مەملەكەتتىك تەلەارنا ەرمەگيايەۆ تۇراتىن ءزاۋلىم ءۇيدى كورسەتتى
جاڭالىقتاردا شەنەۋنىكتىڭ قاماۋعا الىنۋىنىڭ ءمان-جايى ايتىلادى.
تەلەارنا تىلشىلەرى حالىقارالىق كورمەنى ۇيىمداستىرۋعا جاۋاپتى كومپانيانىڭ بۇرىنعى باسشىسىنا قاتىستى كەي مالىمەتتەردى انىقتادى. تەرگەۋ ۋاقىتىنا ءۇي قاماۋىنا الىنعان تالعات ەرمەگيايەۆ الداعى 2 ايدى ەسىل وزەنىنىڭ جاعاسىنداعى ءزاۋلىم ۇيدە وتكىزەدى.
«ءۇيدىڭ كونسەرجى بۇرىنعى شەنەۋنىكتىڭ باسپاناسى ءۇيدىڭ 5-قاباتىن تۇگەلدەي الىپ جاتقانىن ايتتى. بۇل پودەزدە 6 وتباسى عانا تۇرادى. ال ماسەلەن، كەلەسى پودەزدە 27 وتباسى ورنالاسقان. كۇدىكتى تاۋلىك بويى كۇزەتتە. وعان ەكونوميكالىق قىلمىسقا جانە سىبايلاس جەمقورلىققا قارسى كۇرەس اگەنتتىگى قىزمەتكەرلەرى تۋعان- تۋىستارى جانە قورعاۋشىلارىنان وزگە بىرەۋمەن تىلدەسۋگە تىيىم سالىنعان. جانە بايلانىس قۇرالدارىن، تەلەفون مەن ينتەرنەتتى پايدالانۋعا دا رۇقسات جوق»، - دەپ حابارلادى تەلەارنا تىلشىلەرى.
وسىعان دەيىن ەسەپ كوميتەتىنىڭ «استانا ەكسپو-2017» ۇلتتىق كومپانياسىنىڭ قارجىلىق قىزمەتىن تەكسەرمەيتىنى حابارلانعان بولاتىن. بۇل تۋرالى ۆەدومستۆو باسشىسى قوزى-كورپەش جاڭبىرشين مالىمدەدى.
ەسكە سالا كەتەيىك، 13 -ماۋسىمدا «استانا ەكسپو-2017» ۇلتتىق كومپانياسى باسقارماسىنىڭ بۇرىنعى ءتوراعاسى تالعات ەرمەگيايەۆتى ءۇي قاماۋىنا الۋ تۋرالى سانكسيانى استانا قالاسى الماتى اۋدانىنىڭ №2 اۋداندىق سوتى بەرگەن. مۇنداي بۇلتارتپاۋ شاراسىن سوتقا دەيىنگى تەرگەۋ ورگاندارى مەن پروكۋراتۋرا ۇسىندى. تالعات ەرمەگيايەۆقا قىلمىستىق كودەكستىڭ 176-بابى بويىنشا ايىپ تاعىلىپ وتىر.
