دەنساۋلىق: ماماندار ەرەسەك ادامدارعا كۇنىنە قانشا ساعات ۇيىقتاۋ قاجەتتىگىن ايتتى
«ەرەسەك ادام قانشا ۋاقىت ۇيىقتاۋ قاجەت؟ بۇل - عالىمدار مەن قاراپايىم ادامداردى باياعىدان بەرى تولعاندىرىپ جۇرگەن سۇراق. 8 ساعات ۇيىقتاۋ كەرەكتىگى بۇرىننان بەلگىلى. ال كەيبىر ادامدار ەرەسەكتەرگە التى ساعاتتىق ۇيقى دا جەتكىلىكتى دەيدى. بۇل قانشالىقتى زيان، ءيا بولماسا پايدالى. عالىمدار بۇل زەرتتەۋىندە از ۇيىقتاۋدىڭ نەسىمەن قاۋىپتى ەكەنىن ايتتى.
تاۋلىگىنە 6 ساعات ۇيىقتايتىن ادامدار وزدەرىن جاقسى سەزىنەتىنىن ايتادى. نەگىزىندە ولاي ەمەس. ءاردايىم ۇيقىسى قانباي ءجۇرۋ بەلگىلى ۋاقىتقا دەيىن قوردالانىپ كەلىپ، دەنساۋلىققا قاتتى اسەر ەتەدى، دەيدى عالىمدار.
ۇيقى تاپشىلىعى باياۋ، جيناقتالادى. ەگەر كۇندە نورمادان تومەن ۇيىقتاساڭىز، وندا ادامنىڭ ەستە ساقتاۋ مەن دەن قويۋ قابىلەتى السىرەيدى، جۇمىسقا قابىلەتى تومەندەيدى، اعزانىڭ يممۋنيتەتى السىرەيدى، ومىرلىك ماڭىزى بار ورگانداردىڭ جۇمىسى بۇزىلادى.
ايتا كەتۋ كەرەك، بۇگىنگى عىلىمي زەرتتەۋلەر ادامداردىڭ جاس شاماسىنا قاراي قانشا ساعات ۇيىقتاۋ كەرەكتىگىن تومەندەگىدەي تۇجىرىمداعان. جاڭا تۋعان نارەستە تاۋلىگىنە - 21-22 ساعات، التى ايلىق نارەستە 14 ساعات، ءبىر جاسار ءسابي 13 ساعات ۇيىقتايدى. ءتورت جاسار ءسابي تاۋلىگىنە - 12 ساعات، جەتى جاسار بالا - 11 ساعات، ون جاسار بالا - 10 ساعات ۇيىقتايدى. 15 جاسار جاسوسپىرىم تاۋلىگىنە - 9 ساعات، 17 جاسار جاسوسپىرىمدەر 7 - 8 ساعات ۇيىقتاسا دا جەتكىلىكتى. عالىمداردىڭ ورتاق پىكىرى بويىنشا ەرەسەك ادامدار ءۇشىن 7 مەن 9 ساعات ۇيقى كەرەك.
ال قىتايدىڭ ەجەلدە ءومىر سۇرگەن دارىگەرى حۋا تو ادامدار ەرتە تۇرۋ ۋاقىتىن تاڭ شەتى سوگىلگەن مەزەتكە (03:00-5:00 ارالىعى) تۋرالاعانى ءجون. بۇل كەزدە قامىعۋعا، اشۋلانۋعا بولمايدى. ولاي بولعاندا وكپە مەن باۋىرعا زاقىم كەلەدى. وسى ۋاقىتتاردا ويانا الساڭىز كۇندىز ءبىر كۇن بويى سەرگەك جۇرەسىز، دەيدى. ونىڭ دارىگەرلىك مۇراسىندا مىناداي تۇجىرىم بار.
تۇسكى كەز، ياعني ساعات 11:00-13:00 ارالىعى، جۇرەككە قۋات جەتكىزىلەتىن ۋاقىت، بۇل مەزەتتە ۇيىقتاۋعا مۇرسا بولماسا، 15 مينۋت جايلانىپ وتىرىپ، كوزدى جۇمىپ جۇيكەنى تىنىشتاندىرساڭىز، جۇرەك قۋاتىڭىز تولىق بولماق. جۇرەك اۋرۋى بارلار ءار كۇنى وسى ەكى ۋاقىتتا ۇيىقتاۋدى ۇمىتپاسا، دەنە قۋاتى كۇن سايىن ارتادى، جۇرەك قاعۋى قالىپقا تۇسەدى. ال، ءدال ءتۇس مەزگىلىندە كوزدى جۇمىپ 3 مينۋت ۇيىقتاۋ ەكى ساعات ۇيىقتاعانمەن تەڭ.
جارىم ءتۇن (ءتۇن ورتاسى: ساعات 23:00 دەن 01:00 ارالىعى). شىندىعىندا جاڭا ءبىر كۇن تۇنگى ساعات 00 دە ەمەس 23:00 دە باستالادى. ءبىز ساعات 00 دە باستالادى دەپ اعات ءتۇسىنىپ ءجۇرمىز. باۋىردىڭ ءبىر ەرەكشەلىگى، ادام جاتقاندا قان قايتادى، وتىرساڭ، تۇرساڭ باسقا مۇشەگە قان جىبەرەدى.
باۋىر مەن ءوت ەكەۋى اعايىن، ءبىرى اعا، ءبىرى ءىنى سەكىلدى. ساعات 23:00 دە ءوت قان جولى اشىلادى، ەگەر ۇيىقتاماساڭىز، ءوت قۋاتىن زاقىمدايدى. ىشتەگى 11 مۇشە ءوت قۋاتىنا سۇيەنەدى، ءوت قۋاتى السىرەسە، ىشكى مۇشەلەردىڭ بارلىعىنىڭ قىزمەتى السىرەيدى، زات الماسۋى، يممۋنيتەت كەميدى.
ءتۇن ورتاسىنداعى 5 مينۋتتىق ۇيقى 6 ساعاتتىق ۇيقىنىڭ دەمالىسىن سىيلاي الادى. سوندىقتان، ۇيقىسى قاشىپ جۇرگەندەر نەمەسە تۇندەلەتىپ جۇمىس ىستەيتىندەر، جارىم تۇندە ۋاقىتىن ءبولىپ جارتى ساعات ۇيىقتاپ السا، دەنساۋلىعىنا تۇسەتىن ارتىق قىسىمدى جەڭىلدەتەتىن بولادى.
ادام ءبىر تۇنگى ۇيىقتاماۋدىڭ زيانىن 100 كۇندە تولىقتاي الماق ەمەس. ءبىر ءتۇن ۇيىقتاي الماساڭىز، جاڭا كلەتكا جاسالمايدى. كۇندىز ءبىر ميلليون كلەتكا جويىلىپ، تۇندە 500 مىڭى عانا تولىعاتىن بولسا، دەنەڭىزدىڭ قۋاتى السىرەيدى.
ءتۇن اۋعان كەزدە (تۇنگى ساعات 01:00-03:00 ارالىعى) باۋىردىڭ قان جولىنىڭ قىزمەتى ارتا تۇسەدى، بۇل كەزدە ۇيىقتاماساڭىز، باۋىر ۋلى زاتتاردى الاستاي المايدى، تازا قان جاساي المايدى. قاننىڭ قوردالانۋى جەتەرسىز بولۋ سەبەبىنەن ادامنىڭ ءوڭى كوگەرىپ تۇرادى، ۋاقىت ۇزارا كەلە باۋىر اۋرۋلارىنا وڭاي شالدىعادى.
تاماق ىشە سالا شالقالاپ جاتپاڭىز. توسەكتە جاتىپ كەلەشەك ىستەرىن ويلاماڭىز. جاتقاننان كەيىن، بار ويدان ارىلىپ، ەركىن تىنىس الۋ كەرەك. ساناڭىزعا سانسىز وي ورالىپ، تىنىشىڭىز كەتسە، توسەكتە اۋناقشىپ جاتا بەرمەڭىز. بۇل ادام جۇيكەسىن مەيىلىنشە توزدىرادى. مۇندايدا ءبىراز تۇرەگەلىپ وتىرىپ بارىپ جاتقانىڭىز ءجون.
