ق ر پرەزيدەنتى «قازاقستان بارىسى» جەڭىمپازى بەيبىت ىستىبايەۆقا التىن «تايتۇياق» تاپسىردى
باس جۇلدەمەن قوسا جەڭىمپازعا تۋرنيردىڭ 150 مىڭ دوللار اقشالاي سىيلىعى تاپسىرىلدى. جۇلدەنى تابىس ەتە وتىرىپ، مەملەكەت باسشىسى ن. نازاربايەۆ بىرنەشە جىلدان بەرى تاۋەلسىزدىگىمىزدىڭ نىشانى رەتىندە قازاق كۇرەسى قايتادان جاندانعانىن اتاپ ءوتتى.
«بۇل ءبىزدىڭ سالتىمىزبەن، عۇرپىمىزبەن بىرگە قايناعان، ەر بالالاردىڭ ەرمەگى بولاتىن. بابالارىمىز كۇش سىناستىرىپ، ءوزارا شىڭداپ، وتان قورعاۋعا وسىلاي بالالارىن ۇيرەتەتىن ەدى. ءار قازاق ءوز بالاسىن كۇرەسكە باۋليتىن. بۇل سودان قالعان ۇشقىن قازىر ۇلكەن مەرەكەگە اينالىپ وتىر. ال سوناۋ حانداردان قالعان سالتتىڭ ءبىرى جەڭىسكەر پالۋانعا تايتۇياق التىن تاپسىرۋ ەدى. مەن دە وسى سالتتى ورىنداي وتىرىپ، بەيبىت ىستىبايەۆقا جۇلدەنى تاپسىرامىن»، دەدى ن. نازاربايەۆ.
سونىمەن قاتار، پرەزيدەنت ۇلت تاريحىندا اتى قالعان قاجىمۇقان، بالۋان شولاق سەكىلدى پالۋاندار بۇگىنگى ۇرپاقتىڭ اراسىنان شىعىپ جاتقانىنا دا قۋانىشتى ەكەنىن جەتكىزدى.
«ءبىزدىڭ كۇرەسىمىز دۇنيەجۇزىلىك ارەناعا شىعىپ، قۇرلىقتارعا تاراپ، قازاقتىڭ ۇلتتىق كۇرەسى رەتىندە سانالاتىنىنا سەنىمدىمىن. سولاي بولسىن دەپ تىلەيمىن. كۇرەسكە قاتىناسقان بارلىق وبلىستار مەن اۋداندارداعى پالۋانداردى، بۇگىنگى كۇنى كىلەمگە شىعىپ، كۇش سىناسقان ازاماتتارىمىزدى قۇشاقتاپ تۇرىپ، شىن جۇرەگىمنەن قۇتتىقتايمىن. بۇل ەلىمىزدىڭ جۇرەگى، حالقىمىزدىڭ تىرەگى، ەل ورداسى - استانانىڭ تۋعان كۇنى قارساڭىندا جاسالىپ وتىرعان ۇلكەن قۇرمەت. وسى پالۋاندارىمىزدى بارشا قازاقستان تاماشالاپ كوردى. مەرەيلەرى تولىپ، جۇرت قازاق جىگىتتەرىنە ءسۇيسىنىپ وتىر. لايىم وسىلاي بولسىن! قازاقتىڭ ۇلاندارى وسىنداي سايىسكەر كۇشتى بولىپ، جامان ادەتتەن ارىلىپ، جاقسىمەن ءجۇرسىن! مەن وسى كۇرەستى شىن جۇرەگىمنەن قولدايمىن. بولاشاقتا وركەنى ءوسىپ، اياسى كەڭەيە تۇسەدى دەپ سەنەمىن!»، - دەدى نۇرسۇلتان نازاربايەۆ.
ەلباسى تۋرنير جەڭىمپازدارىمەن بىرگە سۋرەتكە ءتۇستى.
ەسكە سالا كەتەيىك، بەيبىت ىستىبايەۆ 2012- جىلى دا وسى اتاقتى جەڭىپ الىپ، ارادا ءۇش جىلدان سوڭ وسى جەڭىسىن قايتالاپ، 2015 جىلعى «قازاقستان بارىسى» اتاندى. سونىمەن قاتار، رۋسلان ءابدىرازاقوۆ كۇمىس جۇلدەگەر، استانالىق عاني سەيدىلدايەۆ قول جۇلدەگەر اتاندى.
اۆتور: قانات مامەتقازى ۇلى
