تايۋانداعى ءبي كەشىندە شىققان ءورتتىڭ سەبەبى انىقتالدى
باسىلىمنىڭ مالىمەتىنشە، ءورتتىڭ شىعۋىنا تۇتاندىرىلعان تەمەكىنىڭ ۇشقىنى سەبەپ بولۋى مۇمكىن.
كەشتى ۇيىمداستىرۋشى لۋ جۋنتسزي مەن ءتۇرلى-ءتۇستى ۇنتاق سەبەتىن جانە جابدىقتارعا جاۋاپ بەرەتىن ەكى قىزمەتكەردىڭ ۇستىنەن وقيعاعا بايلانىستى قىلمىستىق ءىس قوزعالدى. كۇدىكتىلەر كەپىلاقى تولەپ، بوستاندىققا شىقتى.
جەرگىلىكتى تەلەارنالار كەشتى ۇيىمداستىرۋشى لۋ جۋنتسزيدىڭ زارداپ شەگۋشىلەردەن تىزەرلەپ تۇرىپ كەشىرىم سۇراعان ءساتىن جاريالادى. ول بار جاۋاپكەرشىلىكتى ءوز موينىنا الاتىنىن ايتتى.
ەسكە سالا كەتەيىك، تايۋاننىڭ سينبەي قالاسىنداعى كوڭىل كوتەرۋ ورنىندا جەرگىلىكتى ۋاقىت بويىنشا سەنبى كۇنى ساعات 23:00 شاماسىندا ءورت شىققان بولاتىن.
مىڭعا جۋىق ادام ءبي بيلەپ جاتقان ساحنانىڭ استىندا بەلگىسىز ۇنتاق سەبىلىپ، ول ورتەنىپ كەتكەن. بۇدان كەيىن دەمالۋشىلار ورتكە وراندى. جەرگىلىكتى اقپارات قۇرالدارىنىڭ مالىمەتىنشە، ءورتتىڭ سالدارىنان 500 ادام كۇيىپ قالدى، ونىڭ 200 ى جان ساقتاۋ بولىمىندە جاتىر. ولاردىڭ كوبىنىڭ دەنەسىنىڭ 50 پايىزىن كۇيىك شالعان. سەگىز ادامنىڭ جاعدايى تىم اۋىر.
