رەسەيلىك قازاق سول ەلدەگى قانداستارىمىزدىڭ ءومىرى جايلى ايتىپ بەردى

استانا. قازاقپارات - رەسەيدىڭ استراحان وبلىسىندا تۇراتىن ەتنيكالىق قازاق بالسۇلۋ قيسىمەت قىزى ول ايماقتاعى قانداستارىنىڭ مادەني-الەۋمەتتىك احۋالى تۋرالى ايتتى.

استراحانداعى قازاقتاردىڭ «جولداستىق» مادەني قوعامىنىڭ مۇشەسى بالسۇلۋ قيسىمەت قىزىنىڭ ايتۋىنشا، 1990 -جىلى استراحان وبلىسى ۆولودار اۋدانىنا جۇمىسقا بارىپ، سول جاقتا تۇراقتاپ قالعان.

قيسىمەت قىزى ول جاقتاعى قازاقتار مادەنيەتى مەن ءداستۇرىن بەرىك ۇستانىپ كەلەتىنىن ايتتى. سوعان وراي قازاقتاردىڭ مادەنيەتى مەن ءداستۇرىن دامىتۋ ماقساتىندا 1990 -جىلى «جولداستىق» قوعامى دا قۇرىلعان. سونىمەن بىرگە ول «شالقىما» اتتى قازاق ۇلتتىق اسپاپتار انسامبلىندە ءبيشى بولعانىن كەيىن «اتامەكەن» اتتى تەلەباعدارلاما اشىلىپ، سونى جۇرگىزەتىنىن ايتتى.

«1995 -جىلى ۆولوداردا ەكى تىلدە حابار تاراتاتىن اۋداندىق تەلەارنا اشىلعاندا سوندا قازاقشا باعدارلاما جۇرگىزدىم. اۋداندىق «اق ارنا» گازەتىنىڭ جانىنان اشىلعان تەلەارنا كەيىن ليتسەنزيالىق باعىتىنا بايلانىستى توقتاپ قالدى. ال گازەت ءالى كۇنگە دەيىن شىعىپ كەلەدى. قازىر استراحان قازاقتارى قازاقشا حابارلاردى قازاقستاننان تاراتىلاتىن «وتاۋ-ت ۆ» سپۋتنيكتىك تەلەارناسىنان كورەدى»، - دەيدى ول.

قيسىمەت قىزى «جولداستىق» قوعامى قۇرىلعالى بەرى 25 جىلدىڭ ىشىندە كوپتەگەن جۇمىستار اتقارىلعانىن جەتكىزدى. قوعامىنىڭ ۇيىتقى بولۋىمەن قۇرمانعازى ساعىرباي ۇلىنا كەسەنە سالىنعان. كەيىن كۇيشىنىڭ اتىنداعى مۋزەي، ورتالىق، ساز مەكتەبى اشىلىپتى.

اۋىلدىق جەرلەردەگى ورتا مەكتەپتەردە دە قازاق سىنىپتارى تۇراقتى جۇمىس ىستەپ كەلەدى ەكەن.

ودان باسقا وبلىستىق پەداگوگيكالىق كوللەدجدە قازاق ءتىلى ءبولىمى اشىلعان. اۋىلدىق جەرلەردەگى ورتا مەكتەپتەردە دە قازاق سىنىپتارى تۇراقتى جۇمىس ىستەپ كەلەدى ەكەن. مەكتەپتەردە دومبىرا ۇيىرمەلەرى جۇمىس ىستەيدى. سونداي-اق، قازاق تىلىنەن وبلىستىق، اۋداندىق وليمپيادالار وتكىزىلىپ تۇرادى ەكەن.

سونداي- اق، قيسىمەت قىزى 2012 -جىلعى ساناق بويىنشا، استراحاندا 170 مىڭداي قازاق تۇراتىنىن، ولاردىڭ اراسىندا قازاقستانعا ورالىپ جۇمىس ىستەگىسى كەلەتىندەر دە، كوشىپ جاتقاندارى دا بارىن اتاپ ءوتتى.

بالسۇلۋدىڭ ايتۋىنشا ونداعى قازاقتاردىڭ الەۋمەتتىك جاعدايى جاقسى. ستۋدەنتتەر وقۋىن وقىپ، [جۇمىسى بارلار] جۇمىستارىن جاساپ، جۇمىسسىزدار بيرجا ارقىلى جۇمىس تاۋىپ، اركىم ءوزىنىڭ الەۋمەتتىك جاعدايىن ءارتۇرلى شەشىپ جاتقانىن جەتكىزدى.

استراحاندا وقۋشىلار باستاۋىش سىنىپتان باستاپ 9-سىنىپقا دەيىن قازاق ءتىلىن ءپان رەتىندە وقيدى

«استراحاندا وقۋشىلار باستاۋىش سىنىپتان باستاپ 9-سىنىپقا دەيىن قازاق ءتىلىن ءپان رەتىندە وقيدى. ارينە، بالالار قازاق ءتىلىنىڭ كەرەمەت مامانى بولىپ شىقپاسا دا، انا تىلدەرىن جاقسى كورىپ، مەرەكەلەردە ءان سالىپ، ءبي بيلەيتىن دەڭگەيلەرى بار»، - دەيدى قيسىمەت قىزى.

بالسۇلۋ ءوز ارماندارىمەن دە ءبولىستى.

«ماماندىعىم اكتەرلىك ەدى. استراحاندا قازاق تەاترى بولماعاندىقتان اكتريسا بولسام دەگەن ارمانىم ورىندالماي قالدى. ينديرا مەن ەلميرا ەسىمدى ەگىز قىزدارىمنان كەيىن تۋعان ماحامبەت ەسىمدى ونەرگە جاقىن ۇلىم بار. ءوزى الماتىداعى ونەر اكادەمياسىندا وقىعىسى كەلەدى. بولاشاقتا مەنىڭ ورىندالماعان ارمانىمدى سول بالام ورىنداۋى مۇمكىن. قازىر «استراحاندا قازاق تەاترىن اشسام» دەگەن ماقساتىم بار»، - دەدى ول.

ول جوسپارىنىڭ ۋاقىتىندا ىسكە اساتىنىنا سەنىمدى.

دەرەككوز: ازاتتىق