ك. ءماسىموۆ: شاعىن قالالاردىڭ دامۋ قارقىنى تومەندەۋى ىقتيمال

استانا. قازاقپارات - شاعىن قالالاردى دامىتۋ باعدارلاماسىنا وزگەرتۋلەر ەنگىزىلەدى. بۇل تۋرالى بۇگىن ق ر پارلامەنتى پالاتالارىنىڭ بىرلەسكەن وتىرىسىندا اتالعان ماسەلەگە وراي دەپۋتاتتاردىڭ ساۋالىنا جاۋاپ بەرگەن ق ر ۇكىمەت باسشىسى كارىم ءماسىموۆ ءمالىم ەتتى.

ونىڭ اتاپ وتۋىنشە، تاياۋدا بۇل ماسەلەگە وراي سەلەكتورلىق رەجىمدە ۇكىمەت وتىرىسى ءوتىپ، وعان مينيسترلەر كابينەتى مۇشەلەرى، شاعىن قالالاردىڭ اكىمدەرى قاتىسقان.

 «ءبىز بۇل باعدارلامانىڭ وڭ جانە كەمشىن تۇستارىن قارادىق. وڭ تۇسى، بۇل باعدارلاما بار جانە ءبىز شاعىن قالالاردى دالادا قالدىرمادىق ءارى ولارعا قولداۋ كورسەتۋدەمىز. ال كەمشىن تۇسى رەسرۋستاردىڭ باسىم بولىگى اتالعان قالالارداعى تۇرعىن ءۇي كوممۋنالدىق شارۋاشىلىعىن، ينفراقۇرىلىمداردى دامىتۋعا جۇمسالعان. كاسىپكەرلىكتى دامىتۋعا، ولاردىڭ بەلسەندىگىن ارتتىرۋعا جەتە نازار اۋدارىلماعان. بۇل ماسەلە وبلىس اكىمدەرىنە ەسكەرتىلدى. مەنىڭشە، ناقتى تۇزەتۋلەر بار جانە بۇل باعدارلامانىڭ اكىمشىلەنۋىنە ەنگىزىلەتىن بولادى»، - دەدى ۇكىمەت باسشىسى.

سونىمەن قاتار ول ەكونوميكالىق احۋالدىڭ وزگەرىسكە ۇشىراۋى ونەركاسىپتىڭ دامۋىنا اسەر ەتەتىندىگىن اتاپ ءوتتى. سونىڭ سالدارىنان جاڭا شاعىن قالالاردىڭ دامۋ قارقىنى تومەندەۋى ىقتيمال.

«ويتكەنى، بىزدەر ەكسپورتقا شىعارىپ ۇيرەنىپ قالعان كوپتەگەن تاۋارلاردىڭ الەمدىك ەكونوميكاداعى سۇرانىسى تومەندەۋى مۇمكىن. ەكونوميكالىق كونيۋكتۋرانىڭ وزگەرۋى بىزگە دە اسەر ەتەدى. سوندىقتان ءبىز ۇكىمەت جۇمىسى اياسىندا دەپۋتاتتارعا ءوتىنىش جاسايتىن بولامىز. شاعىن قالالارمەن جۇمىستى قايتا قاراپ، تۇزەتۋ ەنگىزۋگە دە تۋرا كەلۋى مۇمكىن»، - دەدى پرەمەر- مينيستر.

 اۆتور: مارلان جيەمباي