پرەزيدەنت ۇكىمەتكە ەكونوميكا ءوسىمى قارقىنىنىڭ تومەندەۋىنە جول بەرمەۋدى تاپسىردى
«جاڭا بەسجىلدىق اياسىندا ءبىرقاتار يندۋستريالدىق جوبالاردى ىسكە قوسىپ جاتىرمىز. الدا اتقارىلاتىن ىستەر قازاقستاننىڭ ەكونوميكاسىن ودان ارى دامىتۋعا ۇلەسىن تيگىزەتىن بولادى. ەلىمىزدىڭ الەۋەتىن ارتتىرا ءتۇسۋ ءۇشىن بۇل ساياساتتى جۇزەگە اسىرۋدىڭ ماڭىزى قازاقستان ءۇشىن وتە زور. بۇگىنگى باس قوسۋ وسى باعىتتاعى مىندەتتەردىڭ ورىندالۋ باعدارلاماسىن، ىسكە قوسىلاتىن وندىرىستەر جايىندا، ءونىم ساپاسى مەن شەتەلگە شىعارىلاتىن تۋارلار تۋرالى تالقىلايمىز»، - دەدى پرەزيدەنت.
«مەن وسى ماسەلەلەرگە ەرەكشە نازار اۋدارىپ وتىرمىن. ەڭ باستىسى، ەكونوميكا ءوسىمى قارقىنىنىڭ تومەندەۋىنە جول بەرمەۋ كەرەك. سوندىقتان باستى ماقسات-مىندەتتەردىڭ ورىندالۋى قاداعالاۋدا بولۋى قاجەت»، - دەدى ەلباسى.
ايتا كەتەيىك، بۇگىن «نۇرلى جول» جانە يندۋستريالدى-يننوۆاتسيالىق مەملەكەتتىك باعدارلامالارىنىڭ ىسكە اسىرىلۋ بارىسىنا ارنالعان جالپىۇلتتىق تەلەكوپىر وتۋدە.
شارا اياسىندا جاڭا يندۋستريالدى جانە ينفراقۇرىلىمدىق نىسانداردى ىسكە قوسۋ، سونىمەن بىرگە قۇرىلىسى بارىسىمەن، ينفراقۇرىلىمدىق نىساندار قۇرىلىسىنىڭ باستالۋى تۋرالى تۇساۋكەسەر-تانىستىرىلىمدار جوسپارلانعان. سونداي-اق، قازاقستاندا وندىرىلگەن تاۋارلاردىڭ، يندۋستريالاندىرۋ باعدارلامالارىنىڭ ماڭىزدى جوبالارىنىڭ كورمەسى جانە جەڭىل ونەركاسىپ ونىمدەرىنىڭ كورسەتىلىمى ۇيىمداستىرىلادى.
اۆتور: رۋسلان عابباسوۆ
