ۇلتتىق مۋزەيگە ءشامشى قالداياقوۆتىڭ پيانينوسى سىيعا تارتىلدى - فوتو

استانا. قازاقپارات - بۇگىن قازاقستان رەسپۋبليكاسىنىڭ ۇلتتىق مۋزەيى الماتى قالاسىنداعى م. اۋەزوۆ اتىنداعى قازاق مەملەكەتتىك اكادەميالىق دراما تەاترىندا «ۇلتتىق مۋزەيگە سىي تارتۋ» اكسياسىن وتكىزدى.

«اكسيا مۋزەيگە لايىقتى بۇيىمدى، زاتتى، قۇجاتتى ەكسپونات رەتىندە قورعا تاپسىرۋعا شاقىرادى. «كەز- كەلگەن مۇرا مۋزەيدە ساقتالىنۋ كەرەك» دەگەن ەلدىك ۇستانىمدى جالپى حالىقتىق پارىز ساناۋدىڭ ۋاقىتى تۋدى دەپ سانايمىن»، - دەيدى مۋزەي ديرەكتورى دارحان مىڭباي.

ول وتتان، سۋدان ساقتاندىرىلماعانى بىلاي تۇرسىن، كەز- كەلگەن زات بيولوگيالىق وزگەرىستەردىڭ سالدارىنان جىلدان- جىلعا جويىلا بەرەتىنىن، 50-70-جىلدا جەكە ازاماتتىڭ قولىنداعى بۇيىم، زات جويىلىپ وتىراتىنىن اتاپ ءوتتى. 

شاراعا ءىلياس جانسۇگىروۆ، تاحاۋي احتانوۆ، قانىش ساتبايەۆ، وزبەكالى جانىبەكوۆ، الكەي مارعۇلان، سەركە قوجامقۇلوۆ، ءازىلحان نۇرشايىقوۆ ت. ب. سىندى ۇلتىمىزدىڭ ءبىرتۋار پەرزەنتتەرىنىڭ ۇرپاقتارى مەن تۋعان- تۋىستارى قاتىسىپ، ولاردىڭ كوزى تىرىسىندە قولدانعان قۇندى جادىگەرلەرىن ۇلتتىق مۋزەيگە تابىستادى.

«بۇل اكسيا شىعارماشىلىق زيالى قاۋىم وكىلدەرى قالىپتاسىپ، كورنەكتى عىلىم قايراتكەرلەرى ەڭبەك ەتكەن قالادا - الماتىدا جالعاستى. مۋزەي قورى تانىمال تۇلعالاردىڭ قىزمەتىنە بايلانىستى جادىگەرلەرمەن تولىقتى، ونىڭ ىشىندە ءشامشى قالداياقوۆتىڭ پيانينوسى دا بار. بۇل مۇرانى مۇراجايعا ءبىرتۋار سازگەردىڭ ۇلى مۇحتار سىيعا تارتتى، وندا كەزىندە كومپوزيتور شىعارمالارىن ورىنداعان ەكەن»، - دەدى اتالمىش مۇراجايدىڭ قورىن ەسەپكە الۋ ءبولىمىنىڭ باسشىسى ءباتىش اقپاسوۆا.

ەستەرىڭىزگە سالا كەتەيىك، بۇل اكسيا بيىلعى جىلعى 18- ناۋرىزدا استانادا قازاقستان رەسپۋبليكاسى ۇلتتىق مۋزەيىندە سالتاناتتى تۇردە باستاۋ العان بولاتىن. اكسيا جىل سوڭىنا دەيىن جالعاسىپ، ەلىمىزدىڭ بارلىق ايماعىن قامتيتىن بولادى.