گولوۆكيننىڭ پروموۋتەرلەرىنىڭ سىنىنان وتكەن ەرمەك سەرىكوۆ
ول - جيىرما جاسىنا جەتپەي، ازيانىڭ 3 دۇركىن چەمپيونى جانە جاستار اراسىندا الەم چەمپيونى اتانعان باۋىرىمىز ەرمەك سەرىكوۆ بولاتىن. ومىردەن وزعاندا بار بولعانى بەكزات اعاسى سەكىلدى جيىرما جاستا بولدى. ەگەر وقىس وقيعادان كوز جۇمباعاندا بيىل 26 جاسقا تولار ەدى.. .
جاسىنداي جارقىراعان باۋىرىمىزدى ماڭگىلىككە اتتاندىرىپ سالعالى دا، اتتاي جەلىپ التى جىل ءوتتى. ءبىراق، سودان بەرى ەرمەكتى ەسكە الۋعا ارنالعان بىردە- ءبىر ءىرى شارا وتپەگەنى انىق. مىنە، بيىل مارقۇمنىڭ قۇرمەتىنە 19-22 -ماۋسىم كۇندەرى قاراعاندى قالاسىندا تۇڭعىش رەت 1- رەسپۋبليكالىق ەسكە الۋ تۋرنير وتپەك.
ەستەرىڭىزگە سالا كەتەيىك. 2009 -جىلى 10- تامىزدا بوكستان ازيانىڭ 3 دۇركىن جانە الەمنىڭ ءبىر دۇركىن چەمپيونى ەرمەك سەرىكوۆ قاسكويلەردىڭ قولىنان وققا ۇشقان بولاتىن. سول تۇستا ەلىمىزدەگى بارلىق اقپارات قۇرالدارى جارىسا جازدى. تالانتتى بوكسشىمىزعا وق اتقان جەندەتتى شاحتينسك قالاسىنىڭ سوتى 7 جارىم جىلعا باس بوستاندىعىنان ايىردى. ول بوكسشىنى ولتىرگەن سوڭ شەكارا اسىپ، 2 جارىم جىل وتكەننەن كەيىن عانا رەسەيدىڭ سانكت- پەتەربۋرگ قالاسىندا قۇرىقتالعان بولاتىن. سوت وتىرىسىندا ول، توبەلەستى ءبىرىنشى چەمپيوننىڭ ءوزى باستاپ، ارتىنشا تراۆماتيكالىق قارۋدان وق جاۋدىرعانىن ايتىپ اقتالدى. ءبىراق، سۋديا ارتى ولىمگە اكەلگەن قىلمىس - قاساقانا جاسالعان دەپ شەشتى.
قازاقتا «بىرەۋگە كور قازساڭ ءوزىڭ دە سوعان تۇسەسىڭ» دەگەن اتالى ءسوز بار. ءبىزدىڭ وعىلانعا وق اتقان قاسكوي ۆلاديمير شەپين تۋرا سونىڭ كەبىن كيدى. ول تۇزەۋ كولونياسىندا جازاسىن وتەپ جاتقان جەرىندە جۇرەگى توقتاپ قايتىس بولدى.
ەرمەك سەرىكوۆ 1989 -جىلى قاراعاندى وبلىسىندا دۇنيەگە كەلدى. ءوزىنىڭ سپورتتىق جولىن ءوزى تۋعان وڭىردە 10 جاسىندا شاحتينسك قالاسىنىڭ سپورت مەكتەبىنەن باستادى. قىسقا عانا ۋاقىتتا ازيانى ءبىر ەمەس ءۇش مارتە باعىندىردى. جاستار اراسىندا وتكەن الەم چەمپيوناتىندا دا جاسىنداي جارقىراپ، جەڭىس تۇعىرىنىڭ ەڭ بيىك ساتىسىنا كوتەرىلىپ، بايراعىمىزدى جەلبىرەتىپ، ءانۇرانىمىزدى اۋەلەتتى. وسىلاي، ۇزدىكتەردىڭ ۇزدىگى اتانعان ول جاسى جيىرماعا تولماي جاتىپ، حالىقارالىق دارەجەدەگى سپورت شەبەرى اتاعىنا قول جەتكىزدى. قازاقستان ۇلتتىق بوكس قۇراما كومانداسىنىڭ مۇشەسى اتاندى.. .
ەرمەك سەرىكوۆ شارشى الاڭعا كوتەرىلگەندە جۇرت تالانتىنا ءتانتى بوپ، «ءتفا- ءتفا، ءتىل- كوزىمىز تاسقا!» ، - دەپ سۇيىنە قارايتىن. سەبەبى، ەرمەكتىڭ ءبىتىمى بولەك، جۇدىرىعى تاستاي، شەگىنىپ، سەسكەنۋدى بىلمەيتىن باتىلدىعىنا ريزا بولۋشى ەدى. امال نە، ناعىز ارىستانداي ايباتتى، جولبارىستاي قايراتتى، جانىپ تۇسەر، قارىپ تۇسەر، وت بولاتىن، شوق بولاتىن شاعىندا ويناپ ءجۇرىپ، وت باسىپ، وققا ۇشتى.
قايران ءومىر! ەلى ەرمەكتەن كوزى تىرىسىندە ۇلكەن ءۇمىت كۇتتى. الداعى وليمپيادالاردا جاسىنداي جارقىراپ، قازاقستان قورجىنىنداعى التىنداردىڭ سانىن ارتتىرادى دەگەن سەنىمدە بولدى. ول وزىنەن ءيىسى قازاقتىڭ زور ءۇمىت كۇتەتىنىن دە جان- تانىمەن سەزىنگەن بولاتىن. ءبىراق، ارمانىنا جەتپەي، ەرتە، تىم ەرتە ومىردەن وزدى.. .
ەرمەك سەرىكوۆ 2008 -جىلى بەيجىڭ وليمپياداسىنان كەيىن باقىت سارسەكبايەۆ ۇلتتىق قۇرامادان كەتكەن كەزىندە، 69 كەلى سالماقتا ەدى. جاستار اراسىندا جۇرگەندە قارسىلاس شىداتپاي، ءۇش رەت ازيا چەمپيونى اتانعان وعىلاندى بوكستان ۇلتتىق قۇرامانىڭ باپكەرلەرى ەرەسەكتەر دۋىنا قوسىپ، 2009 -جىلى ميلاندا وتكەن الەم بىرىنشىلىگىنە اپارماق نيەتتە بولعان. ءبىراق، ەرەسەكتەر اراسىندا ەركىن كوسىلۋ باقىتى بۇيىرماي قالدى.
كەزىندە جەرلەسىن، گەنادي گولوۆكين دە دەر ۋاقىتىندا بايقاپ، ءوزى جاتتىعىپ جۇرگەن جەرگە، گەرمانياعا شاقىرعان. ەرمەك بارىپ، ءبىر ايداي بوكستىڭ قىر- سىرىن تەرڭدەپ، كوپ نارسەنى ۇيرەنىپ قايتادى. ءتىپتى گولوۆكيننىڭ پروموۋتەرلەرى جاس تالانتتى جىبەرگىسى كەلمەي، كاسىپقوي بوكسقا اۋىسۋىن دا سۇراپتى. ءبىراق ەرمەك الدىمەن گەنادي اعاسى سەكىلدى الەم نەمەسە وليمپيادا ويىندارىنىڭ بيىكتەرىن باعىندىرىپ، كاسىپقوي بوكسقا كەيىنىرەك كەلۋ جوسپارىن ايتىپ، ەلگە قايتىپتى.
سول تۇستا ەرمەكتىڭ كوزدەگەنى 2012 -جىلعى لوندوندا وتكەن وليمپيادا ويىندارى ەدى. وكىنىشتى ارينە!..
قاشاندا اقيقات اشى، جالعان تۇشى. جاس وعىلانىمىزدان ايىرىلعانىمىزعا ءبىرشاما ۋاقىت وتسە دە، ونىڭ ەرلىكتەرى مەن ەلگە سىڭىرگەن ەڭبەگى ۇمىتىلىپ بارا جاتقانداي. اباي حاكىم «سۇيەر ۇلىڭ بولسا، سەن ءسۇي. سۇيىنەرگە جارار ول» دەمەكشى جاستىعىندا جاسىنداي جارقىراعان وعىلانىمىزدى كوزدەن وشىرسەك تە، كوڭىلدەن ەشىرمەسەك ەكەن . ەرمەك تەك ەرەسەكتەر دۋىندا باق سىناۋعا ۇلگەرمەي كەتتى دەمەسەك، جاستار مەن جاسوسپىرىمدەر اراسىنداعى اسۋلاردىڭ بارلىعىن باعىندىردى. دانا حالىقىمىزدىڭ «جاسى كىشى دەمەسەڭ، اقىلى اسسا اعا تۇت، قوي اسىعى دەمەسەڭ، قولىڭا تولسا ساقا تۇت» دەگەن اتالى ءسوزىن وسىنداي ەر مىنەزدى ەرلەرىنە ارناپ ايتسا كەرەك. اسىلدارىمىزدى ۇمىتپايىق. بيىل تۇڭعىش رەت ەرمەك سەرىكوۆتى ەسكە الۋعا ارنالعان بوكستان 1-رەسپۋبليكالىق تۋرير ارمەن قاراي جالعاسا بەرۋىنە تىلەكشىمىز.
كۇنسۇلتان وتارباي
