جاڭا يندۋستريالاندىرۋ: مەملەكەتتىڭ قولداۋى ارقاسىندا اينەك وندىرەتىن ءىرى ورتالىق اشىلدى - فوتو
اركادي رۋبتسوۆ باسشىلىق ەتەتىن كاسىپورىن ىرگەسى 2001 -جىلى قالانعان بولاتىن. باستاپقىدا اينەك كەسەتىن شاعىن شەبەرحانادان باستاۋ العان ءوندىرىس ورنى بىرتىندەپ كەڭەيە ءتۇستى. 2007 -جىلى اۆستريالىق «LISEC» فيرماسىنىڭ جابدىعى نەگىزىندە اينەك پاكەتتەرى شىعارىلا باستادى. سونداي- اق جيھاز ونەركاسىبىندە، حالىق تۇتىناتىن تاۋار شىعارۋدا پايدالانۋ ءۇشىن يتالياندىق جابدىق كەشەنىندە اينەك وڭدەۋ دە جولعا قويىلدى.
كوپ قىرلى قاۋىپسىز اينەك (تريپلەكس) عيماراتتار تۇرعىزۋدا قولدانىلسا، كومپانيا 2010 -جىلدان باستاپ شىڭدالعان اينەك جاساۋدى دا وندىرىسكە ەنگىزدى. ەڭ باستىسى، قۇرىلىس نارىعىنا قۋات ۇنەمدەگىش جانە ءقاۋىپسىز اينەكتەر ۇسىنىلۋدا.
مۇنى قازاقستاندا يننوۆاتسيالىق تەحنولوگيالاردى دامىتۋعا قوسىلعان ۇلەس دەپ باعالاۋعا بولادى. 2010 -جىلى ورالدا ءىرى «مير ستەكلا» ساۋدا ورتالىعىن اشقان «ستەكلو- سەرۆيس» ج ش س ءوز ءوندىرىسىن قازىرگى زامانعى وسكەلەڭ تالاپتارعا سايكەس دامىتا تۇسۋدە.
ب ق و كاسىپكەرلىك جانە يندۋستريالىق- يننوۆاتسيالىق دامۋ باسقارماسى باسشىسىنىڭ ورىنباسارى ميرجان ساتقانوۆتىڭ ايتۋىنشا، كاسىپورىن «بيزنەستىڭ جول كارتاسى - 2020» باعدارلاماسى اياسىندا مەملەكەتتەن 1294,4 ميلليون تەڭگە قولداۋ الدى.
سونىڭ ىشىندە پايىزدىق مولشەرلەمەنى دەمەۋقارجىلاندىرۋ بويىنشا «اينەكتى وندىرىستىك وڭدەۋ، اينەك پاكەتتەرىن دايىنداۋ، اينەك شىعارۋدىڭ ۇزدىكسىز ءوندىرىسى» جوباسىنا سايكەس 13,6 ميلليون تەڭگە، «اينەك پاكەتتەرىن ءوندىرۋ، اينەك وڭدەۋ، تەرموتوزىمدىلىگى كۇشەيتىلگەن اينەك ءوندىرۋ ءۇشىن جابدىقتار الۋ» جوباسىنا وراي 742 ميلليون تەڭگەگە قول جەتكىزدى.
سونىمەن قاتار اتالمىش باعدارلاما اياسىندا سەرىكتەستىك ينفراقۇرىلىمدى تارتۋعا قاجەتتى 167,8 ميلليون تەڭگە، «اينەك پاكەتتەرىن ءوندىرۋ، اينەك وڭدەۋ، تەرموتوزىمدىلىگى كۇشەيتىلگەن اينەك ءوندىرۋ ءۇشىن جابدىقتار الۋ» جوباسىن كەپىلدەندىرۋ بويىنشا 371 ميلليون تەڭگە الدى.
«ستەكلو- سەرۆيس» ج ش س- نىڭ ءوندىرىس باستىعى اناتولي گاليتسكيدىڭ سوزىنە قاراعاندا، وسىنداي قولداۋدىڭ ناتيجەسىندە اياعىنا نىق تۇرعان كاسىپورىندا قازىرگى تاڭدا 120-دان استام ادام ەڭبەك ەتەدى.
امبەباپ جابدىقتىڭ ارقاسىندا كومپانيا ەلىمىزدە العاشقىلاردىڭ قاتارىندا Jambo (فورماتى 6000x3210 م م) اينەگىن اۆتوماتتى تۇردە قايتا وڭدەۋدى ىسكە قوستى. اينەك سىنىقتارىن قايتا وڭدەۋ جەلىسى دە پايدالانۋعا بەرىلدى. بۇرىن قولمەن جاسالعان جۇمىستىڭ ءبارى ءقازىر اۆتوماتتاندىرىلعان، بۇل ۋاقىت ۇنەمدەۋگە مۇمكىندىك بەرەدى.
ەۋروپالىق ءونىم وندىرۋشىلەردەن اينەك كەسەتىن اۆتوماتتاندىرىلعان ۇستەل، Glaston FC500 اينەگىن شىڭدايتىن كونۆەكتسيالىق پەش سىندى قازىرگى زامانعى جابدىقتارعا قول جەتكىزگەن كومپانيا اتىراۋ، اقتوبە، شىمكەنت قالالارىندا ءوز فيليالدارىن اشىپ وتىر.
كومپانيا ونىمدەرى قازاقستان عانا ەمەس، رەسەيدىڭ سامارا، ورىنبور، ۋليانوۆسك، ەكاتەرينبۋرگ قالالارىندا دا سۇرانىسقا يە. Glaverbel (بەلگيا)، SaintGobain (فرانسيا) سەكىلدى بەلگىلى ەۋروپالىق كومپانيالارمەن بايلانىس ورناتقان «ستەكلو- سەرۆيس» ج ش س باسەكەگە قابىلەتتى، جوعارى ساپالى ءونىمدى بۇدان بىلاي دا شىعارا بەرمەك.
