سەربيالىق ساياحاتشى قازاق جەرىنىڭ سۇلۋلىعىنا ءتانتى

استانا. قازاقپارات - پاۆلودارلىقتار سەربيالىق ساياحاتشىنى قارسى الدى.

37 جاستاعى جيھانكەز دراگان شيبالىچ الەمدىك رەكوردتى جاڭارتۋ ءۇشىن ۆەلوسيپەدىمەن سەربيادان جاپونياعا دەيىن جەتۋدى كوزدەپ وتىر.

ونىڭ جولعا شىققانىنا 2 ايدىڭ ءجۇزى بولىپتى. ساياحاتشى باعىتىن ءوزىنىڭ تۋعان قالاسى -  كرالەۆودان باستاعان. وسىلايشا ول كۇنىنە 150 شاقىرىم قاشىقتىقتى باعىندىرىپ كەلەدى. ءبىر قىزىعى جيھانكەزدىڭ ماماندىعى -  ەلەكتريك.

جاس كەزىنەن ساياحاتتاعاندى جانى سۇيەتىن ول الەمدى ارالاپ شىعام دەپ الدىنا ماقسات قويعان. ول ەندى جاپونيا استاناسى توكيوعا دەيىن 20 مىڭ شاقىرىمدى باعىندىرىپ كورمەك. دراگان شيبالىچ، ساياحاتشى:

- يتاليا، گەرمانيا، ماكەدونيا سياقتى الەمنىڭ كوپتەگەن ەلىندە بولدىم. ونىڭ ىشىندە قازاق ەلىنىڭ قوناقجايلىعىنا تامسانىپ وتىرمىن. قازاقستان ازاماتتارى مەنى جىلى شىرايمەن قارسى الدى. سىزدەردىڭ تابيعاتتارىڭىز دا كەرەمەت، تاۋ-تاستارىڭىزبەن، وزەن- كولدەرىڭىزگە قىزىعىپ وتىرمىن. بارلىعىن سۋرەتكە ءتۇسىرىپ، الەۋمەتتىك جەلىمە سالدىم. ەندى مەنىڭ وتانداستارىم قازاقستاننىڭ اسەم تابيعاتىن عالامتوردان كورىپ، وسىندا كەلۋگە قىزىعۋشىلىق تانىتىپ وتىر. سەربيالىق جيھانكەز پاۆلودارداعى دوستىق ءۇيى مەن وبلىستىق ولكەتانۋ مۇراجايىندا دا بولماق. سودان سوڭ ساياحاتىن جالعاستىرادى.

www.24.kz