ەلباسى: ەۋرازيا جاۋھارىنا اينالعان استانا ەلىمىزدى بيىك بەلەستەرگە جەتەلەپ وتىر - فوتو
بۇل تۋرالى بۇگىن ەلباسى نۇرسۇلتان نازاربايەۆ استانادا جىل سايىنعى ءداستۇر بويىنشا «اتامەكەن» ەتنو- مەموريالدى كەشەن الاڭىندا مەملەكەتتىك تۋ كوتەرۋ سالتاناتتى شاراسىندا ءمالىم ەتتى.
ايتا كەتەيىك، مەملەكەتتىك تۋدى كوتەرۋ راسىمىنەن كەيىن استانانىڭ 17 جىلدىعىن مەرەكەلەۋ رەسمي تۇردە باستالادى.
«باس قالا تورىندە جەلبىرەگەن باس بايراق ەلدىگىمىزدىڭ ەڭ نەگىزگى نىشاندارىنىڭ ءبىرى بولىپ سانالادى. ارنايى تۋ كوتەرۋ ءداستۇرى ايرىقشا ءمانى بار وقيعا، ايشىقتاي تۇسەتىن ماڭىزدى ءراسىمىمىز بولىپ سانالادى. تۋدى تۇعىرعا قوندىرۋ سالتاناتى ەلوردا تاريحىنىڭ تاعى ءبىر پاراعى بولادى. وسى ارقىلى ءبىز جىلداعى ءداستۇر بويىنشا استانا كۇنىن تويلاۋدى باستايمىز. ەلىمىزدىڭ جۇرەگى، تاۋەلسىزدىگىمىزدىڭ تىرەگى - استانانىڭ مەرەكەسى بۇكىل قازاقستاندىقتاردىڭ مەرەكەسى ەكەنىن بىلەسىزدەر. باس قالامىز تۇتاس ەل دامۋىنا سەرپىن بەرگەن، كەمەل كەلەشەككە جول اشقان قاستەرلى بويتۇمارىمىز.
بۇگىن شىن مانىندە ەۋرازيا جاۋھارىنا اينالعان استانا ەلىمىزدى بيىك بەلەستەرگە جەتەلەپ وتىر. جاھان جۇرتىنىڭ نازارى اۋعان حالىقارالىق شارالاردىڭ ەلوردا تورىندە ءوتۋى سونىڭ بەلگىسى. ءبىز تاۋەلسىزدىك جىلدارى جاڭا استانا سالۋ ارقىلى حالقىمىزدىڭ جاسامپاز قۋاتىن دۇنيەجۇزىنە پاش ەتتىك. ەندىگى مۇراتىمىز بىرلىگى جاراسقان وتانىمىزدى «ماڭگىلىك ەل» ەتۋ. ول ءۇشىن ءاربىر ازامات تاتۋلىق پەن تۇراقتىلىقتى قولداۋشىسى بولۋى ءتيىس»، - دەدى پرەزيدەنت.
وسى ورايدا ەلباسى مەملەكەتتىك تۋعا قۇرمەت - ەلگە قۇرمەت ەكەنىن قاداپ ايتتى. ءبىز تۋدى ەڭسەلى ەلدىك پەن ەرەن ەرلىكتىڭ ەرەكشە بەلگىسى دەپ قاستەرلەيتىندىگىمىزدى، بۇل ەلىمىزگە بابالارىمىز ميراس ەتكەن داستۇرلەردىڭ ءبىرى ەكەنىن اتاپ ءوتتى.
اۆتور: رۋسلان عابباسوۆ
