ق ر پرەمەر- ءمينيسترى ءۇندىستاندى ەۋرازيالىق ەكونوميكالىق وداقپەن تىعىز قارىم- قاتىناس جاساۋعا شاقىردى

 استانا. قازاقپارات - بۇگىن استانادا ق ر پرەمەر- ءمينيسترى كارىم ءماسىموۆ پەن ەلىمىزگە رەسمي ساپارمەن كەلگەن ءۇندىستاننىڭ ۇكىمەت باسشىسى نارەندرا موديدىڭ قاتىسۋىمەن قازاقستان- ءۇندىستان بيزنەس- فورۋمى ءوتتى.

«ورتالىق ازيانىڭ ءىرى سەرىكتەسى بولىپ تابىلاتىن ءۇندىستان سوڭعى جىلدارى جاھاندىق ەكونوميكاداعى ءوزىنىڭ ءرولىن ارتتىرۋدا. سىزدەردىڭ ساياساتتارىڭىز بارشا ەۋرازيالىق كەڭىستىككە ىقپالىن جاساۋدا.

بۇگىندە ءبىز ەۋروپا مەن قيىر شىعىستاعى ساۋدانىڭ الەۋەتىن، ارينە، ءبىز ول باعىتتاعى مۇمكىندىكتەردى كورىپ وتىرمىز. انىعىندا، قازاقستان وسى مۇمكىندىكتەردى جۇزەگە اسىرۋعا دايار ەڭ لايىقتى سەرىكتەس. ءبىز ورتالىق ازياداعى ەڭ ءىرى ەكونوميكاعا يەمىز جانە ساۋدا كولەمىنىڭ جارتىسىن ۇندىستانمەن ءبولىسىپ وتىرمىز. ءبىز الەمنىڭ ەڭ قارقىندى دامىپ جاتقان 10 ەكونوميكاسىنىڭ قاتارىندامىز. ءبىز ورتالىق ازياعا 2 ميلليارد دوللار ينۆەستيتسيا تارتۋدامىز. قازاقستان ەۋروپا مەن ازيانىڭ اراسىن جالعاۋشى كوپىر. ول - ءبىز ءۇشىن ماڭىزدى»، - دەدى ك. ءماسىموۆ.

قازاقستان پرەمەر- ءمينيسترى ك. ءماسىموۆ، قازاقستان الەمدىك قوعامداستىقتىڭ بەلسەندى مۇشەسى رەتىندە بيىك ماقساتتاردى كوزدەيتىندىگىن ايتا كەلە، بىرنەشە باعىتتار بويىنشا ناقتى ۇسىنىستاردى ورتاعا سالدى.

«وسى تۇرعىدا قازاقستان مەن ءۇندىستان - ماڭىزدى ارىپتەس. ءبىز بۇل بايلانىستاردى ارى قاراي دامىتۋعا، سونىڭ ىشىندە شەتەلدەردە دە دامىتۋعا مۇددەلىمىز. بۇل الەۋەتتى ءتيىمدى پايدالانۋ ءۇشىن ورتاق ەكونوميكانى سىيلاۋىمىز شارت. بىرنەشە ناقتى قادامداردى ۇسىنعىم كەلەدى:

بىرىنشىدەن، ءبىز ءۇندىستاننان قازاقستانعا باعىتتالاتىن ينۆەستيتسيالاردى قولدايمىز. وسى ورايدا ءبىز بۇگىن ۇندىستانمەن بىرگە ءبىرقاتار ماڭىزدى مەموراندۋمدارعا قول قويدىق. سونىمەن بىرگە، ءبىز اۋىل شارۋاشىلىعى، اقپاراتتىق تەحنولوگيالار، كوممۋنيكاتسيالىق تەحنولوگيالار، مۇناي جانە حيميا سالالارىنداعى جوبالاردى قولداۋعا دايىنبىز.

ەكىنشىدەن، ءبىز ءبىلىم بەرۋ سالاسىنداعى ارىپتەستىكتىڭ دامۋىنا مۇددەلىمىز. ءۇندىستانداعى ينجينيرينگ، اقپاراتتىق تەحنولوگيالار بويىنشا تەحنيكالىق ينستيتۋتتار قازاقستاندا وتە تانىمال. ءبىزدىڭ ينستيتۋتتار اراسىندا بايلانىس ورناتۋعا بولادى. ماسەلەن، نازاربايەۆ ۋنيۆەرسيتەتى جانە سىزدەردىڭ ينستيتۋتتار اراسىندا قارىم- قاتىناس ورناتۋعا بولادى.

ۇشىنشىدەن، ءبىز ءۇندىستاندى ەۋرازيالىق ەكونوميكالىق وداقپەن تىعىز قارىم- قاتىناس جاساۋعا شاقىرامىز. ول وسى ءوڭىردىڭ ەڭ ىرى ىقپالداستىعى بولادى. تورتىنشىدەن، ءبىز ەكى ەل اراسىندا قۇرىلاتىن جوبالاردى قولداۋعا باعىتتالعان بىرلەسكەن كوميتەت قۇرۋعا دايىنبىز. بۇل - وتە ماڭىزدى. ەگەر ول كوميتەت قۇرىلاتىن بولسا، وعان كىم جاۋاپكەرشىلىك الاتىنىن انىقتاۋىمىز قاجەت جانە بىزگە بىرنەشە مارتە كەزدەسۋ قاجەت بولادى»، - دەپ تۇيىندەدى ءسوزىن ق ر پرەمەر- ءمينيسترى.

بۇگىنگى بيزنەس- فورۋم بارىسىندا قازاقستان مەن ءۇندىستاننىڭ ساۋدا- ەكونوميكالىق، ينۆەستيتسيالىق قارىم- قاتىناستارىنىڭ جول كارتاسى جاسالدى. وعان جالپى 30-عا تارتا بىرلەسكەن جوبا ەنىپ وتىر. سونىمەن قاتار، قازاقستان مەن ءۇندىستان كاسىپكەرلەرى مەن ىرى كومپانيالارى اراسىندا 12 كەلىسىمشارتقا قول قويىلدى.

 اۆتور: جاسۇلان جولدىبايەۆ