تاتارستان استاناسى قازان قالاسىنىڭ ورتالىق كوشەلەرىنىڭ بىرىنە ەلباسى ن. نازاربايەۆتىڭ ەسىمى بەرىلدى
وسى سالتاناتتى شاراعا ارنالعان جيىن قازان قالاسىنداعى دوستىق ۇيىندە ءوتىپ، وعان تاتارستان پرەزيدەنتىنىڭ مىندەتىن اتقارۋشى رۋستام ميننيحانوۆ، قازاقستاننىڭ رەسەيدەگى توتەنشە جانە وكىلەتتى ەلشىسى مارات ءتاجين قاتىستى، دەپ حابارلايدى "قازاقپارات" ءتىلشىسى.
«ەڭ ءبىرىنشى كەزەكتە تاتارستان باسشىلىعىنا، وسى باستامانى كوتەرگەن قوعامدىق ۇيىمدارعا، قازان بيلىگىنە قالانىڭ ورتالىق كوشەلەرىنىڭ بىرىنە نۇرسۇلتان ءابىش ۇلى نازاربايەۆتىڭ ەسىمىن بەرۋ باعىتىنداعى قايىرىمدى شارالارى ءۇشىن شىنايى ريزاشىلىعىمدى بىلدىرگىم كەلەدى.
قالالار ادامدار سياقتى ورتاق ەرەكشەلىككە يە. ولار دۇنيەگە كەلەدى، ءومىر سۇرەدى، گۇلدەنەدى، قارتايادى.
ءبىراق، قازان ءار ۋاقىتتا دا كورىكتى قالا بولىپ قالا بەرەدى. مەن وسىدان ءبىراز بۇرىن قازان قالاسىنىڭ مىڭ جىلدىعى اتالىپ وتىلگەنىن بىلەمىن. ول بارشا ەۋرازيا كەڭىستىگىن قامتىعان ماڭىزدى مادەني، قوعامدىق وقيعاعا اينالعان بولاتىن. ويتكەنى، قازان - ەرەكشە قالا، الەمدىك تاريحى بار. الەمدىك مادەنيەتتە ەرەكشە ورنى بار تاريحي قالا»، - دەپ اتاپ ءوتتى قازاقستان ەلشىسى.
وسى رەتتە م. ءتاجين ەۋرازيا قۇرىلىعىنىڭ كونە ءارى بەدەلدى قالالارىنىڭ ءبىرى قازاننىڭ ورتالىق كوشەلەرىنىڭ بىرىنە قر پرەزيدەنتىنىڭ ەسىمىن بەرۋ شىن مانىندە اۋقىمدى ءارى ماڭىزدى وقيعالاردىڭ ءبىرى ەكەندىگىن باسا اتاپ ءوتتى. سونىمەن قاتار ول تاياۋدا ماسكەۋ قالاسىندا «جاسامپاز. نۇرسۇلتان نازاربايەۆ: رەسەيدەن كوزقاراس» («سوزيداتەل. نۋرسۋلتان نازاربايەۆ: ۆزگلياد يز روسسيي» ) اتتى جاڭا كىتاپتىڭ تۇساۋكەسەرى بولىپ وتكەندىگىن، وندا رەسەي پرەزيدەنتى ۆ. پۋتيننەن باستاپ ەلۋدەن استام رەسەيلىك مەملەكەت جانە قوعام، مادەنيەت، عىلىم قايراتكەرلەرى قازاقستان پرەزيدەنتى جايىندا تۇشىمدى پىكىر بىلدىرگەنىن ەسكە سالدى.
«ءبىزدىڭ سالتاناتتى شارامىز دوستىق ۇيىندە ءوتۋىنىڭ نىشاندىق ءمانى بار. ويتكەنى، نۇرسۇلتان ءابىش ۇلىنىڭ ۇلتارالىق قارىم- قاتىناستى دامىتۋ، ۇلتارالىق كەلىسىمدى ساقتاۋ باعىتىنا قوسقان زور ۇلەسى بۇۇ، يۋنەسكو تاراپتارىنان ءوز باعاسىن العان بولاتىن. بۇگىن ءبىزدىڭ حالىقتارىمىزدى تاريحى ورتاقتاستىق بايلانىستىراتىندىعى ايتىلدى. شىندىعىندا دا، ءبىزدىڭ حالىقتارىمىزدىڭ بىرنەشە عاسىرعا سوزىلعان قارىم- قاتىناسىندا ەكى ءىرى ۇلتتىڭ، ەتنوستىڭ اراسىندا بىردە- ءبىر ايتارلىقتاي قاراما- قايشىلىقتىڭ تۋىنداماۋى تاريحي ناقتى دەرەك. وسىناۋ بەيبىتشىلىك پەن كەلىسىم ءداستۇرى قازاقستاندا دا، تاتارستاندا دا ساقتالىپ وتىر»، - دەدى ول.
اۆتور: مارلان جيەمباي
