كوكشەتاۋ جاستارى قالا كوشەلەرىنەن لەنين ەسكەرتكىشىن الىپ تاستاۋدى تالاپ ەتتى

استانا. قازاقپارات - كوكشەتاۋ جاستارى ورتالىق ساياباقتا تۇرعان لەنيننىڭ ءمۇسىنىن اباي ەسكەرتكىشىمەن الماستىرۋدى ۇسىنادى.

قالادا «كۇن كوسەمگە» ارنالعان ەسكەرتكىش ءبىر ەمەس بىرنەشەۋ.

بۇل تۋرالى 31 -ارناسى حابارلايدى.

قالا جاستارى جەرگىلىكتى باسشىلىقتان ەسكەرتكىشتەردى رەتكە كەلتىرۋدى سۇراپ وتىر. اسىرەسە كەشقۇرىم ۋاقىتتا كوكشەتاۋداعى ورتالىق ساياباققا جينالاتىن جاستار قالانىڭ قاق تورىندە لەنين ەسكەرتكىشىنىڭ تۇرعانىنا قارسى.

 «لەنين ءبىزدىڭ اتامىز دەگەن زامان كەتكەن. قازىر تاۋەلسىزدىگىمىز بار، تۋىمىز بار. سوندىقتان لەنيننىڭ ءمۇسىنىن كوكشەتاۋدىڭ قاق تورىنەن، ورتالىق ساياباقتان الىپ تاستاۋ كەرەك. ونىڭ تۇرعانىنا قالاداعى كوپتەگەن قازاق جاستارى قارسى. ويتكەنى، بۇل جاس بۋىننىڭ ءتالىم تاربيەسىنە كەرى اسەر ەتەدى»، - دەيدى كوكشەتاۋ قالاسىنىڭ تۇرعىنى اسلان مۇحامەدياروۆ.

ورتالىق ساياباقتان وزگە اۆتوۆوكزالدا جولاۋشىلارعا ارنالعان سىزبادا لەنين بەينەلەنگەن تاڭبا تۇر. بۇدان وزگە ستاديون ماڭىندا اق ءتۇستى ءمۇسىنى تاعى بار. سونداي-اق، وزگە دە كوشەلەردى ارالاعان ادام لەنينگە ارنالعان بەلگىلەردى كەزدەستىرە الادى.

«اباي كوشەسىنىڭ قاسىندا تۇر عوي، نەگە وسىنىڭ ورنىنا ابايدى قويماسقا. بولماسا ءبىزدىڭ قازاقتىڭ توپىراعىنان شىققان باسقا دا مىقتى تۇلعالارىمىز بار. سولاردىڭ نەگە ەسكەرتكىشى جوق»، - دەيدى كوكشەتاۋ قالاسىنىڭ تۇرعىنى مەرگەن توقسانباي.

جاستاردىڭ تالابى ءسوتسيليزمنىڭ سارقىنشاعىن ەسكە سالاتىن بەلگىلەردەن ارىلۋ. ال، جەرگىلىكتى باسقارما باسشىسى ەسكەرتكىشتەردى رەتتەۋگە بايلانىستى جاۋابىن قىسقا قايىردى.

«ءسىزدىڭ سۇراعىڭىز ورىندى. ءبىز بۇل سۇراقتى ويلاستىرىپ، ءبىر شەشىمگە كەلەمىز»، - دەيدى اقمولا وبلىستىق مادەنيەت باسقارماسىنىڭ باسشىسى ساۋلە بورىبايەۆا.

سونداي-اق، مادەنيەت باسقارماسى باسشىسىنىڭ جەكە پىكىرىنە سۇيەنسەك كەڭەس زامانىن كورگەن زامانداستار ءالى دە بولسا لەنيندى قۇرمەت تۇتاتىندىعىن ايتتى. ال جاستار بولسا تاۋەلسىز مەملەكەتىمىزگە ساي ەسكەرتكىشتەر بولۋ كەرەك دەگەن پىكىردەن تايماي وتىر.