قازاق اقىن- جازۋشىلارىنىڭ شىعارمالارى ا ق ش وقىرماندارىنا جول تارتتى

استانا.قازاقپارات - ەندى امەريكالىقتاردا قازاق اقىن- جازۋشىلارىنىڭ شىعارمالارىن وقي الادى. ا ق ش- تا مۇقاعالي ماقاتايەۆ پەن بەردىبەك سوقپاقپايەۆتىڭ تۋىندىلارى اعىلشىن تىلىندە جارىققا شىقتى.

 قازاق اقىن جازۋشىلارىنىڭ تۋىندىلارى شەتەلدىك وقىرمانعا جول تارتتى. بۇل يگى ءىستى باستاعان -  بەلگىلى پۋبليتسيست جانە جۋرناليست بيگەلدى عابدۋللين. ونىڭ جەتەكشىلىك ەتەتىن قازاق پەن- كلۋبى قوعام قايراتكەرلەرىن جيناپ، «ءبىز -  قازاقتار» اتتى توپتامانىڭ تۇساۋىن كەستى. وسى جولى مۇقاعالي ماقاتايەۆتىڭ ولەڭدەر جيناعى مەن بەردىبەك سوقپاقپايەۆتىڭ «مەنىڭ اتىم قوجا» پوۆەسى اعىلشىن تىلىنە اۋدارىلدى. بيگەلدى عابدۋللين، قازاق پەن- كلۋبىنىڭ پرەزيدەنتى: - قازاق پەن- كلۋبىنىڭ باسشىسى رەتىندە ءارى ازامات رەتىندە قازاق جازۋشىلارىنىڭ شىعارمالارىن اعىلشىن تىلىندە سويلەتۋ بورىشىم دەپ سانايمىن. جينالعاندار اراسىندا اۋدارماشىلار كاترين فيتتسپاتريك پەن مارينا ۆلادي اعىلشىن تىلىندە ءابدىجامىل نۇرپەيىسوۆ، بەردىبەك سوقپاقبايەۆ، مۇقاعالي ماقاتايەۆ شىعارمالارىنان ۇزىندىلەر وقىپ بەردى. ولارعا امەريكا مەكتەپتەرىندە ءبىلىم الىپ جۇرگەن قازاق بالالارى دا قوسىلدى. ۆلاديمير كارتسيەۆ، جازۋشى: - ءبىر كەزدەرى الەم جۇرتشىلىعى گابريەل گارسيا ماركەستى دە بىلمەگەن ەدى عوي. ونىڭ شىعارمالارى اعىلشىن تىلىنە اۋدارىلعاننان كەيىن ونى بۇكىل الەم بىلەتىن بولدى. سوندىقتان ءبىز وسىدان 2 جىل بۇرىن قازاق ادەبيەتىنىڭ كلاسسيگى ءابدىجامىل نۇرپەيىسوۆتىڭ 2 كىتابىن اعىلشىن تىلىنە اۋداردىق. وقىرماندار مەن ادەبيەت سىنشىلارى ول شىعارمالاردى نوبەل سىيلىعىنا لايىق دەپ تاۋىپ، نوبەل كوميتەتىنىڭ تىزىمىنە ەنگىزدى. امەريكانىڭ ادەبيەتسۇيەر قاۋىمى وزدەرىنىڭ قازاق پەن- كلۋبىنداعى ارىپتەستەرىنىڭ بەلسەندىلىگىنە ءتانتى بولعاندارىن ايتادى. كلۋب مۇشەلەرى وسى تۋىندىلارمەن شەكتەلمەيدى. تاعى ءابىش كەكىلبايەۆ پەن سماعۇل ەلۋبايدىڭ جانە ولجاس سۇلەيمەنوۆتىڭ كىتاپتارىن اعىلشىن تىلىنە اۋدارۋدى جوسپارلاپ وتىر.

 اۆتورلارى: مايرا كابيەۆا، مايك دجوەل

www.24.kz