ق ر پرەزيدەنتى كۋۆەيت امىرىنە ءال-كۋۆەيت قالاسىنداعى تەررورلىق اكتىگە بايلانىستى كوڭىل ايتتى

استانا. قازاقپارات - قازاقستان پرەزيدەنتى نۇرسۇلتان نازاربايەۆ كۋۆەيت مەملەكەتىنىڭ ءامىرى ساباح ءال- احمەد ءال- دجابەر اس-ساباحقا ءال-كۋۆەيت قالاسىندا بولعان تەررورلىق اكتىگە بايلانىستى كوڭىل ايتۋ جەدەلحاتىن جولدادى.

بۇل تۋرالى اقوردانىڭ باسپا ءسوز قىزمەتىنەن حابارلادى.

كوڭىل ايتۋ جەدەلحاتىندا مەملەكەت باسشىسىنىڭ ءال- كۋۆەيتتەگى تەررورلىق اكت سالدارىنان كوپتەگەن جازىقسىز جاندار قازا تاپقانى جانە زارداپ شەككەنى تۋرالى قايعىلى حاباردى تەرەڭ كۇيزەلىسپەن قابىلداعانى ايتىلعان.

«ءبىز دۇنيەجۇزىلىك قوعامداستىقتىڭ حالىقارالىق ەكسترەميزم مەن تەرروريزم قاتەرىنە قارسى كۇرەستەگى كۇش- جىگەرى مەن قادامدارىن تولىق قولدايمىز»، - دەلىنگەن جەدەلحاتتا.

نۇرسۇلتان نازاربايەۆ قازاقستان حالقىنىڭ جانە جەكە ءوزىنىڭ اتىنان قازا بولعانداردىڭ تۋىستارى مەن جاقىندارىنا، سونداي- اق باۋىرلاس كۋۆەيت حالقىنا كوڭىل ايتىپ، جاپا شەككەندەردىڭ تەزىرەك ساۋىعىپ كەتۋىنە تىلەكتەستىك ءبىلدىردى.