جەرىن ءتيىمدى پايدالانامىن دەيتىن ازاماتتارعا نەسيە بەرىلەدى - ا. مىرزاحمەتوۆ
التى ساعاتقا سوزىلعان القالى جيىندا تاپسىرمالاردىڭ ورىندالۋى ەگجەي-تەگجەيلى پىسىقتالدى، دەپ حابارلايدى و ق و اكىمىنىڭ باسپا ءسوز قىزمەتىنەن.
باسقارما باسشىلارى مەن قالالىق اكىمدىكتەگى دەربەس بولىمدەردىڭ مەڭگەرۋشىلەرى جانە اۋىل اكىمدەرىنىڭ قاتىسۋىمەن وتكەن ماجىلىستە اتقارىلعان جۇمىستار مەن بەرىلگەن تاپسىرمالاردىڭ ورىندالۋ بارىسى جان-جاقتى تارازىلاندى. بۇل جولى دا اۋدان، باسقارما باسشىلارى عانا ەمەس، اۋىل اكىمدەرى مەن ءبولىم ماماندارىنا دەيىن كوتەرىلگەن ماسەلەلەر بويىنشا جەكە-جەكە جاۋاپ بەردى، اتقارعان جۇمىستارىن باياندادى.
ءماجىلىس كەزىندە يگەرۋسىز جاتقان ۇيىرگەلىك جەرلەرگە قاتىستى الاڭداۋشىلىق بىلدىرگەن ا. مىرزاحمەتوۆ الدا اتقارىلار شارالاردىڭ ءجون-جوباسىن ءتۇزىپ، ناتيجەلى جۇمىس جاساۋ جايىنا كەڭىنەن توقتالدى.
بۇگىندە وبلىس اۋماعىندا ءتيىمسىز پايدالانىلىپ جاتقان اۋلا ىشىندەگى جەردىڭ كولەمى 50 مىڭ گەكتارعا جەتەدى. وسى ولقىلىقتىڭ ورنىن تولتىرۋ ماقساتىندا تۇرعىندارعا 50-100 مىڭ تەڭگە كولەمىندە شاعىن نەسيەلەۋ جۇيەسى تۇزىلمەك. ول ءۇشىن اۋىل اكىمدەرى تۇرعىنداردىڭ مۇمكىندىگىن باعامدايتىن بولادى.
- جەرىن ءتيىمدى پايدالانامىن دەيتىن ازاماتتارعا نەسيە بەرەمىز. ەرتەڭ ءونىم پىسىپ-جەتىلگەندە سول ءونىمنىڭ ءبىر بولىگىن ساتىپ الامىز. بۇل ازىق تۇلىك قاۋىپسىزدىگى اياسىندا اتقارىلعان ناقتى شارا بولۋمەن قاتار حالىق ءۇشىن تابىس كوزى، - دەدى ا. مىرزاحمەتوۆ.
جيىندى قورىتىندىلاعان وبلىس باسشىسى اۋىل اكىمدەرى مەن مەلەكەتتىك قىزمەتشىلەردىڭ جۇمىسىن جۇيەلەۋ، جاۋاپكەرشىلىكتى ارتتىرۋعا قاتىستى ءبىرقاتار تاپسىرمالار بەردى. الداعى ۋاقىتتا وبلىس اكىمىنىڭ وكىمىنە سايكەس وبلىس اكىمىنىڭ ورىنباسارلارى اۋدان، قالالارعا ەكى رەت شىعىپ، اتقارىلعان جۇمىستارمەن تانىسادى. ال اي سوڭىندا ساپاردا كوتەرىلگەن ماسەلەلەر بويىنشا اۋدان، اۋىل اكىمدەرىنىڭ قاتىسۋىمەن كەڭەيتىلگەن سەلەكتورلىق ءماجىلىس وتەدى.
ساپار سوڭىندا وبلىس اكىمى جاقىندا عانا كۇردەلى جوندەۋدەن وتكەن مادەنيەت ءۇيى مەن دەنە شىنىقتىرۋ- ساۋىقتىرۋ كەشەنىنە بارىپ، اتقارىلعان جۇمىستاردى كوردى.
