سەناتور ب. بەكنازاروۆ مينيسترلەردىڭ پارلامەنتتەگى جاۋابىن باعالاپ وتىرۋدى ۇسىندى
«ءبىر ماسەلەگە نازار اۋدارعاندى پارىز سانايمىن، بۇل بىزدەگى «سۇراق- جاۋاپ» پروتسەدۋراسى. پارلامەنتتە مينيسترلەردىڭ الدىندا ناقتى- ناقتى سۇراقتار قويىلادى. ناقتى سۇراققا ناقتى جاۋاپ ەستىگىمىز كەلەدى. الايدا، بۇگىن عانا ەمەس، جالپىلاما العاندا مىناداي مىنبەردەن بەرىلگەن جاۋاپتار كوڭىلدەن شىعا بەرمەيدى. ءبىز كابينەتكە بارىپ ەمەس، ماسەلەلەردى وسىنداي جەرلەردە ايتۋعا ءتيىسپىز. ەگەر ناقتى جاۋاپ المايتىن بولساق، جالاڭ سوزبەن شىعارىپ سالۋ جالعاسا بەرەتىن بولسا، وندا پارلامەنتتەگى «سۇراق- جاۋاپ» پروتسەدۋراسىنىڭ قاجەتى قانشا؟» - دەگەن دەپۋتات پالاتا سپيكەرىنە دە ۇسىنىسىن جەتكىزدى.
«بىزدە تەحنيكالىق مۇمكىندىك بار. ءاربىر جولى لاۋازىم يەسى جاۋاپ بەرگەندە سونىڭ جاۋابىن «قابىلدايمىز با، جوق پا؟» «قاناعاتتاندىرا ما، جوق پا؟» سوعان باعا بەرىپ وتىرۋ كەرەك سەكىلدى. تۇيمەشەك ارقىلى سوعان داۋىس بەرىپ، سول ەكراندا كورىنىپ تۇرسىن. بۇل بىرىنشىدەن لاۋازىم يەلەرىنىڭ مۇنداي وتىرىستارعا دايىندىعىن عانا ەمەس، دەپۋتاتتاردىڭ دا جاۋاپكەرشىلىگىن كۇشەيتەتىن ەدى. ەندەشە، الداعى ۋاقىتتا وسىنى ەسكەرەيىك. جاۋاپ بەرەتىن لاۋازىمدى تۇلعالاردىڭ جاۋاپكەرشىلىگىن ارتتىراتىن تەتىكتى قوسۋ كەرەك دەپ ەسەپتەيمىن»، - دەدى سەناتور ب. بەكنازاروۆ.
اۆتور: قانات مامەتقازى ۇلى
