تاريحتاعى حانىمدار مەن حانشالار، دانا جانە باتىر انالارى تۋرالى دەرەكتەر تەرەڭ زەرتتەلەدى
بۇل تۋرالى بۇگىن ل. ن. گۋميليەۆ اتىنداعى ەۇۋ- دا «قازاق حاندىعى تۇسىنداعى حانىمدار مەن ارۋلار» اتتى رەسپۋبليكالىق عىلىمي- تاجىريبەلىك كونفەرەنتسيادا قر مەملەكەتتىك حاتشىسى گۇلشارا ءابدىقالىقوۆا ءمالىم ەتتى.
«سان عاسىرلىق تاريحىمىزدا ەل بىرلىگى ءۇشىن باسىن بايگەگە تىگىپ، جەرىن قورعاۋ ءۇشىن اتقا قونعان، ءبىر اۋىز سوزبەن بيلىك ايتقان دانا، باتىر جانە شەشەن ايەلدەر تۋرالى دەرەكتەر بارشىلىق. دەگەنمەن، جازبا دەرەكتەر، ناقتى فاكتىلەر قامتىلعان قۇجاتتار بۇگىنگى زامانعا تولىق كۇيىندە جەتكەن جوق. الداعى ۋاقىتتا مۇنداي قۇندى دەرەكتەردى الەم ەلدەرىنىڭ مۇراعاتتارىنان، ءوز ەلىمىزدەگى دەرەك كوزدەرىنەن جيناستىرىپ، ۇرپاق يگىلىگىنە ۇسىنساق دەگەن ويىمىز بار» ، - دەدى مەملەكەتتىك حاتشى.
بيىل ەل بولىپ اتاپ ءوتىپ جاتقان قازاق حاندىعىنىڭ 550 جىلدىعى اياسىندا وتاندىق تاريحشى عالىمدار الداعى ۋاقىتتا زەردەلەنەتىن ءبىرقاتار مادەني جانە تاريحي قۇندىلىقتار بار ەكەنىن العا تارتۋدا.
«سونىڭ ىشىندە قازاق حاندىعى ۇعىمىن مەملەكەتشىلدىك جانە ءداستۇر كاتەگوريالارىمەن جۇيەلەپ، بايىتا ءتۇسۋ كەرەك دەگەن پىكىردەمىن»، - ەدى گ. ءابدىقالىقوۆا.
وسى ورايدا ول حاندىق تۋرالى تولىققاندى ۇعىم قالىپتاستىرۋ ءۇشىن حان ورداسىندا ەلدىك دەڭگەيدەگى كەڭەستەر مەن تاريحتا قالعان حانىمدار مەن حانشالار، بي مەن باتىرلاردىڭ انالارى مەن اسىل جارلارى تۋرالى تاريحي ماعلۇماتتاردى تەرەڭ زەردەلەگەن ءجون ەكەنىن تاپسىردى.
مەملەكەتتىك حتشى حانعا ادىلدىگىن ايتقان قاراشاشتان باستاپ، ەل تۇتقاسى بولعان ايعانىم مەن فاتيما حانشالار، جاۋعا قارسى شاپقان ەرجۇرەك گاۋھار مەن بوپاي سياقتى باتىر جارلار، سونداي- اق ەسىمدەرى تۇتاس جۇرتتىڭ تاربيەسى بەسىگىنە اينالعان باسقا دا انالاردىڭ رۋحاني تۇعىرى ۋاقىت وتكەن سايىن اسقاقتاي بەرەتىنىن اتاپ ءوتتى.
ايتا كەتەيىك، اتالعان رەسپۋبليكالىق عىلىمي- تاجىريبەلىك كونفەرەنسيانى ق ر پرەزيدەنتى جانىنداعى ايەلدەر ىستەرى جانە وتباسىلىق- دەموگرافيالىق ساياسات جونىندەگى ۇلتتىق كوميسسيا، ل. ن. گۋميلەۆ اتىنداعى ەۇۋ مەن قازاقستانداعى ب ۇ ۇ دامۋ باعدارلاماسى ۇيىمداستىردى. كونفەرەنسياعا قاتىسۋشى عالىمدار ايعانىم حانشا، بوپاي حانىم مەن باي انانىڭ، تويقارا حانىمنىڭ جانە قازاق حالقىنىڭ وزگە دە بەلگىلى وكىلدەرىنىڭ ەسىمدەرى جايىندا باياندامالار جاسادى.
اۆتور: رۋسلان عابباسوۆ
