى 1- قاڭتارعا دەيىنگى وتپەلى كەزەڭ تۋرالى ۋاعدالاستىققا قول جەتكىزدى. ولارعا جەتكىلىكتى قايتا وڭدەۋ ولشەمدەرىن ورىنداۋ ءۇشىن ق ق س جانە كەدەن باجدارى بويىنشا جەڭىلدىكتەر بەرىلەدى. وسى شارالار ينۆەستيتسيالىق جوبالاردى ءبىزدىڭ زاڭنامادا كوزدەلگەن شارتتاردا تولىق كولەمدە ىسكە اسىرۋعا مۇمكىندىك بەرەدى دەپ سەنەمىز.
سول ۋاقىت ىشىندە د س ۇ قاعيدالارىنا قايشى كەلەتىن اۆتوموبيلدەر مەن اۆتوقۇرامداۋىشتاردى «ونەركاسىپتىك قۇراستىرۋ» رەجىمىنىڭ ەلەمەنتتەرى ساقتالۋى مۇمكىن وتپەلى كەزەڭ - ەكونوميكالىق جانە قۇقىقتىق كوزقاراس تۇرعىسىنان الىپ قويۋلار كولەمى بويىنشا د س ۇ تاريحىندا بۇرىن-سوڭدى بولماعان نارسە.
وتپەلى كەزەڭ 2018-جىلعى 1- شىلدەدە اياقتالادى، بۇل ۋاقىتتا ينۆەستورلاردىڭ باسىم كوپشىلىگى ينۆەستيتسيالىق جوبالاردىڭ تولىق ورىندالۋىنا قول جەتكىزەدى جانە سالعان ينۆەستيتسيالارىنان تازا پايدا الا باستايدى. د س ۇ بويىنشا ۋاعدالاستىقتار ينۆەستيتسيالىق كەلىسىمدەردىڭ بۇزىلۋىنا اكەلمەيدى. د س ۇ قاعيدالارى ءاربىر مۇشە ەل وزدەرىنە بەرمەيمىز دەپ مىندەتتەمە قابىلدايتىن ەكسپورتتىق جانە يمپورتتى الماستىراتىن سۋبسيديالاردى قوسپاعاندا، سۋبسيديالاۋ ىسىنە سونشالىقتى تىيىم سالمايدى. تيىسىنشە، د س ۇ- عا كىرگەن سوڭ قازاقستان «قىزعىلت» جانە «جاسىل» سۋبسيديالاردى شەكسىز كولەمدە بەرە الادى، وسىلايشا وتاندىق وندىرۋشىلەردى قولدايتىن بولادى، دەپ جازىلعان egemen.kz تە جارىق كورگەن «ەلىمىزگە بەرىلگەن جەڭىلدىكتەر» اتتى ماقالادا.
د س ۇ- عا كىرۋ ءبىزدىڭ ەكونوميكامىز ءۇشىن جاڭا بەلەستەر اشادى. ءبىزدىڭ كاسىپورىندارىمىزدىڭ شەتەلدىك نارىقتارعا شىعۋىنا، ال تۇتىنۋشىلارعا - تاۋارلار مەن قىزمەتتەردىڭ كەڭ اۋقىمىن ۇسىنۋعا مۇمكىندىك بەرەدى. بۇگىندە الەمنىڭ 161 ەلى د س ۇ- عا مۇشە بولىپ تابىلادى، الەمدىك تاۋار اينالىمىنىڭ 98 پايىزى سولاردىڭ ۇلەسىندە. Trademap رەسۋرسىنىڭ دەرەكتەرى بويىنشا، 2014-جىلى د س ۇ- عا مۇشە مەملەكەتتەردىڭ جالپى تاۋار اينالىمى 36,5 تريليون ا ق ش دوللارىن قۇرادى، ال الەمنىڭ بارلىق ەلدەرىنىڭ تاۋار اينالىمىنىڭ كولەمى 37,5 تريليون ا ق ش دوللارىن قۇرادى. بۇل زاماناۋي، ءتيىمدى ەكونوميكا قۇرۋعا جانە الەمدىك ساۋداعا تەڭ قۇقىقتى قاتىسۋعا ۇمىتتەنىپ وتىرعان ءاربىر مەملەكەت الەمدىك ساۋدانىڭ ءبىرىڭعاي قاعيدالارى بويىنشا ءوزارا ءىس-قيمىل جاساۋلارى ءتيىس دەگەندى بىلدىرەدى. وسىلاردىڭ اراسىندا ەندى ءبىزدىڭ قازاقستانىمىز دا بار.
