ءبىرقاتار مەملەكەتتەر باسشىلارى ن.نازاربايەۆتى تۋعان كۇنىمەن قۇتتىقتادى
استانا. قازاقپارات - قازاقستان رەسپۋبليكاسى پرەزيدەنتىنىڭ تۋعان كۇنىنە بايلانىستى شەتەلدىك مەملەكەتتەر باسشىلارىنان قۇتتىقتاۋلار كەلىپ تۇسۋدە،
دەپ حابارلايدى اقوردانىڭ باسپاءسوز قىزمەتىنەن.
رەسەي فەدەراتسياسى پرەزيدەنتى ۆلاديمير پۋتيننىڭ قۇتتىقتاۋىندا نۇرسۇلتان نازاربايەۆتىڭ قازاقستاندا عانا ەمەس، سىرتقى الەمدە دە زور قۇرمەت پەن بەدەلگە يە ەكەنى اتاپ وتىلگەن.
«ءسىز پرەزيدەنتتىك لاۋازىمدا جۇمىس ىستەگەن جىلدارى ەلدەگى تاتۋلىق پەن كەلىسىمدى قامتاماسىز ەتىپ، زاماناۋي دەموكراتيالىق مەملەكەت قۇرا الدىڭىز. ءسىزدىڭ باسشىلىعىڭىزبەن رەسپۋبليكا الەۋمەتتىك-يەكونوميكالىق جانە عىلىمي-تەحنيكالىق پروگرەسس جولىمەن سەنىمدى ءجۇرىپ كەلەدى، وزەكتى حالىقارالىق ماسەلەلەردى شەشۋگە بەلسەنە قاتىسادى»، - دەلىنگەن قۇتتىقتاۋدا.
ۆ.پۋتين ەكى ەلدىڭ اراسىنداعى وداقتاستىق قارىم-قاتىناستاردى جانە ستراتەگيالىق سەرىكتەستىكتى دامىتۋعا قازاقستان پرەزيدەنتىنىڭ قوسقان جەكە ۇلەسى بارشاعا ءمالىم ەكەنىن اتاپ ايتتى.
«ءسىز ءۇشىن مەرەيتوي جىلىندا ەۋرازيالىق ەكونوميكالىق وداق تۋرالى يدەياڭىزدىڭ ءىس جۇزىنە اسقانىنا شىنايى قۋانىشتىمىن. وسىناۋ اۋقىمدى جوبانى ودان ءارى جۇزەگە اسىرۋ كوپجاقتى ىنتىماقتاستىقتى، بۇكىل ەۋرازيا كەڭىستىگىندەگى تاتۋ كورشىلەستىكتى جانە ءوزارا تۇسىنىستىكتى نىعايتۋعا سەپتىگىن تيگىزەتىنىنە سەنىمدىمىن. ءبىزدىڭ دوستىق، سىندارلى قاتىناستارىمىزدى جوعارى باعالايمىن جانە سىزبەن بىرلەسكەن جۇمىس جالعاسادى دەپ ۇمىتتەنەمىن» - دەپ اتاپ ءوتتى رەسەي پرەزيدەنتى.
سوڭىندا ۆ.پۋتين نۇرسۇلتان نازاربايەۆقا دەنساۋلىق، ۇزاق عۇمىر، باقىت، سارقىلماس قۋات جانە قازاقستان حالقىنىڭ يگىلىگى ءۇشىن جاڭا بيىكتەرگە جەتۋىن تىلەدى.
***
قىتاي حالىق رەسپۋبليكاسىنىڭ ءتوراعاسى شي جينپيث قازاقستان مەن قىتاي قارىم-قاتىناستارى سوڭعى جىلدارى قارقىندى دامىپ كەلە جاتقانىنا نازار اۋدارعان.
«ەلدەرىمىزدىڭ اراسىنداعى ساياسي سەنىم دە تەرەڭدەي ءتۇسىپ، ىنتىماقتاستىقتىڭ ءتۇرلى سالالارىندا ەلەۋلى ناتيجەلەرگە ءۇشىن جاعداي تۋعىزىپ وتىر سىزبەن بىرلەسىپ مەملەكەتتەرىمىزدىڭ تۇراقتى بايلانىسىن قامتاماسىز ەتۋگە، قارىم-قاتىناستاردى جاڭا دەڭگەيگە كوتەرۋگە، سونداي-اق قازاقستان مەن قىتاي اراسىنداعى ەكىجاقتى ستراتەگيالىق سەرىكتەستىكتى ەكى ەلدىڭ حالقىنىڭ يگىلىگى جولىندا كەڭەيتۋگە ءازىر ەكەنىمدى بىلدىرەمىن»، - دەلىنگەن قۇتتىقتاۋدا.
شي جينپيث سونداي-اق ش ى ۇ-نىڭ ۋفادا وتەتىن الداعى سامميتىندەگى كەزدەسۋدى تاعاتسىزدانا كۇتەتىنىن اتاپ وتكەن.
ول دا نۇرسۇلتان نازاربايەۆقا مىقتى دەنساۋلىق پەن باق-بەرەكە تىلەدى.
**
ا ق ش پرەزيدەنتى باراك وباما امەريكا حالقىنىڭ اتىنان مەملەكەت باسشىسىن تۋعان كۇنىمەن قۇتتىقتادى.
«وسى ايرىقشا وقيعانى وتباسىڭىز بەن دوستارىڭىزدىڭ ورتاسىنا اتاپ ءوتىپ جاتقان كۇنى ءسىزدى مىناعان سەندىرگىم كەلەدى: مەن ەكى ەلدىڭ ماڭىزدى قارىم-قاتىناستارى ءبىزدىڭ حالىقتارىمىزدىڭ يگىلىگى ءۇشىن ودان ءارى دامي بەرەتىنىنە كۇمان جوق»، - دەلىنگەن قۇتتىقتاۋدا.
ب.وباما نۇرسۇلتان نازاربايەۆقا مىقتى دەنساۋلىق جانە باقىت تىلەدى.
***
ازەربايجان رەسپۋبليكاسىنىڭ پرەزيدەنتى يلحام اليەۆ قازاقستاننىڭ تاۋەلسىزدىك تاريحى نۇرسۇلتان نازاربايەۆتىڭ ەسىمىمەن بايلانىستى ەكەنىن اتاپ وتكەن.
«وسى جىلدارى ءسىزدىڭ كەمەڭگەرلىگىڭىزدىڭ، ساياسي كورەگەندىگىڭىز بەن باسشىلىعىڭىزدىڭ ارقاسىندا حالىقارالىق ارەنادا بيىك بەدەلگە، قازاقستاننىڭ مەملەكەتتىگىن نىعايتۋ سالاسىندا ۇلكەن ناتيجەلەرگە، الەۋمەتتىك پروگرەسس سالاسىندا جان-جاقتى دامۋعا قول جەتكىزىلدى»، - دەلىنگەن قۇتتىقتاۋدا.
ي.الييەۆ ەكى حالىقتىڭ دوستىق قارىم-قاتىناستارىنىڭ تاريحي تامىرى تەرەڭدە جاتقانىن دا ايتتى.
«ءبىزدىڭ يگى ءداستۇر مەن سەرىكتەستىك نەگىزىندە قۇرىلعان مەملەكەتارالىق قارىم-قاتىناستارىمىز بۇگىندە تابىستى دامىپ كەلەدى. ازەربايجان مەن قازاقستاننىڭ اراسىنداعى دوستىقتى نىعايتىپ، ەكىجاقتى قارىم-قاتىناستاردى دامىتۋداعى ءسىزدىڭ ەڭبەگىڭىزگە باعا جەتپەيدى»، - دەلىنگەن حاتتا.
ازەربايجان پرەزيدەنتى دە نۇرسۇلتان نازاربايەۆقا مىقتى دەنساۋلىق، باقىت جانە قازاقستان حالقىنىڭ باقۋاتتىلىعىن قامتاماسىز ەتۋ جولىنداعى قىزمەتىنە تابىس تىلەدى.
** *
الەكساندر لۋكاشەنكو بەلارۋس رەسپۋبليكاسىندا نۇرسۇلتان نازاربايەۆتى دارىندى باسشى جانە الەمدىك اۋقىمداعى ساياساتكەر رەتىندە بىلەتىنىن ءايتقان.
«ءسىز وزىڭىزگە ءتان قۋاتتى ومىرلىك يەنەرگيا مەن جۇمىلدىرۋشى قاسيەت ارقىلى ەلىڭىزدىڭ تاريحىنداعى جارقىن بەتتەردى جازىپ جاتىرسىز. قازاقستان حالقى ءسىزدىڭ باستامالارىڭىزدى، مەملەكەتتىك ساياسات ستراتەگياڭىزدى، كاسىبي دەڭگەيىڭىز بەن كەمەڭگەرلىگىڭىزدى جوعارى باعالايدى. ەۋرازيالىق ىقپالداستىقتى ودان ءارى نىعايتۋ، ەكى ەلدىڭ ىنتىماقتاستىعىن تەرەڭدەتۋ جانە بىرلەسكەن جوبالاردى جۇزەگە اسىرۋ ەلدەرىمىزدىڭ تابىستى دامۋى مەن وركەندەۋىن قامتاماسىز ەتۋ ءۇشىن جاڭا مۇمكىندىكتەرگە جول اشاتىنىنا سەنىمدىمىن»، - دەلىنگەن قۇتتىقتاۋدا.
بەلارۋس پرەزيدەنتى دە نۇرسۇلتان نازاربايەۆقا مىقتى دەنساۋلىق، باقىت جانە بەرەكە، جاۋاپتى قىزمەتىنە جاڭا تابىستار تىلەدى.
***
ءوز قۇتتىقتاۋىندا قىرعىز رەسپۋبليكاسىنىڭ پرەزيدەنتى المازبەك اتامبايەۆ نۇرسۇلتان نازاربايەۆتىڭ باي ومىرلىك جانە كاسىبي تاجىريبەسى، ادامي جەكە قاسيەتتەرى مەن حالىقارالىق بەدەلى تابىستى مەملەكەتتىك قىزمەتتىڭ كەپىلى، سونداي-اق باۋىرلاس قازاقستان حالقىنىڭ وسىپ-وركەندەۋى جولىنداعى قالتقىسىز قىزمەت ەتۋدىڭ ۇلگىسى ەكەنىن ءايتادى.
«ءسىزدى قايراتكەرلىگى بۇكىل جەر شارىنداعى بەيبىتشىلىكتىڭ نىعايۋىنا باعىتتالعان ءوڭىردىڭ داۋسىز كوشباسشىسى، ءتىپتى الەمدىك اۋقىمداعى كوشباسشىلاردىڭ ءبىرى دەپ سانايمىن. ءسىزدىڭ سارا ساياساتىڭىزدىڭ، ۇيىمداستىرۋشى جانە ساياسي باسشى رەتىندەگى دارىنىڭىزدىڭ ارقاسىندا قازاقستان بۇگىندە الەمدىك ارەنادا لايىقتى ورىن الىپ وتىر. بۇگىنگى تاڭدا ناقتى ءمان-ماڭىزعا تولى قىرعىز-قازاق وداقتاستىق قارىم-قاتىناسىنىڭ جانە ستراتەگيالىق سەرىكتەستىگىنىڭ نىعايۋىنا قوسقان ءسىزدىڭ باعا جەتپەس ۇلەسىڭىزدى قاناعاتتانۋشىلىقپەن اتاپ ايتقىم كەلەدى»، - دەلىنگەن حاتتا.
ا.اتامبايەۆ ەكى ەل اراسىندا قالىپتاسقان سەنىم مەن دوستىقتىڭ بيىك دەڭگەيىن جوعارى باعالاپ، باۋىرلاس حالىقتارىمىزدىڭ يگىلىگى ءۇشىن ءوزارا ىقپالداستىقتىڭ جەمىستى جالعاساتىنىنا سەنىم بىلدىرگەن. سوڭىندا قىرعىزستان پرەزيدەنتى مەملەكەت باسشىسىنا مىقتى دەنساۋلىق، سارقىلماس قۋات جانە مەملەكەتتىك قىزمەتىنە الدا دا تابىس تىلەدى.
***
قازاقستان پرەزيدەنتىنىڭ اتىنا تاجىكستان رەسپۋبليكاسىنىڭ پرەزيدەنتى يەمومالي راحموننان دا قۇتتىقتاۋ كەلىپ ءتۇستى، ول قازاقستاننىڭ كورنەكتى مەملەكەت قايراتكەرى رەتىندەگى نۇرسۇلتان نازاربايەۆتىڭ كوپقىرلى جاسامپاز قىزمەتى ونى بۇكىل الەمدىك قۇرمەتكە بولەگەنىن اتاپ وتكەن.
«قازاقستاننىڭ تاۋەلسىزدىك جىلدارىنداعى، دەموكراتيا جانە پروگرەسس جولىنداعى بارلىق باستى جەتىستىكتەرى مەن تابىستارى ءسىزدىڭ اتىڭىزبەن بايلانىستى. تاجىكستاندا ءسىزدى جاڭا تاريحي كەزەڭدەگى ءبىزدىڭ ەكى ەلدىڭ ءداستۇرلى دوستىق قارىم-قاتىناسى مەن ءوزارا ءتيىمدى ىنتىماقتاستىعىن ورنىقتىرۋ مەن ۇدەمەلى دامىتۋدىڭ باتىل جاقتاۋشىسى رەتىندە بىلەدى، تاجىكستان مەن قازاقستاننىڭ كوپقىرلى سەرىكتەستىگىن نىعايتۋعا ءسىزدىڭ قوسقان ۇلەسىڭىز وراسان. ەلدەرىمىز بەن حالىقتارىمىز اراسىنداعى ءوزارا ىقپالداستىقتى ارتتىرۋعا جانە ونىڭ اياسىن كەڭەيتۋگە ءسىز الدا دا سەپتىگىڭىزدى تيگىزە بەرەسىز دەپ سەنەمىن. ءبىز دە ءوز تاراپىمىزدان وسىناۋ يگى ماقساتقا قول جەتكىزۋ ءۇشىن قاجەتتىنىڭ ءبارىن جاسايتىن بولامىز»، - دەلىنگەن جەدەلحاتتا.
سونداي-اق يە.راحمون مەملەكەت باسشىسىنا مىقتى دەنساۋلىق، ادامي باقىت، مەملەكەتتىك قىزمەتىنە جاڭا جەتىستىكتەر، ال باۋىرلاس قازاقستان حالقىنا باق-بەرەكە تىلەدى.
***
وزبەكستان رەسپۋبليكاسىنىڭ پرەزيدەنتى يسلام كارىموۆتىڭ قۇتتىقتاۋىندا قازاقستاننىڭ قوعامدىق-ساياسي ءومىردى رەفورمالاۋداعى ەلەۋلى تابىستارىن، ەلدىڭ يەكونوميكالىق، عىلىمي-تەحنيكالىق جانە ينتەللەكتۋالدىق زور الەۋەتىن بەلسەنە جۇزەگە اسىرۋىن، سونداي-اق حالىقارالىق ارەناداعى بەدەلىنىڭ نىعايۋىن وزبەكستان حالقىنىڭ اسقان قاناعاتتانۋشىلىقپەن باعالاپ وتىرعانى ايتىلعان.
«بۇل جەتىستىكتەردىڭ ءبارى قازاقستاننىڭ مەملەكەتتىلىگىنىڭ نەگىزدەرىن نىعايتۋ باعىتىنداعى ءسىزدىڭ وراسان كۇش-جىگەرىڭىزبەن اجىراعىسىز بايلانىستى ەكەنىنە نىق سەنىمدىمىن. جاقىندا وتكەن، ءسىزدىڭ ىشكى جانە سىرتقى ساياساتىڭىزدى قازاقستان حالقىنىڭ قولدايتىنىن، جوعارى سەنىمىن تاعى دا كورسەتكەن سايلاۋ ناتيجەلەرى مۇنى ايقىن ايعاقتايدى»، - دەلىنگەن حاتتا.
ي.كارىموۆ ءداستۇرلى جانە ۋاقىت سىنىنان وتكەن دوستىق، تاتۋ كورشىلەستىك، ءوزارا قۇرمەت الداعى ۋاقىتتا دا كوپقىرلى قازاقستان-وزبەكستان قارىم-قاتىناسىنىڭ قارىشتى دامۋى مەن نىعايۋىنا، وڭىردەگى تۇراقتىلىق پەن قاۋىپسىزدىكتىڭ قامتاماسىز ەتىلۋىنە بەرىك نەگىز بولىپ قالا بەرەتىنىنە سەنىم بىلدىرگەن.
«وسى مۇمكىندىكتى پايدالانا وتىرىپ، سىزگە مىقتى دەنساۋلىق، باقىت، مەملەكەتتىك قىزمەتىڭىزگە تابىس، ال باۋىرلاس قازاقستان حالقىنا يگىلىك پەن باق-بەرەكە تىلەگىم كەلەدى»، - دەلىنگەن جەدەلحاتتا.
***
رەسەي فەدەراتسياسى ۇكىمەتىنىڭ ءتوراعاسى دميتريي مەدۆەديەۆتىڭ قۇتتىقتاۋىندا نۇرسۇلتان نازاربايەۆتىڭ ەسىمى قازاقستان رەسپۋبليكاسىنىڭ تاريحىمەن تىكەلەي بايلانىستى ەكەنى اتاپ وتىلگەن.
«ءسىز ناعىز پاتريوت جانە كورنەكتى مەملەكەت قايراتكەرى رەتىندە بار كۇشىڭىزدى وتانىڭىزعا قىزمەت ەتۋگە جۇمساپ كەلەسىز. قازاقستاننىڭ الەۋمەتتىك-يەكونوميكالىق دامۋىنىڭ ءسىزدىڭ باسشىلىعىڭىزبەن ازىرلەنگەن جاڭا اۋقىمدى جوسپارى تابىستى جۇزەگە اساتىنىنا سەنىمدىمىن. رەسەي-قازاقستان وداقتاستىعى مەن ستراتەگيالىق سەرىكتەستىگىن قالىپتاستىرۋ مەن نىعايتۋداعى ءسىزدىڭ جەكە ۇلەسىڭىزدى باعالاماۋ قيىن. ەۋرازيالىق يەكونوميكالىق وداقتى قۇرۋداعى ءسىزدىڭ ءرولىڭىزدى ايرىقشا اتاپ وتكىم كەلەدى.
«بەستىك» ەلدەرى ۇكىمەت باسشىلارىنىڭ تاياۋدا قازاقستاندا وتكەن كەزدەسۋى، ۆەتناممەن ەركىن ساۋدا ايماعىن قۇرۋ تۋرالى كەلىسىمگە قول قويىلۋى ىقپالداستىق ءىس-قيمىلداردى جاڭا دەڭگەيگە كوتەردى»، - دەلىنگەن حاتتا. د.مەدۆەديەۆ قازاقستان پرەزيدەنتىمەن اشىق ءارى سىندارلى سيپاتتا وتەتىن كەزدەسۋلەردى جىلى لەبىزبەن ەسكە الاتىنىن ايتتى.
«ءسىزدىڭ ساياسي كەمەلدىگىڭىز بەن كورەگەندىگىڭىز ەڭ كۇردەلى ماسەلەلەردىڭ وڭتايلى شەشىمىن تابۋعا مۇمكىندىك بەرەدى. سىزبەن اراداعى جەمىستى قارىم-قاتىناستى شىن نيەتىممەن قۋانا جالعاستىرامىن»، - دەپ جازادى اۆتور.
سوڭىندا نۇرسۇلتان نازاربايەۆقا رەسەي فەدەراتسياسى ۇكىمەتىنىڭ ءتوراعاسى مىقتى دەنساۋلىق، باقىت جانە جاۋاپتى مەملەكەتتىك قىزمەتىنە ءارى قاراي دا تابىس تىلەدى
