ۇلى بريتانياداعى قازاقتار ۇل-قىزدارىنىڭ انا ءتىلىن ۇمىتقانىنا الاڭداپ وتىر
كەزىندە تاعدىردىڭ جازۋىمەن شەت ەل اسىپ كەتكەن قانداستارىمىز بالالارىنىڭ تەك اعىلشىنشا سويلەپ جۇرگەندەرىن كورىپ قىنجىلاتىندارىن ايتادى.
جانە مۇنداي جاعداي بۇكىل شەتەلدىك قازاقتارعا ءتان ەكەندىگىن جاسىرمايدى. سوندىقتان ولار انگليادا قانداستارىنىڭ باسىن قوسقان قۇرىلتايلار وتكىزىپ، وتكىر تاقىرىپتى تالقىعا سالىپ ءجۇر.
يسمايل كەسيجي - لوندوندىق ءسان ديزاينەرى. بۇعان قوسىمشا قوعامدىق نەگىزدە ۇلىبريتانياداعى قازاق دياسپوراسىنا جەتەكشىلىك ەتەدى. شەتەلدەگى قازاقتاردىڭ باسىن بىرىكتىرىپ، ۇلتتىق قۇندىلىقتاردى ناسيحاتتايدى.
انا ءتىلىمىزدىڭ ۇمىتىلۋى الەمنىڭ تۇكپىر- تۇكپىرىن مەكەن ەتكەن قازاقتارعا ورتاق ماسەلە دەيدى ول. تىلدىك ورتا بولماعاندىقتان جانە قازاق ءتىلدى تەلەارنالار كەڭ تاراماعاندىقتان وسىنداي جاعدايعا جەتىپ وتىرعاندىعىن اشىنا ايتادى. وزگە تىلدە سويلەيتىن قازاق جاستارىن كورگەندە ءتىپتى نامىستانامىن دەيدى ول.
«شەتەلدە قىتاي دەگەن اتاق الىپ ءجۇرمىز. ورىسشا سويلەيتىن قىتاي دەگەن اتاق الىپ جۇرسەك، بۇل قاي قازاقتىڭ نامىسىنا تيمەيدى؟»، - دەيدى ۇلىبريتانياداعى قازاق دياسپوراسىنىڭ جەتەكشىسى يسمايل كەسيجي.
كەيبىر قازاق جاستارى تۋعان تىلىنەن جەرىپ جاتسا، وزگە ۇلت وكىلدەرى ۇلى اباي ءتىلىن مەڭگەرۋگە تالاپ قىلىپ ءجۇر. ارمەنيالىق ستۋدەنت لەون اسلانوۆ قازاقشاعا سۋداي بولماسا دا، العاشقى قادامدارىن جاساپ ۇلگەرگەن.
«مەنى ورتالىق ازيا حالىقتارىنىڭ مادەنيەتى قاتتى قىزىقتىرادى. اسىرەسە، قازاق ەلىنىڭ. مەن جۇرەگى قازاق دەپ سوعاتىن قازاق ستۋدەنتتەرىمەن بىرگە ءبىلىم الامىن. ولار ماعان ءتىل ۇيرەتىپ ءجۇر»، - دەيدى UCL ۋنيۆەرسيتەتىنىڭ ستۋدەنتى لەون اسلانوۆ.
«ءبىز وزگە ۇلت ستۋدەنتتەرىنە قازاق ءتىلىن ۇيرەتىپ، ولاردان باسقا تىلدەردى ۇيرەنەتىندەي ويلارىمىز دا بار»، - دەيدى UCL ۋنيۆەرسيتەتىنىڭ ستۋدەنتى ساكەن ولجابايەۆ.
لوندوندىق ءتىل جاناشىرىنىڭ اتامەكەنگە كوشكىسى بار. ءبىراق بالالارى كەلىسپەيدى ەكەن. جالعىز عانا امالى - ۋنيۆەرسيتەت بىتىرگەن ۇلدارىن ءتىل ۇيرەنۋگە قازاقستانعا ءبىر جىلدىق كۋرسقا جىبەرىپ الۋ. سونداي-اق اقساقال قازاق كەلىنىنەن دامەلى.
