قازاقستان ازيا ينفراقۇرىلىمدىق ينۆەستيتسيالار بانكىن قۇرۋ جونىندەگى كەلىسىم باپتارىنا قول قويدى
قازاقستاندىق دەلەگاتسيانى ق ر ۇلتتىق ەكونوميكا ءمينيسترى ەربولات دوسايەۆ باسقاردى، دەپ حابارلادى "قازاقپارات" ءتىلشىسى.
كەلىسىم باپتارىنا 50 قۇرىلتايشى ەل وكىلدەرى قول قويدى. قالعان 7 الەۋەتتى قۇرىلتايشى ەل قۇجاتقا 2015 -جىلدىڭ سوڭىنا دەيىن قول قويۋدى جوسپارلاۋدا.
ق ح ر ءتوراعاسى شي جينپين كەلىسىم باپتارىنا قول قويۋ ءراسىم اياقتالعاننان كەيىن دەلەگاتسيا باسشىلارىن قابىلدادى. بۇدان باسقا، ا ي ي ب- تىڭ تاراپتارى ارنايى مينيسترلىك كەزدەسۋىنە قاتىستى.
كەلىسىمنىڭ باپتارىنا 2014 -جىلعى 24 - قازاندا 22 - مەملەكەت قابىلداعان ا ي ي ب قۇرۋ جونىندەگى ءوزارا تۇسىنىستىك تۋرالى مەموراندۋمدى دامىتۋ ءۇشىن قول قويىلدى.
ا ي ي ب قۇرۋدىڭ نەگىزگى ماقساتى ازيادا ينفراقۇرىلىمدىق دامۋ جانە ءال- اۋقات جاعدايىنىڭ وسۋىنە ىقپال ەتۋ، سونداي- اق وڭىردەگى الەۋمەتتىك- ەكونوميكالىق جوبالاردى قارجىلاندىرۋ بولىپ تابىلادى.
ق ح ر ءتوراعاسى شي جينپين باستاماشىلىق جاساعان «جىبەك جولى ەكونوميكالىق بەلدەۋى» ستراتەگياسىن ىسكە اسىرۋ بارىسىندا ا ي ي ب الەۋەتىن پايدالانۋ جوسپارلانىپ وتىر.
بانكتىڭ شتاب- پاتەرى بەيجىڭ قالاسىندا ورنالاسادى، جارعىلىق كاپيتالى 100 ميلليارد دوللاردى قۇرايدى. بانك وزىق حالىقارالىق دامۋ بانكتەرىنىڭ تاجىريبەسى مەن پراكتيكاسىنا نەگىزدەلەتىن بولادى. ا ي ي ب ءوز جۇمىسىن 2016 -جىلدىڭ باسىنان باستايدى دەپ كۇتىلۋدە. 
