ن. نازاربايەۆ: ءبىز ءالى بيلىكتىڭ امەريكالىق تاسىلىنە كەلەتىن بولامىز
اڭگىمە بارىسىندا جۋرناليست ەرلان بەكحوجين ەلدەگى رەفورمالار اياسىندا پرەزيدەنتتىك بەلگىلى ءبىر وكىلەتتىكتەردى ۇكىمەت پەن پارلامەنتكە بەرۋ ماسەلەسىنىڭ كەڭىنەن تالقىلانىپ جاتقانىنا نازار اۋدارتتى. «بۇندا قانداي ناقتى شارالار قامتىلماق؟» دەپ سۇرادى ول.
ءوز كەزەگىندە مەملەكەت باسشىسى بۇل رەفورمالاردىڭ بىرساتتىك ماسەلە ەمەس ەكەنىن اتاپ ءوتتى.
«مەن نە ايتىلىپ جاتقانىن دا بىلەمىن. بىزدە كۇشتى پرەزيدەنتتىك بيلىك دەۋشىلەر كوپ. الايدا، ءبىزدىڭ وسىنداي كۇشتى پرەزيدەنتتىك ۆەرتيكال بيلىگىمىز بىرەۋدى قىسىمعا ۇشىراتىپ، حالىقتى باسىپ جاتقان جوق قوي. كەرىسىنشە، ءبىزدىڭ باعدارلامالار جىلجۋى ءۇشىن، رەفورمالاردى ىلگەرىلەتۋ ءۇشىن مەملەكەتتىك اپپاراتتىڭ حالىققا قىزمەت ەتۋىنە جۇمىس ىستەپ جاتىر. بۇل ءۇشىن دە جوعارىدان تومەن، تومەننەن جوعارى قاتتى ءتارتىپ قاجەت»، - دەدى ن. نازاربايەۆ.
سونىمەن قاتار، ەلباسى وسى جىلدار ىشىندە بۇنداي كۇشتى بيلىكتىڭ قاجەت بولعانىن ايتتى. «قازاقستاندا بىرەۋ ۋكرايناداعى سەكىلدى بولعانىن قالاي ما ەكەن؟ ايتپەسە گرۋزياداعىداي، مولداۆياداعىداي بولعانىن قالايتىندار بار ما؟ ايتىڭىزشى؟ مىنە، ماسەلە وسىندا، ال ول ەلدەردىڭ بارىندە پارلامەنتتىك بيلىك. مەن بۇنى ۇدايى ايتىپ ءجۇرمىن: ءبىز ءالى امەريكالىق تاسىلگە كەلەمىز، ونىڭ ءوز ۋاقىتى جەتۋى كەرەك. ياعني، بۇل ءۇشىن ۋاقىت كەرەك. وسىنى تىڭداعىسى كەلمەيتىندەر تىڭدامايدى دا. ال قانداي ۋاقىت كەرەك؟ بۇل ءۇشىن ورتا بۋىنداعىلار شىعاراتىن ءونىم قازاقستاننىڭ ءونىمىنىڭ جارتىسىنان دا جوعارى بولۋى قاجەت. ورتا بۋىن مەملەكەتتەگى تۇراقتىلىقتى ەڭ مىقتى قولدايتىن توپ. ال ازىرشە بۇل بىزدە جوق. ءقازىر ەركىنە جىبەرىپ كورەيىكشى؟ ! ءبىز بۇنى بۇرناعى جىلدارى كورگەنبىز، اركىم وزىنە قاراي تارتادى، اقىر اياعىندا ەشتەڭە شەشىلمەيدى»، - دەپ ءتۇسىندىردى ەلباسى.
اۆتور: قانات مامەتقازى ۇلى
