قازاقستان پرەزيدەنتىنىڭ سەزدە بەرگەن ۇسىنىستارى وتە سىندارلى

استانا. قازاقپارات - استاناداعى الەمدىك جانە ءداستۇرلى دىندەر ليدەرلەرىنىڭ سەزىندە قازاقستان پرەزيدەنتى نۇرسۇلتان نازاربايەۆ بەرگەن ۇسىنىستارى وتە سىندارلى، دەپ ەسەپتەيدى ساۋد ارابيانىڭ يسلام ىستەرى جونىندەگى مينيسترىنىڭ كەڭەسشىسى ابدۋللا يبن فاحد-ال-ليحەدان.

«ءبىز ەكسترەميزگە قارسى كۇرەستە ءبىر-بىرىمىزگە قولداۋ جاساپ وتىرۋىمىز كەرەك. سەبەبى ەكسترەميزم ادامزات ءۇشىن قاۋىپ-قاتەر توندىرەدى. سەبەبى ولار بىزگە پىكىرالۋاندىلىعىنان باس تارتۋعا ماجبۇرلەۋدە جانە ءبىر ۇلت، ءبىر ۇلىس بولىڭدار دەپ قورقىتۋدا. وسىلايشا ولار ادامزاتتى ءتۇرلى ناسىلگە، ءتۇرلى دىنگە تيەسىلى ەتىپ جاراتقان اللانىڭ ەركىنە قارسى شىعۋدا. ءبىزدى بەلگىلى ءبىر شەڭبەرمەن ءومىر سۇرۋگە مىندەتتەۋدى جوسپارلاۋدا. سوندىقتان وسىنداي جيىندا باس قوسىپ، ايتىلعان ۇسىنىستار مەن دەكلاراتسيالاردى جىتى زەرتتەۋىمىز كەرەك»، - دەدى ول بۇگىن ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا.

ونىڭ سوزىنە قاراعاندا، سەزدىڭ قورىتىندى دەكلاراتسياسىندا كورىنىس تاپقان قازاقستان پرەزيدەنتىنىڭ يدەيالارى وتە تۇشىمدى.

«پرەزيدەنتتىڭ ۇسىنىستارى وتە سىندارلى دەر ەدىم. سەبەبى ولار ءبىزدى سوعىستى دوعارۋدى جانە بىتىمگە كەلۋگە شاقىرۋدا. بۇل تۇپكى ماقسات جانە ول يگى ماقساتقا قول جەتكىزۋىمىز كەرەك. ءبىز سەزدى اشىق جانە ەشبىر الالاۋسىز، ءادىل ءوتتى دەپ ەسەپتەيمىز»، - دەپ ءتۇيدى ويىن ابدۋللا يبن فاحد-ال-ليحەدان.

اۆتور: جاسۇلان جولدىبايەۆ